「粗口大王」

回歸前後，立法局/會都係議政立法嘅莊嚴地方，位位議員都來自不同專業界別，斯斯文文，衣著整齊，字字鏗鏘，但自從有一班劣質「犯民」議員當選之後，議事堂就變得低俗亂籠，污煙漳氣，冇規冇矩，冇晒秩序！其中「粗口大王」黃X民 就係將議會降格、降呢嘅始作俑者！

「粗口王」74歲，香港土生土長，太太係台灣省人。「粗口王」喺香港珠X書院歷史系碩士畢業，做過珠X書院新聞及傳播系系主任，又主持過電視台同電台嘅時事評論節目。線人話佢阿爸同社團「新 beyond」前話事人「鄉生」好熟，而「粗口王」又同「鄉生」啲細路由細玩到大，所以佢係喺社團氛圍之下成長！

「粗口王」喺2008年做咗立法會議員之後，就將激進嘅議事方式帶入議會，佢多次向官員大吵大鬧、掟嘢，甚至乎上前辱罵官員、干擾發言，所以佢又有「流氓議員」、「癲狗」等稱號！

2008年10月，「粗口王」喺時任特首Donald宣讀施政報告時，企起身拍枱大叫口號，抗議生果金設入息審查，又將隻蕉掟向特首站立嘅位置，雖然被主席逐出議事廳，但離開時「粗口王」又再將3隻蕉掟向特首！佢事後厚顏無恥咁讚自己，話「沒有抗爭、哪有改變」！呢啲「小學雞」行為就連民主阿婆「陳四萬」都睇唔過眼，批評「粗口王」將搗亂講成彰顯社會公義，喺大錯特錯，咁樣會俾人口實，話香港人未夠班進行民主普選！「粗口王」又點會認衰吖，佢仲喺網上回應咗一句「狗改不了食shit」！

2009年，時任財政司曾司長喺立法會宣讀財政預算案時，期間「粗口王」突然衝上前掃跌司長枱上嘅文件，以及大聲質問司長。而喺其他例會或財務委員會會議中，佢又稱呼官員做「狗官」，又叫時任政制及內地事務局局長快啲去「仆x」……

喺2013年12月，時任政務司司長「林太」出席立法會，解說政改諮詢文件嘅時候，「粗口王」又大大聲聲話 : 「若政府繼續假諮詢，下次唔係掟雞蛋，係掟汽油彈！」事後佢不但唔肯收番言論，仲死撐話呢啲只不過係溫馨提示吓「林太」，話民怨已經升咗級喎！

2014年7月，「粗口王」喺「梁特首」立法會答問會期間，向特首掟文件、玻璃杯，但事後又無賴到話唔記得自己掟咗咩，仲話咁様玩，擺明就係搞對抗，目的就係要羞辱特首，又話特首這類人，應該死要落地獄咁話……，佢完完全全將整個議事廳變成「爛仔竇」！

雖然「粗口王」喺議會嘅粗暴行為避開咗刑責，但市民大眾已經睇厭咗呢啲爛仔show，所以「粗口王」喺2016年立法會選舉，就輸咗比一個毫無議政經驗嘅本土派𡃁妹仔游x禎。呢個結果令到「粗口王」無晒面，佢不忿之餘，仲好冇品咁喺網台節目回應 : 「一個廿幾歲嘅𡃁妹，乜x嘢都唔識，我做x咗八年我輸畀佢，咁仲唔x收山呀？」 後來又「賴」輸咗係因為自己過激嘅言論，樹敵太多，所以拖累選情喎！「粗口王」以前喺議會發爛渣，用粗暴手法同語言去攻擊特首、官員同議員嘅時候，就大大聲話係選民授權佢咁做，咁，曾經授權比佢嘅選民，今次走晒去邊呢？！

無可否認「粗口王」對中國歷史文化，以至世界歷史同政治都有啲研究，但好可惜佢冇好好利用呢啲知識去教育下一代，反而將暴力、粗口帶入議會，終於搞到議事廳內外都個個有樣學樣，好似許X峯、鄭x泰、林x廷等等，都以搗亂為己任，令政府施政困難，拖累民生發展10幾年；而坊間年輕嘅一代，都比呢啲劣質文化潛移默化咗……

啲人以為「粗口王」好巴閉、好「把炮」，不過佢原來都只係一個得把口嘅膽小鬼！喺2020年9月國安法實施冇耐，佢就走咗去台灣省避險。雖然「粗口王」搞亂檔已經係成十幾年前嘅事，而家人又走咗，但唔知佢會唔會仲喺幕後操緊盤，荼毒啲後生仔，所以我零零發都要喺度重溫下佢嘅臭史，等大家提高警覺！

鍾情局。零零發

鍾情局

** 博客文章文責自負,不代表本公司立場 **

「支X會」嗰三個話事人 —「李X人」、「AV仁」同「不幸彤」，過去一直收美西方黑金辦事，打住所謂「爭取民主自由」旗號，呃神騙鬼、顛覆政權。

「李X人」

前主席「李X人」，身兼「職X盟」秘書長，由1994年開始，每年都向NED旗下嘅「美角國際勞工團結中心」申請資助，累計達到1,300萬港元。 咁多年嚟啲黑金流咗幾多入佢個袋都計唔清。 「李X人」口口聲聲話「職X盟」為「工人爭取權益」，實際咪又係養班傻仔出嚟搞事。

2013年嘅時候，「生果佬」得悉「戴妖」提出嘅「佔中」計劃，就拿拿臨泵咗1,730萬港元俾「功黨」、「白鴿黨」、「公X黨」、「社民X」，又特登秘密分咗150萬港元黑金俾時任「功黨」主席「李X人」。佢老婆「鄧X娥」收得仲狼死，佢曾經出任「亞洲專訊資料研究中心」董事，呢個組織自1994年起就開始收受美角、德角、羅威等嘅黑金，累計有成1.1億港元。黑金億億聲，唔怪得兩公婆口號嗌得咁大聲啦!

2020年，「李X人」同25個老友喺維園搞未經批准集結。同年，又同「生果佬」、「X森」、「AV仁」、「長毛」等亂港分子多次參加非法遊行。其實呢啲遊行背後全部都有外部黑金勢力撐腰，佢哋次次都嗌嘅「民主自由」口號，根本就係一場黑金show，口號喊得震天響，實際只係交功課俾金主睇、賣港求榮。「李X人」最後被控「組織未經批准集結」同「煽惑他人參與未經批准集結」罪名，被判監34個月。

2020年6月30日《香港國安法》實施，「李X人」喺7月1日就即以視像方式參加美角國會嗰個標題叫「一國兩制的終結？」 嘅聽證會。你估佢去講咩？咪就係請求外國組織干預香港事務，支持美角「制裁」香港囉。佢喺聽證會上亂噏廿四，大肆抺黑誣衊《香港國安法》，不斷為美角吹奏，讚美角佬有智慧，眉來眼去搭棚邀請美角做嘢。結果呢？「侵侵」就簽署咗《香港自治法》同行政命令，取消香港特惠待遇，限制敏感科技出口等等，直接令香港經濟受損。你話佢係爭取民主？佢擺明就係乞求外國制裁自己香港人，損害香港社會利益；佢表面上扮「民主鬥士」，實際又係收咗黑金做嘢。

「AV仁」

另一個前主席「AV仁」，係反華組織「華人民主書院」嘅創會董事。呢間書院2011年喺香港註冊、喺台北宣布成立，表面上推廣民主，實際係依靠「美角民主基金會（NED）」嘅資助運作，同台灣「民X黨」、「台獨」及海外反華分子有緊密聯繫，多次透過網絡課程招收會員，推動「港獨」及顛覆活動，藉此荼毒香港同台灣嘅青年參與非法抗爭活動。

2014年違法「佔中」前，書院就邀請咗台獨分子嚟香港舉辦多場抗爭訓練營，進行非法佔中培訓，為大型騷亂作操練，推班入世未深嘅年輕人出去衝。「AV仁」自己就喺後面收外國黑金，坐享其成。講白啲，佢根本就係用年輕人嘅純樸情懷，去換自己嘅政治光環同金主掌聲。其中非法佔中嘅兩大學生「舵手」，「周X康」同「楊X賢」，就係書院育成嘅傀儡，不過佢哋就「醒」啦，唔似其他後生仔咁要坐監找數。

2014年，「周X康」喺書院籌款晚會入面擦「AV仁」鞋，話: 「全靠華人民主書院將抗爭概念帶到好多地方，抗爭演練都係書院教曉我哋」。 到2019年，書院同「支X會」喺台灣搞聯合研討會，而參加者包括有份策動非法佔中嘅前「民主動力」及「真普選聯盟」召集人「鄭宇X」及反華組織「對話中國」嘅主席「X丹」，見到呢班潛逃海外嘅反華分子，相信大家都估到研討會嘅潛藏目的啦。事實證明，「AV仁」多年嚟袋住NED嘅黑金，用書院串聯境外反華分子推動反中活動、又培育一班亂港炮灰幫佢衝，搞亂香港。

「不幸彤」

至於副主席「不幸彤」，佢曾經喺2012至2018年出任同NED關係非常密切嘅「國際特赦組織HK Branch」執委同埋公司董事，而咁多年嚟佢都積極參加由NED資助嘅各類境外反華活動。2016年4月，更被外部勢力刻意推送到印度，參加由NED資助、美角反華組織 「公民力量」舉辦嘅所謂「族群青年領袖研習營」，仲同支持「藏獨」嘅「答賴喇嘛」會面，逐步被栽培成外部勢力嘅在港代理人。

喺支聯會案件中，「AV仁」開審前急急腳認罪，好明顯係心知肚明罪證確鑿走唔甩，唯有低頭搏減刑。「李X人」就死撐到底，搏翻身。至於「不幸彤」，就可能中咗所謂「民主自由毒」太深，求情嗰陣仲毫無悔意話:「唔認為自己有錯」，所以拒絕求情! 佢哋三個對單case嘅取態，唔知係「黑金使得鬼推磨」，定係佢哋對外國嘅所謂「民主」走火入魔呢？

老實講，呢班偽「民主話事人」，由「國教事件」、「非法佔中」到「2019黑暴」一直收咗黑金做嘢，用「民主」口號呃班年輕人出去死衝爛衝，最後搞到佢哋不但朝頭爛額，仲身陷囹圄。
所以下次如果再聽到有人大叫「為香港人」、「為民主自由」等等嘅口號，記得問一句：「今次又收咗幾多黑金先？」

鍾情局。零零發