香港人中意飲茶，一到假期周末，茶樓人滿為患，由於食客眾多，不少人需要搭檯，而一名港男近日就在Threads分享自己的「搭檯出醜」爆笑事，事主與母親到酒樓飲茶時，誤將對面茶客自備的抽取式紙巾當成酒樓免費紙巾，應母親要求一口氣抽了兩張，事後才知「闖大禍」，當場尷尬爆棚。豈料對方不但沒有怪責，母親倒瀉茶時更大方再送紙巾，令事主哭笑不得。
小紅書示意圖片
事主在 Threads 憶述，早前他與母親到茶樓飲茶，期間與兩名食客搭檯。當時他見到檯面放着一包盒裝抽取式紙巾，位置偏近對面兩人，事主母親於是吩咐他「抽兩張嚟用」。事主順手將紙巾拉近並抽出兩張，豈料剛用完，對面食客即表示「包紙巾係佢哋嘅」，令事主當場無地自容，崩潰直呼：「好X，點算好」。
小紅書示意圖片
示意圖片
而隨後事主母親不慎倒瀉茶，對面食客竟極具風度地「再畀咗幾張紙巾我哋用」，令事主大感難為情，笑言「救命」。事主透露，對面兩人為旅客，疑似性格內向：「難道我要破壞香港人嘅待客之道嗎？我阿媽用破爛嘅國語同佢哋傾咗兩句，佢哋已經好尷尬。」事主無奈大呻：「一擺喺度以為係餐廳提供，真係估唔到」、「好荒謬點解會咁，真係哭了！」他隨後補充，指自己當時已即時誠心道歉，並指身上只有半包已開封的 Tempo，且見對方點了滿檯點心吃不完，令他不知如何補償。
資料圖片
帖文一出，大批網民隨即圍觀熱議。不少人直言抽取式紙巾極具誤導性：「抽嗰啲紙巾真係好容易以為係餐廳提供，乾紙巾真係好容易誤會。」更有大量網民「自首」，表示自己亦曾遇過一模一樣的尷尬場面：「我都試過！抽咗張紙巾出嚟，隔離位女士就即刻拎開包抽紙但無出聲，我再望下其他檯係無紙巾嘅……先發現原來係佢自己嘅，即刻係咁講唔好意思，諗起都尷尬到盡頭……」
面對事主的尷尬處境，不少網民搞笑留言獻計：「快啲點返籠蝦餃請人食啦」、「還返包 Tempo 畀佢」、「抽張紙可否有幫助，抽出彼此的尷尬」。亦有樂觀網民指出「搭檯緣分」往往妙不可言，分享早前帶台灣朋友去蓮香樓飲茶，與同檯另外兩名台灣人夾錯點心，最後索性「合體」一起吃、結伴喝咖啡，最終發展成長期聯絡的好友。
