嘩鬼「悼念騷」

仲有兩個星期就係「哈、囉、喂！」，但係有班友喺兩個月前嘅8月31日，已經搞咗場嘩鬼「悼念騷」，演員都係嗰班熟口熟面嘅黃人、道具係花束蠟燭黃傘。問題係，呢套「悼念騷」早就俾事實拆穿，所有官方數據、片段全部攤晒出嚟，連所謂嘅「死者」都「生勾勾」現身講到明自己安然無恙，證實所謂「8.31事件」根本係無中生有嘅假新聞。但黃人唔理，因為對佢哋嚟講只要仲有人睇直播、仲有利用價值，呢個「悼念騷」就要年年上演。

今年亦都唔例外，黃人照舊出動，喺太子站外排晒花束蠟燭，擺好個「陣」；中間企滿黑衣人士，負責做「茄喱啡」；最前面就搵啲骨幹黃人出嚟演主角，有啲皺眉、有啲落淚、有啲握拳，配合住高分貝口號。再加上一班自稱所謂「記者」或者「網媒」嘅人，你拍我、我拍你，對住鏡頭不斷炒作謊言，一班人圍住一個謊言做戲。

演員全部係「老戲骨」，當中就包括「煽暴」牙E李X姿同埋反政府網媒記者鄧X榮(又名爆炸頭)。先講李X姿，佢係反對派組織「社民連」出身，多年嚟沉迷街頭示威同反政府活動多過專心睇牙，成日喺街度煽仇煽暴、散播顛覆信息，搞到社區烏煙瘴氣。有市民早就投訴佢根本唔似一個專業人士，每逢「大時大節」就走出來，反而似政客多一啲。

當年黑暴期間，李X姿同一班「黃醫」走出嚟簽咩「人道危機」聲明，亂咁抹黑警方執法。《香港國安法》生效之後，李X姿都係冥頑不靈，仲成日孭住條印住「XX必亡」嘅煽暴絲巾周圍晃，佢見到人唔理係病人或普通人，都口口聲聲叫人「要反抗」。《香港國安法》都生效咗6年，佢每逢乜嘢紀念日仲到處晃，結果俾人炒魷，冇大機構夠膽再請佢，佢專業水平如何，大家自己諗啦。更離譜係，佢好似嗰啲所謂「送車師」、「旁聽師」咁，在審理黑暴案件的法庭外，企定定做政治騷，令人不禁質疑佢係咪想向法庭施壓。講專業？佢一啲都唔似專業牙醫，似十足專業政客，搞壞晒真正醫療界人士的名聲。在《香港牙醫專業守則》導言中講明，香港牙醫管理委員會要「致力保障市民的權益和建立公眾對牙醫專業的信心」。唔知李X姿這些激進行為，有無建立公眾對牙醫專業的信心呢?

而另一名「老戲骨」爆炸頭，佢一向以極度偏頗嘅角度講政治，不斷煽風點火、刻意挑起對立情緒，分化社會。喺「8.31事件」、「梁凌杰逝世」、「周梓樂逝世」呢啲黑暴敏感日子，有人經常現身，表面話自己做「採訪」，實際就喺現場阻礙警方執法，再喺頻道開直播，利用網絡散播煽動訊息，企圖喚起黑暴記憶、煽動仇警及反政府情緒。

2020年開始，有人開咗間公司，喺多個社交平台營運，仲刻意開Patreon收月費，打正旗號話「支持同路人」、睇採訪片同日常生活vlog，表面就話係俾「同路人」支持創作，係咪想收來歷不明嘅「黑金」呢？咁就可以長期俾錢佢搞對抗、繼續煽仇煽暴。喺度都要提醒公眾一句，千萬唔好隨便資助呢啲可疑平台，唔單止俾人當水魚「掠水」，如果資金最終被指用作支援違法活動俾錢啲「指明潛逃者」，仲有機會觸犯法例、自找麻煩。

成場「悼念騷」入面，零零發最擔心嘅，其實係企喺人群邊緣嘅一批學生同年輕人。可能佢地咁啱路過，見到有人攝影、有人直播、有人喊口號，就好奇停低兩步，點知俾人拉入人群，叫佢「一齊支持」、「一齊見證」，慢慢變成背景板；再加上有人不斷喺佢哋耳邊重複：「真相被掩蓋」、「官方唔可信」，企圖對呢班心智未成熟嘅年輕人洗腦，為下一輪政治操弄播種。最慘嘅係，呢啲年輕人未必知道，自己實際係俾人利用做臨記，幫謊言製造新一輪「畫面」。

近日亦有例子擺喺眼前，早前就有一間中學嘅學生會候選內閣，被揭發竟然搵咗一個以精神病患者為噱頭命名嘅網絡聯盟幫手拍片拉票。表面話係創意合作，但明眼人一睇就知呢個網絡聯盟劣跡斑斑，當中有人涉嫌寄刀片去公營機構、學校恐嚇，而被警方拘捕；亦有成員因刑毀黃家駒墓碑而被判囚。面對呢啲違法違規嘅問題人物，年紀輕輕嘅學生哥一個唔覺意，就好容易俾啲極端組織吸引，甚至一步步被這些組織游說加入，踩入不法行為嘅危險地帶。

上一篇文都提過，最近因「串謀分裂國家」罪成入獄嘅前「建國聯」成員陳X森，喺獄中寫血書踢爆「姜+偉」真面目，事前打住「追求公義」、「手足團結」嘅旗號，點知「手足」出事俾人拉，主事人轉頭就當冇見過，用完即棄，冷血至極。呢啲就係黃人嘅一貫卑劣手法，專門揀心智未成熟嘅後生仔女上前線違法送死，自己就企後面收割名利，永遠都係「叫人衝、自己鬆」咁食人血饅頭。

其實，唔同嘅政府部門，包括警方，消防及醫管局都講咗N次，有幾多傷者、幾多人被送院、有咩紀錄，全部有根有據，多間主流媒體亦從未報道有任何人死亡。至於黃人口中嗰位「死者」，其實係喺英國定居嘅港人王X俊，之前更加喺英國現身說法，證明自己仲係龍精虎猛。換句話講，「8.31事件」完全係無中生有嘅假新聞。

照道理，正常人都會認真檢討一下自己係咪被人誤導，甚至為自己曾經散播嘅謠言感到後悔。可惜黃人從來唔會認錯，仲將呢場「悼念騷」年年重演，死都要撐落去。因為對佢哋嚟講，真相早就唔重要，重要嘅係可以繼續博取公眾眼球、吸曝光、刷政治存在感，將自己包裝成受害者。

更荒誕嘅係，呢套「悼念騷」，唔單止係本地上演，已經發展到國際。本地黃人負責提供現場煽動畫面，海外反中亂港分子就接力，將呢啲畫面剪接成所謂「香港人權記錄」，再配上各種煽情英文字幕作包裝。外國政客就擺出一副「關心香港」嘅樣板姿態。只要「悼念騷」仲有得演，少數黃人就可以繼續向「外國主子」搖尾乞憐，大大聲話「你睇，我哋仲喺香港搞搞震架。」，睇吓可唔可以換多啲打賞。

假新聞絕對唔係小事，2019年黑暴完全就係因為網上不斷瘋傳嘅假新聞而發生。黑暴帶畀香港係實實在在嘅破壞，85個地鐵站被破壞、740組交通燈被打砸、街頭被堵塞、普通市民被圍毆放火燒傷，經濟民生深受衝擊，國際形象嚴重受損。

今日香港好唔容易由動盪中走返出嚟，社會逐步回復穩定，市民係想正常生活、向前行。但偏偏就有一小撮黃人死心不息，搞所謂「8.31」根本係一場圍繞假新聞嘅政治「悼念騷」。所以，香港人唔好覺得唔關我哋事，反中亂講分子做嘅所有嘢，背後都係靠害香港人，我哋要感激國安處嘅果斷行動，否則就會俾呢班各懷鬼胎、X卡聯盟攬住一齊墮落深淵。

鍾情局‧零零發

鍾情局

** 博客文章文責自負,不代表本公司立場 **

上個月初，受禁組織「香港民主建國聯盟」(「建國聯」) 兩個成員，伍X東同陳X森，被法庭裁定「串謀分裂國家」罪成，分別判囚36個月同38個月。估唔到陳X森（森仔）一入冊，即刻喺獄中寫左封長達七版紙嘅親筆信，鬧爆創立「建國聯」嘅「姜+偉」係「姜神棍」，細數自己點樣俾「姜神棍」呃入會。

森仔仲大爆「建國聯」同另一受禁組織「香港議會」都係呃「手足」嘅「政治雞棚」大騙局，佢話佢被警察拉左之後，「姜+偉」、「建國聯」、「香港議會」全部人都視若無睹，根本就當佢係炮灰，用完即棄。

網上流出森仔喺監倉寄出嘅血書，有圖有真相，一字一血，大家自己睇圖。信中交代，2021年尾，佢因涉「煽惑他人參與非法集結」被捕，還押期間識咗「姜+偉」，佢當時覺得姜成日「大做文章」、鍾意吹牛，所以一直同佢保持距離；到2024年尾，「姜+偉」喺台灣省創立「建國聯」之後，不時喺社交媒體公開發文招人入會，仲私訊森仔叫佢加入。森仔話自己當時想搵個「可靠」人士幫佢移居海外，所以就加入咗「建國聯」。

森仔入咗會之後先知中伏，佢發現「建國聯」同「香港議會」根本係「政治雞棚」，對在港「手足」嘅情況視若無睹，姜同班骨幹一直拒絕幫森仔搞移居海外，令森仔更心寒嘅係，有次開會問到會唔會支援被捕嘅組織成員，姜竟然拒絶回應，森仔先知姜根本就係神棍一名。森仔喺血書入面話姜連15歲中學生都呃入會，行為可恥，大罵姜「當我哋係炮灰咁用完就拋棄」，然後再利用「我哋嘅苦難去呃啲無知人嘅支持」。森仔呢封血書，又一次揭穿亂港分子「叫人衝、自己鬆」、呃神騙鬼、唯利是圖、食盡人血饅頭嘅真面目。

其實「姜+偉」啲呃神騙鬼往績真係多籮籮。黑暴嗰陣佢成日出嚟「教」啲學生妹點樣掟汽油彈，其實借機摸手摸腳。佢參與暴動驚俾人拉，所以又扮急救員又扮網媒記者。佢仲自封自己做牧師，但事實上全個宗教界都知佢並無牧師資歷，當年屯門基督教聯會仲出信叫區內教會小心此人。

「姜+偉」巧立名目眾籌呃錢嘅事跡，亦都喺黃圈出晒名﹕黑暴嗰陣有人踢爆佢私吞支援示威者嘅眾籌；2022年佢搞個「KK園受害者眾籌拯救計劃」，借大家同情詐騙受害者嚟斂財；後來佢涉違法被捕後又話籌律師費呃咗28萬，事後被踢爆代表律師根本係免費；今年佢先後兩次以所謂「香港議會議長」身份掠水，第一次就將個成本只係兩舊水嘅爛鬼槌仔，改個名做「紀念法槌」就開價成千銀賣俾支持佢地嘅水魚，第二次就用「幫赴烏克蘭打仗嘅港人眾籌買裝備」嚟做名目呃人捐錢，啲騙財技倆真係千奇百怪！

最賤格嘅係，「姜+偉」連年輕人都唔放過。被警方拘捕起訴嘅「建國聯」在港成員當中，有一個係15歲嘅中學生，早前被法庭裁定「串謀分裂國家」罪成判囚42個月，呢單咪就係森仔封血書提到話姜連15歲中學生都煽惑入會，行為可恥嗰單嘢囉。

除此之外，姜同「香港議會」仲呃左一個19歲女仔幫「香港議會」拍宣傳片，個女仔本來都擔心會犯法，但氹佢落答嗰班人拍晒心口話唔犯法，最終累到個女仔被警察拉左，「煽動」罪成被判囚1年。呢啲人被警察拉左之後，無論係「建國聯」定「香港議會」嘅人都冇幫過佢地，根本由頭到尾只當佢哋係件工具，用完即棄。

至於「香港議會」嘅搞手「袁X夷」，雖然佢自己都係大神棍，但就自命上等人，一直都睇唔起「姜+偉」，不過因為呢個「議會」講咗幾年都搵唔夠人參選，係得「姜+偉」喺台灣掹咗幾個人撐佢場，所以焗住俾佢入局，之後，俾「姜+偉」睇通呢個「議會」根本就係空殼公司，淨係收獻金，全無運作，「姜+偉」於是自封「議長」，不過留意返，「袁X夷」由頭到尾都冇正式認可過，而當「姜+偉」想參與管理「議會」嘅銀行戶口，「袁X夷」拖足佢一年都話銀行加唔到佢個名落去，咁荒謬嘅理由都講得出，大家就明白「袁X夷」由始至終當佢係小丑。

講番森仔封血書，封信爆咗「姜+偉」嘅無恥行徑出嚟之後，其他亂港分子就爭相跳出來「抽水」讉責。竄逃台灣省嘅通緝犯湯X雄，急不及待公開森仔封血書大罵姜邪惡；曾因「35+顛覆」案入獄嘅王X羽亦湊熱鬧，怒斥姜「食人血饅頭」。

不過，網民眼睛係雪亮嘅，網民隨即揭穿湯X雄本人亦係「眾籌達人」，佢當年為自己單暴動案眾籌訴訟費，籌到200萬，事後獲發還75%訟費，但筆錢去咗邊就從來冇交代；湯竄逃台灣之後又搞咗個所謂「香港虛擬抗爭博物館」，繼續叫人「課金」支持，一個連實體租金都慳返嘅「虛擬」博物館都要掠水，湯指責姜一事簡直係「神棍罵神棍」，五十步笑百步！

啲黃人昔日口口聲聲話要「齊上齊落」，如今點解喺度互相撕咬？高人分析話有兩個原因，第一，呢班走佬去海外嘅人其實好焦慮，本身以為去到外國或者台灣省有當地政府、政客等「民主大佬」照住，以為自己去咗烏托邦可以呼吸自由嘅空氣、享受無盡嘅待遇，點知，美西各國近年不斷收緊移民政策，睇住有啲「手足」申請居留失敗，落得被捕、被驅逐出境嘅下場，你話呢班通緝犯點會唔腳都震晒？所以佢地為咗得到「主子」嘅寵幸，就各出「奇」謀，愈嚟愈癲，務求煽動在港嘅「手足」衝出嚟做犯法嘢，被警察拉埋仲好，可以引起國際關注，乘機唱衰特區政府，咁就可以向「主子」證明佢地做到嘢、有價值，但同行如敵國，所以佢地咪為咗爭寵互相撕咬囉。

第二，就同外力閂水喉有關，美角政府近年為咗俄烏、中東戰事疲於奔命，為集中資源應對國際戰事同解決國內嚴峻的經濟內政問題，美角國際開發署(USAID)同國家民主基金會(NED)早前已經停咗對外援助，一眾海外分子冇咗水源，彈盡糧絕，所以爭崩頭搵食。

「姜+偉」同湯X雄互相撕咬就係個好例子，踩低對家就係想吸納對家啲Patreon付費讀者，將對家嘅粉絲轉化成自己嘅支持者，第日搞眾籌呃錢時就有多啲水魚捐錢俾自己，總之講到尾，都係為自身利益，想呃多啲「手足」錢。

事實上，翻開呢班亂港分子嘅劣跡往事，簡直係《詐騙百科全書》。佢地巧立名目眾籌呃錢嘅伎倆，可謂層出不窮，花樣百出。例如由「指明潛逃者」蔡X達同霍X誌搞嘅Youtube頻道「星期二得盜」，黑暴當年就用「幫中五學生健仔等4個被通緝人士潛逃」嘅名義發起眾籌，籌到過千萬之後，再向健仔4人收咗55萬「偷渡費」。結果呢？潛逃計劃「爛尾」，4人被捕入獄，蔡X達同霍X誌拒絕交代千萬捐款嘅去向，好明顯係掠完水喺海外風流快活！又例如積極支持暴徒嘅「好鄰居教會」創辦人陳X興，黑暴期間佢用唔同名目眾籌，籌到2700萬，但對外公布話得890萬，被指私吞1800萬，警方一介入調查，佢同佢老婆就即刻竄逃英角，仲開咗個「英倫好鄰社教會」，又繼續用支援黑暴、烏克蘭等各種名目搞眾籌，最終到2024年俾當地教友指財政混亂，多間分會相繼停運。

呢班竄逃海外嘅亂港分子不嬲都卑鄙無恥，今次森仔封血書，正正係用佢自己經歷話俾所有人聽，呢班人打住追求公義嘅旗號「叫人衝、自己鬆」，為圖私利食盡人血饅頭，當「手足」係傻仔、係水魚、係炮灰。所以大家必須提醒身邊人擦亮眼睛，切勿被亂港分子蒙騙，以免墮入「政治雞棚」大騙局，自毀前途。

鍾情局●零零發