今年進入踏春季節，神州大地好似特別多風吹，多名的退休常委頻頻在新媒體和社交網站上出現，其中以前國家主席胡錦濤的消息最詳盡，由湖南遊到貴州，仲有上屆常委吳邦國、賈慶林、李長春，內地網站有圖文講講他們露面的消息。前國家主席江澤民就特別，他遊上海、揚州的消息就由海外媒體出口轉內銷方式曝光。
而兩位前總理的「露面」方式就轉折啲，話說卡塔爾國際能源獎基金會頒個終身成就獎給溫總，由中國駐當地大使代表上台領獎，溫家寶有份答辭，內容就幾官式講吓中國同卡塔爾關係。
另一位前總理朱鎔基的「登場」亦有少少特別，前日清華大學經濟管理學院舉辦建院30周年活動，經管學院網站就登咗篇《首任院長朱鎔基致信祝賀清華經管學院建院30周年》的文章，講到朱對經管學院發展深感欣慰外，還深情講到：「作為一個清華人，我的心永遠和你們在一起！」
朱鎔基2011年出席清華百年校慶(網上圖片)
本來朱老闆(毛拍手始終覺得呢個稱號好稱朱鐵面)寫封信祝自己的Baby(朱係首任院長)30歲生日，係平常事，但有海外媒體就報道，呢則新聞發布日期是3月6日，但慶祝活動就在前日，懷疑其中有小動作刻意等朱老闆「露面」。
不同解讀同猜想一轉發得多，無嘢都會變有嘢，今日內地各大網站即刻轉條新聞，話朱老闆原定前日參加慶祝活動，但身體不適，不能前往，只能托校長向同學問候。
毛拍手收到獨家風，朱老闆近日患感冒，已經無事好番，但醫生叫多休息，老人家緊遵醫生的話，所以無去到經管學院的校慶活動。消息仲話封信就係4月26日果封，並不是什麼3月寫定已發布，昨日曝光內容主要集中講朱老闆對經管學院的祝福和期望，估唔到出街後有人有太有聯想，封信其實亦有講到因不適未出席慶典，身邊人主動澄清，就是費事大家瞎猜。咁又係，外界諗多咗亂估就無謂啦！
查實近期神州大地那麼多風聲，咁多前領導人周圍去，你話正常，其實他們年年如是，踏入春天出去行行，你話唔正常，社交媒體今年又真係報得比往年多一些，不過，最矚目的人，包括周永康就未有露面喇，又用那句「你懂的」啦。
毛拍手
** 博客文章文責自負,不代表本公司立場 **
呢輪神州大地政局，真係睇到人眼都唔眨，人民日報海外版的官方網站《海外網》有個專欄叫「學習小組」，不時都會解讀習主席對為官為人的一些看法，本來大家都冇特別留意呢個專欄，但今日就引來內地各大網站轉發「學習小組」的文章，實在引人多聯想。
先睇呢篇文章個題：【學習小組】習近平談秘書工作：別認為靠山硬就有恃無恐
毛拍手睇完個題，成個人醒一醒，內地官場有邊個唔知「秘書幫」呢個名詞，文章登出習主席1990年同地縣辦公室幹部談心的講話，本來個題係「秘書工作的風範」，翻查資料那時習主席應該係福建地方工作，本來呢篇文章都唔會太引起關注，奇就奇在，【學習小組】加咗幾段導讀：
「以海南省前副省長冀文林為代表，“你懂的”的秘書幫，在中紀委的幫助下“紛紛上了頭條”。」
「在中國，當過秘書的高官為數不少，包括最高領導人習近平在內。習近平當過秘書，也用過幾任秘書，現在更有一個精幹的秘書班子為其服務。他對秘書工作的風範，有過長篇論述，可謂每句都是實在話，都是肺腑之言。」
「習近平尤其提到，“（秘書）不能認為‘機關牌子大、領導靠山硬’而有所依仗、有恃無恐，更不允許濫用領導和辦公室的名義謀取個人私利。”“要克服優越感，堅決防止對基層幹部群眾盛氣淩人、態度傲慢、頤指氣使、發號施令的現象。”這些話，冀文林等“秘書幫”早聽到，早領會，何至於有今天？」
「另外，習近平這篇談話，對於初入行當秘書的人來說，有極強的參考學習價值。領會好，才能進步快，又不走邪路。」
《海外網》呢篇文章劈頭第一句就以過完春節後被帶走調查的前海南省副省長冀文林做引子，係人都知冀文林係已被調查的油老虎(周永康)的舊部，喺油老虎身邊足足做咗十年秘書，搵冀文林舉例，唔知係咪回應外傳油老虎單案議而未決呢。
文章除咗加咗一段讀導，【學習小組】仲幫呢篇分享起咗個題，叫：《習近平談秘書工作：別認為靠山硬就有恃無恐》，睇過題，呢篇文章唔似只係講已經出事的秘書們，咁就真係嗒落有味喇，到底而家引番篇舊文，係提醒一啲秘書出身，又位高權重的人，定係針對啲靠山呢？
至於習主席篇原文都幾長，唔成篇引喇，有興趣去以下網址睇啦：
http://opinion.haiwainet.cn/n/2014/0424/c456318-20566048.html
