Skip to Content Facebook Feature Image

皮褸黃,今次著草都唔掂

博客文章

博客文章

博客文章

皮褸黃,今次著草都唔掂

2026年11月22日 12:51

美國AI只有神話、冇理性繁榮,你以為靠矽谷天才撐起?靠英偉達芯片贏盡天下?拜託,只係靠一個人托住——黃仁勳是也,故事有點曲折,真的要搵AI幫幫手至掂,好,馬上去片!

黃仁勳,真係好叻仔,點只CEO咁簡單︰一、過去三年,英偉達做嘅事早已經超出芯片廠範疇,美股分析師指,英偉達地位有如中央銀行;科學界人士講得更白︰英偉達勁過央行啦—— 先投資 AI 公司,AI 公司再用呢筆錢買英偉達產品,如是者,創建出一個所謂「循環融資」;二、「英偉達AI央行」規模幾大?傳媒估計:英偉達喺 AI 領域嘅承諾超過 7500 億美元,包括 2026年單年 400 億美元股權投資(約 300 億投 OpenAI)、為 OpenAI 俄亥俄數據中心提供最高2500 億美元融資擔保,還有3500 億美元芯片融資協議在談判中;三、據悉,今年8月黃仁勳拉埋貝萊德、黑石、Brookfield、Apollo、高盛、KKR 六間巨頭,搞一個5000億美元嘅芯片融資證券化平台。

人細皮褸大,尷尬。AI時事漫畫

人細皮褸大,尷尬。AI時事漫畫

《華爾街日報》上周發表調查報導,指英偉達「系統性」向人工智能新創公司提供資金,條件是他們必須將所得款項用於購買 NVIDIA GPU 並建設數據中心。這個閉環邏輯很簡單:英偉達出資→新創公司購買GPU→ GPU 需求數字上升→ 英偉達的估值節節上升。關鍵係英偉達一如《華日》所指的話,AI背後的繁榮絕非正行正路得來,是因為有「美麗的誤導」造成的——事關市場成日盯著GPU需求數字,其實這不代表買家真實意願,係一條由英偉達播種、用英偉達自己嘅 GPU 做抵押、最後又流返英偉達口袋嘅資金迴路。

美國AI整套煉金術,繫於那位穿黑皮褸的男人身上,當皮褸被公眾「脫掉」,黃仁勳個人信譽盡毀之餘,資金迴路休克斷鏈,你話會點?想想美國經濟前景、想想矽谷和華爾街,想想黃仁勳背後的狙擊手、想想總統特朗普,可會笑得出聲嗎?

黃仁勳11月12日辭任,該星期英偉達股價暴跌逾兩成,比起10 月 6日歷史高位跌近一半。最恐怖嘅唔係股價,係信用。英偉達早前周圍放水,債市信得過佢,仲會問一句︰「黃老闆,你夠使唔夠呀?」Fortune雜誌近日報導,債市已經唔再信「英偉達包底」呢個神話。摩根士丹利預計 2026 年全球 AI 相關債務發行接近 5700 億美元,係去年兩倍以上;而全球 AI 融資額今年三季連環下跌,這不是AI波動,係AI退潮!

今時今日,唔好再講「借唔借?還得起先好借」的溫言,事到如今是「淋紅油」階段,標普 500約有42家AI企業,美國人消費信心同退休金,好大程度綁喺呢 42 隻股票身上。嘆一句︰「AI 唔止係產業,已經成為美國資產負債表」。黃仁勳一走,馬上地震,唔係同你講笑:股價跌 → 財富縮 → 消費弱 → 稅收減 → 財政更緊 ,聯儲局唔敢加息、唔敢收水,美國經濟泡沫更難消。

唔係美國百業蕭條,至少美國政界當旺,狙擊與攔阻AI產業成為正業,表現一枝獨秀可期,與此同時,歐洲剛才收歛的街頭風暴,現在向大西洋彼岸燎過去…..




黃秉華

** 博客文章文責自負,不代表本公司立場 **

「一連打上五十下,打得宋江一佛出世,二佛涅槃,皮開肉綻,鮮血淋漓。」——《水滸傳》第三十九回,宋江在江州因醉後題反詩被知府拘捕,嚴刑拷問。

老黃事件遠未退潮,世人目睹的是,刻下主人翁慘過宋江——道德私刑隊由美西方兩大主流媒體領銜行動,黃仁勳有通「共諜」之嫌,有誰救得他出生天?似乎,我聽到一點聲音,看官,幫幫眼睇下係定唔係。

「中國不是美國,也不會成為另一個美國。」——11月13日王毅會見美方政黨對話又重提這番話,時值美國AI大混亂,評論認為有微言大義之處︰美國媒體與官員把商業接觸、芯片流向和疑似情報活動連在一起,更有甚者,要把「與中國有業務往來」推向「替中國做事」的地步。外交部否認相關間諜指控;截至目前,方方面面仍未證實黃仁勳或英偉達機密遭竊,調查與指控不能當成定案。可是黃仁勳已被打成一個宋江,遍體鱗傷,吓哇?

老黃淡定有錢剩。AI時事漫畫

老黃淡定有錢剩。AI時事漫畫

2020年7月9日,王毅向中美智庫媒體視頻論壇發表致辭,外交部以題為〈王毅:中國不會也不可能變成另一個美國〉作出報導,時值美國對華科技制裁升級、華為、海康威視等20家中國企業列為「軍方擁有或控制」企業。是年,中美陷入「新冷戰」高潮,隨後,時任國務卿蓬佩奧變本加厲,發表演說,宣告美國對華「接觸政策」失敗,呼籲自由世界聯手促使中國改變。

結果?事實證明美國對華戰略長期誤判。王毅今天的話可解讀為三層意義︰1. 中國無意取代美國、不爭世界領袖位置;2. 中國不照搬美國內部制度、也不外輸自己模式;3. 世界190多國共存,不應該由兩個大國「共治」,即是話——中國唔會複製西方帝國大國爭霸的舊戲碼。

美國對華封鎖芯片、AI 管制核心論據,係「中國強大後會走美國當年嘅霸權路線,威脅美國領先地位」。箇中含義:就算中國 AI、芯片產業做大做強,都唔會複製美國「靠芯片武器化、脅迫他國、劃科技陣營」的橫強模式;美國民主共和黨爭,爭到政治思覺失調,何也,如是者美國不再係大家熟悉嘅美國,它將商業技術競爭當成國安對抗,如是者,連底層邏輯都錯晒。「中國不會成為另一個美國」反面意思,就係:「美國而家點樣對待外國、對待自家企業家、點樣用情報同輿論武器,中國唔會照抄。」恕我直白補充,中國不會因為競爭對手就掀起錯亂行動,如獵巫、道德私刑,搞到不分民間商業合作同意識形態敵對,一於見人就砌,見位就入,何止不顧別國利益,美國利益都可以擺在後面。

最叻係有幾理智又保持過人智慧的馬斯克,老黃未正式辭職前,已經擺好個局——X 帳號 ZeroHedge 出帖叫馬斯克:「Elon,請聘用 Jensen」馬斯克回覆: That would be an honor。幾日之後,馬老闆繼續抽水,再補多句:「簽名支持請願,希望黃仁勳歸位英偉達」。最有戲嘅地方,一邊話請老黃過來係榮幸,一邊又撐佢留返原公司。一句到尾︰你玩晒啦!

矽谷從來唔會係慈善機構,馬斯克難道會學梁山好漢劫法場,救宋江出來?安啦,黃仁勳想通想透,都唔會再相信美國,走去台灣當上梁山有冇得諗?我讀得書少,暫時答你唔到。一笑。