陳奕迅破天荒進駐演藝學院 26場現場錄音邀歌迷見證經典重生

陳奕迅（Eason）又有破天荒新搞作！繼去年完成大型世界巡演後，Eason暫時唔返紅館，唔去啟德，反而選擇進駐香港演藝學院，今日（10月16日）宣布由今年12月至明年2月舉行一連26場《McDonald’s Presents: Recording Sessions with Mr. Eason Chan 與陳奕迅一起錄音》。這26場並非一般演唱會，而係Eason策劃了一個香港樂壇史無前例的大型唱片重錄工程！他決定將錄音室搬上舞台，重新演繹多年來嘅經典唱片，更首次以現場公開錄音形式，邀請歌迷親身參與，見證經典歌曲重新誕生！

陳奕迅（Eason）宣布由今年12月至明年2月，假香港演藝學院舉行一連26場《Recording Sessions with Mr. Eason Chan》，將錄音室搬上舞台，重新演繹多年經典唱片，並首次以現場公開錄音形式邀歌迷參與。

挑戰自己！重唱當年的陳奕迅
自1996年推出首張同名專輯《陳奕迅》至今，Eason踏入樂壇30周年，多年來推出無數經典作品。今次他竟然決定向自己發起挑戰，將昔日錄製過嘅唱片重新唱一次！

由早年《與我常在》、《我的快樂時代》、《天佑愛人》、《Shall We Dance? Shall We Talk!》，到《The Easy Ride》、《Special Thanks To…》、《黑・白・灰》、《U87》、《What's Going On...?》、《Listen To Eason Chan》、《H3M》、《上五樓的快活》等，不同年代、不同語言嘅作品，都將成為今次重錄工程嘅重要部分，部分場次更會結合多張專輯內容，讓觀眾沿着Eason多年來嘅音樂足跡，重新感受不同階段嘅陳奕迅。

對Eason本人來說，今次發起自我挑戰，最難嘅對手，正正是當年的自己。有些歌，當年只錄過一次；有些情感，只有當時嘅年紀先唱得出來。相隔多年，人生經歷不同了，聲音也不同了。當年的陳奕迅，遇上今天的陳奕迅，同一首歌會有甚麼變化？今次，Eason決定用26場現場錄音，邀請大家跟他一起尋找答案。

陳奕迅IG圖片

陳奕迅IG圖片

歌迷唔止聽歌 仲可以身歷錄音過程
是次演出最特別之處，歌迷破天荒可近距離欣賞Eason重新演繹經典作品，親眼見證Eason錄製唱片嘅過程。演唱之外，中場他亦會分享歷年唱片嘅創作點滴、錄音回憶，以及歌曲背後鮮為人知嘅故事。
對陪伴Eason成長多年嘅歌迷而言，可能當年聽《與我常在》時仍然讀緊書，聽《Shall We Talk》時剛剛踏入社會，聽《U87》時又正經歷人生另一階段。這次重新聽他錄歌，不單Eason重遇不同年代嘅陳奕迅，歌迷亦同步於現場重遇當年的自己。

陳奕迅IG圖片

破天荒錄音規矩 手機封存、錄音時唔准拍手！
由於是正式唱片錄音，是次觀眾入場亦要遵守一套有別於一般演唱會嘅特別規矩。首先，所有觀眾進場前必須將手機關機，放入大會提供嘅專用封存裝置，演出期間不得使用。場內亦全面禁止拍照、錄音及錄影。

最特別嘅係，平日演唱會聽到興奮時，歌迷自然會拍手、尖叫、歡呼，但今次大家要忍一忍！為確保錄音質素，Eason演唱及錄音期間，觀眾必須保持安靜，不可隨意拍手、歡呼或交談，只有在大會或Eason示意嘅指定時段，才可盡情表達興奮心情。換句話說，今次入場嘅歌迷，除咗係觀眾，某程度上更係錄音工程嘅參與者。

每場演出約100分鐘，分上下兩部分，中場休息15分鐘。觀眾最後入場時間為晚上8時正，遲到人士須按照工作人員指示，於指定時間方可進場，以免影響錄音。

公開發售為了讓歌迷可以盡量公平搶飛，會由Cityline處理登記抽籤形式發售，詳情將於Cityline網上公佈。要撲飛歌迷務必緊密留意登記及抽籤日期。

陳奕迅IG圖片

26場橫跨三個月 將音樂重新留低
《McDonald’s Presents: Recording Sessions with Mr. Eason Chan》將於2026年12月12日正式揭幕，26場演出橫跨三個月，至2027年2月20日結束。

完成錄音後，作品將輯錄成全新唱片，讓未能親身入場嘅樂迷，亦有機會聽到這次重新錄製嘅經典作品。

一首歌可以陪伴一個人好多年，一張唱片甚至可以記錄一個年代。

門票以Cityline登記抽籤形式發售，10月28日起登記。

演出資訊
節目名稱： McDonald’s Presents: Recording Sessions with Mr. Eason Chan
地點： 香港演藝學院歌劇院
演出場次： 共26場
演出日期：
2026年12月：12、13、16、17、19、20、23、24、26、27日（10場）
2027年1月：6、7、9、10、23、24、27、28、30、31日（10場）
2027年2月：12、13、16、17、19、20日（6場）
演出長度： 約100分鐘，分上下兩部分，中場休息15分鐘。
特別安排： 全場禁止拍照、錄音及錄影；手機須關機及封存；正式錄音期間，觀眾須保持安靜，按指定時段拍手或歡呼。

Cityline網上登記抽籤購票詳情：
網上登記抽籤：2026年10月28日上午11時 至 10月29日晚上11時59分
首輪中籤公佈：2026年11月2日起
首輪中籤購票：2026年11月5日上午11時 至 晚上11時59分
次輪中籤公佈：2026年11月6日起
次輪中籤購票：2026年11月9日下午3時 至 晚上11時59分

由神燈娛樂有限公司（DREAM）主辦、FWD富衛保險冠名贊助，一連三晚假紅磡香港體育館隆重舉行的《FWD富衛保險呈獻：許志安 Andy Hui〈On Stage〉Live in Concert 2026》，昨晚（10月8日）揭開序幕。這次演唱會對許志安（安仔）來說意義重大，不但是他相隔11年後再度踏上紅館舞台，更是他入行40週年的重要里程碑。今次個唱安仔以最純粹的音樂為主題，舞台設計別具心思：三面台巧妙融入了「家」的溫馨感，並配以兩條延伸舞台，旨在拉近與同行多年樂迷的距離，以近距離握手回饋大家四十載的同行與支持。

許志安闊別11年再踏紅館，《On Stage》演唱會昨晚（8日）揭開序幕。

他身穿Deep V西裝晒胸肌登場，以《Remember Me》揭幕，感性多謝觀眾支持。

演唱會甫開場，安仔身穿一身吸睛的Deep V黑色西裝、展露精實胸肌型格登場。他站在緩緩升起的舞台上，悅耳動聽唱出《Remember Me》，為11年後重回紅館舞台揭開序幕。緊接的《雨後陽光》及《向全世界說愛你》亦瞬間點燃全場氣氛，不少樂迷已跟著唱。

完成開場演後出，安仔帶著感動與全場觀眾打招呼：「大家好嗎？首先，我要喺度再一次衷心多謝今晚入場嘅每一位。多謝你哋支持我、承傳咗我一個好耐嘅美夢。我唔知道可以用咩說話去形容，但我真係衷心多謝你哋每一個人、每一位朋友。」提及上一次個人演唱會已是2015年，安仔感性表示：「我好掛住你哋。我覺得11年之後，我哋喺同一個地方唱歌，可能啲歌大家都聽過，我哋雖然老咗11年，但我哋嘅回憶、我哋嘅記憶係從來冇變。所以希望今晚揀選嘅歌，可以帶畀你哋一個美好嘅集體回憶，希望大家有一個溫馨嘅晚上，希望你哋Enjoy！」

頭場嘉賓陳奕迅登場，兩人手拖手合唱《從沒這麼愛過+幸福摩天輪》。

其後，大螢幕在《半天假》及《世紀末煙花》的旋律下變幻襯托。緊接著，在鋼琴與中提琴的幽美伴奏下，安仔深情演繹《爛泥》及《心靈相通》；後續更在長笛、洞簫、Joey Tang 的結他以及色士風等樂器的伴奏下，帶來《徒然》、《心血》及《男人最痛》，展現完美的歌唱實力。緊接迎來是勁歌熱舞環節，安仔帶來三首快歌。其間更脫去外套、僅穿貼身小背心露出結實的麒麟臂和胸肌，落力跳唱《學行》及《反正經》，引來全場尖叫。

隨後舞台氣氛一轉，大螢幕播出安仔深夜在家中看書的照片，文字帶出思緒會一幕幕浮現，並配有他擁著媽媽及已離世愛犬 Lucky 的照片，文字續寫道：「人生總會經歷令你痛的事情，但總會有一抹暖意、總是會有那個人，陪著你重回到日常。或許一切的終點，都能再次看到旭日的陽光。」現場隨之響起《戀愛片段》與《一步一生》的旋律。

Eason大讚安仔是他心中Top 3，又憶述當年目睹安仔錄音深受影響。

至於頭場最大驚喜，莫過於邀請了同屬「華星年代」出身的陳奕迅（Eason）擔任嘉賓。兩人手拖手世紀合唱經典組曲《從沒這麼愛戀過 + 幸福摩天輪》，夢幻聯乘讓全場陷入瘋狂。唱畢後，Eason 發揮「吹神」本色回憶往事，大讚安仔：「剛才喺間房仔（等待升上台）聽你唱歌，好似聽緊 Hi-Fi，老實講唔係客氣說話。喺我入行前，你一路都冇跌出過我心中嘅 Top 3！自己未出碟前，有幸喺佐敦錄音室目睹安仔錄製經典大碟《男人最痛》。當時以為錄音要花很長時間，結果只係入去個多鐘頭就完工。安仔當時話因為『有 Feel』，呢句影響令我明白唱歌最緊要有 Feel。」Eason 還現場強力推介了該專輯中他最愛的遺珠歌曲《下次》。安仔聽後笑回：「唔好講到我咁懶啦？」Eason 連忙解釋：「唔係懶！你錄完嗰隻歌，我好推介畀大家聽，呢首歌叫《下次》，真係好有 Feel。」

二人現場又互贈高帽，安仔直言 Eason 是他非常欣賞的歌手：「佢一應承做我嘉賓，就話想唱我嘅《從沒這麼愛戀過》。」Eason 聞言笑說：「我講錯咗少少，唔係講錯歌名，係講錯話第一隻買你嘅碟，其實應該係1993年嘅《喜歡你是你》。（安仔問：當時讀緊書？）係呀讀緊書，當年隻碟好難買，我有一隻，好正！真係好神奇，依家我變咗你朋友，仲有嗰班（指著台下觀眾）都係。」安仔接着打趣道：「同 Eason 一齊，你想講嘢嘅時候佢會 Stop 你，跟住他會繼續表達佢心裏面嘅說話。」最後兩人深情擁抱，Eason 預祝道：「我預祝你跟住落嚟呢幾 Part，同埋呢兩晚都好好享受。你 Enjoy，我哋做樂迷觀眾嘅就會好 Enjoy。」安仔親了 Eason 臉頰一下，Eason 則以飛吻回禮，兄弟情不言而喻。

安仔唱到《一千次日落》時感觸落淚。

Eason 落台後，安仔在舞台的小屋及小屋天台情深演繹《今年沒聖誕》及《苦中作樂》。舞台接著轉入 Medley 勁歌熱舞環節，安仔走到兩邊延伸台，在與觀眾「一手可及」的超近距離下，與十多位舞者熱力全開，觀眾 High 爆全體起立。緊接著是萬人大合唱環節，安仔笑言有些歌在K房經常聽到大家唱，今晚很想同大家合唱，全場隨即對唱了《會過去的》及《二人行一日後》。大螢幕更捕捉到前來捧場的好友，包括梁漢文、蘇永康、張衛健、周柏豪、車婉婉、胡杏兒、衛蘭、泳兒及鍾舒漫等，齊齊在台下跟著唱。

到了演唱會尾聲，安仔再次與大家分享：「今晚最後一首歌，我好鍾意呢首歌，因為佢好似係一個結束，但亦係一個開始。希望今晚可以帶畀大家一個美好回憶。」隨後唱出《一千次日落》。

觀眾兩度Encore，他即興獻唱《一家一減你》及《星河感覺》。

時隔11年再踏紅館，觀眾的熱情依舊不減，首首歌曲皆全場大合唱。這份震撼讓安仔忍不住邊唱邊流下男兒淚，感性與首場觀眾作別。怎料他剛落台、除下耳機，便聽到全場此起彼落、震耳欲聾的 Encore 聲。滿滿熱情令安仔決定再度折返上台，感動地說：「點解你哋未走嘅？我冇準備到歌⋯⋯鼻涕都未抹完，多謝你哋，真係好感動！」

安仔即興送上《一家一減你》及《星河感覺》兩首歌曲，全場觀眾築起閃爍燈海，將紅館化作一片淚光與星海。在每一位觀眾、每一顆光芒的陪伴下，安仔再度眼濕濕，為首場演唱會劃下極盡感人與完美的句號。

全場燈海陪伴下為首場畫上感人句號。