TVB中秋節宣傳片創意十足 全網激讚 「三太白天娥」樊亦敏中秋回歸玩到癲

下周五（9月25日）就是中秋節啦！TVB企業傳訊部品牌傳播科（CID）特意打造一條超有節日氣氛的中秋宣傳片，邀來《愛．回家之開心速遞》人氣角色「三太」樊亦敏擔綱演出一段充滿濃厚港味兼創意十足的中秋節宣傳片。

「三太」白天娥強勢回歸，以「貴婦Look」登場，拖住氣球狗，超爆笑。

穿「亮片裝」貼地食大排檔，奶茶當紅酒飲，好好笑。

點解可以咁得意嘅！

「嫦娥Look」靚到飛起。

Amy姐今次以經典「三太」白天娥身份回歸幕前，短短1分鐘中秋宣傳短片玩味十足。「三太」向來以鬼馬見稱，在片中她全程以極度誇張的演繹方式，將三太標誌性的貴氣與搞笑元素發揮得淋漓盡致，對應不同主題向觀眾作出多個「中秋溫馨提示」，包括「中秋節，唔好煲蠟」、「中秋賞月唔好留低垃圾」、「回味中秋，讓資源回收」等，既具資訊性又充滿喜劇感。其中一幕更融入近期Hit 爆全城的「爆旋陀螺」，大玩「月餅罐爆旋陀螺」—取名為「雙黃蓮蓉VS狂暴五仁」，創意十足，全網激讚：「好正喎」、「笑到黐線」、「畀三太笑死」、「每次睇都會心一笑」、「好盞鬼！」

「月餅罐爆旋陀螺」創意十足，全網激讚。

Amy姐嘅「啦啦隊Look」散發少女感。

呢個「嫦娥」幽默又搞笑，絕對令人印象深刻。

飲杯！中秋節快樂。

今次宣傳片最大亮點，是Amy姐先後以四大造型亮相，分別是「貴婦Look」、「亮片Look」、「嫦娥Look」及「啦啦隊Look」，其中以「嫦娥Look」最為吸睛。化身月中仙子的她，360度華麗轉身登場，舉手投足散發古典美，將「嫦娥」演繹得生鬼有趣，表情動作交足戲，非常啜核。

Amy姐以往古裝造型同「嫦娥Look」，分別唔係好大，絕對係保養得宜。

Amy姐凍齡有術，不愧為「美魔女」。

Amy姐對拍「嫦娥」嗰幕戲，非常難忘。

Amy姐接受官方訪問時談及造型構思，她坦言與造型師有商有量：「因為好多人都掛住三太，然後我就膽粗粗提議不如往嗰個方向諗，其實都可以再做番闊太，然後好有Feel自己一路慢慢行，仲要藐人哋，嗰啲衰衰咁嘅樣，其實幾好笑嘅。」講到拍攝難忘事，Amy姐笑言：「拍嫦娥推路軌，用吹風機吹住嗰幕。」

Amy姐久違再穿上古裝演繹直言非常開心，對比以往古裝造型，Amy姐容貌與身形變化不大，絕對凍齡有術，不愧為圈中出名的「美魔女」。談到多年來減肥及保養心得，Amy姐坦言先由內在開始：「首先要Check清楚自己身體裡面，有冇一啲嘢需要照鏡或要小心，睇吓對乜嘢過敏，咁就要對症下藥。同埋腸胃需要保持清潔，少食油膩嘢，食一啲有益嘅嘢，我會食蒸魚，盡量有時間就會瞓多啲。」至於保養方面，她強調「唔懶得」：「由頭護理到腳趾尾，全Set做晒。」她還大方透露現時體重約49KG，體重比例勻稱，絕對不輸年輕女性。

樊亦敏、林淑敏聯同崔錦棠、何晉樂（Rock）、吳麗珠、張光宇等參與《健愛社慈善午宴》，與家庭戶提早賀中秋。樊亦敏獻唱《甜蜜蜜》及《月亮代表我的心》，更走入飯桌與大家合唱，又不斷派心心，冧爆全場。眾藝人落力派發50個爆旋陀螺給小朋友，林淑敏以直髮短褲長腿造型現身，獲封「長腿大小姐」，更與張本立合唱《誰令你心痴》。

左起：林淑敏、樊亦敏、吳麗珠、張光宇、何晉樂（Rock）、崔錦棠及張本立齊齊參與《健愛社慈善午宴》。

吳麗珠自備利是派給小朋友。

樊亦敏獻唱《甜蜜蜜》兼走入飯桌合唱。

崔錦棠雖手部韌帶撕裂仍未康復，仍撐場獻唱，幽默叫大家不要與Rock比較歌藝。何晉樂獨唱《追》外，更與樊亦敏合唱《你最珍貴》，默契十足。吳麗珠與小朋友又唱又跳，更自備利是派給他們，叮囑快高長大、學業進步。張光宇表示連續兩年支持慈善午宴，希望用歌聲帶來歡樂。主席張本立感謝藝人朋友善心支持，預祝大家中秋快樂。

眾藝人派發50個爆旋陀螺給小朋友。

崔錦棠雖手部韌帶撕裂仍未康復，仍撐場獻唱。

林淑敏以「長腿大小姐」造型現身。