有網民大歎月入一萬元，住唔到公屋，生不如死。我雖然好支持香港價值，認為只要努力工作，始終有出頭天。但睇見本地樓價房租貴成咁，這一兩年再來個百物騰貴，本地打工仔要自食其力，認真唔易。
年青人除非可以忍受擠逼，與父母同住，或者唔怕住在好偏遠地區，挨長途跋涉之苦，否則月入萬元，要搬出來市區住近返工地點，真係談何容易。現時，在灣仔租間劏房，唔夠100呎，只夠一人居住，都要5000元，交了租，已經花掉了人工的一半。加上日常的衣食行使費，真係月月清。叫他們捱辛苦點高點人工嗎？好多後生打工仔都未必想，因為入息高了，就會喪失申請公屋的資格。維持低薪等上公屋，成為人生主要希望。
本來，香港的公屋就是要照顧這些低收入市民，但他們即使符合資格，輪候的時間也很長。最新的審計報告指出，由於公屋供應量不足，加上輪候人數增加，未來一般家庭申請人的輪候期將由之前估計的3年延長至5年。單身人士可以上樓的時間，更係遙遙無期。
香港的樓價高、租金貴，受影響的其實不限於低收入階層，連高薪厚職、比較富裕的中產，亦受到影響。我最近與一個政府處長級高官聊天。言談間，佢猛呻現時年輕人住屋難，話佢的仔女都頂唔順。我的O晒咀話，低收入階層就肯定上樓難啫，但你咁高薪，幫個仔搞掂都得啦！
高官話最近行經銅鑼灣，見有新樓盤展銷，進去睇睇，播條片話個港島東的樓盤毗美曼克頓，睇睇示範單位，一間600、700呎樓，實用面積頂多500呎，一廳兩房，窗台大大，餐枱貼埋窗台去借位，個廳面積多大可想而知，竟然索價1000萬元！即使佢幫細路俾300萬首期，兒子仍要供700萬元。襟襟計數機，即使當利息唔升（其實唔會），只有3厘，供30年，每月供款就要29500元。就算個仔同老婆，公一份婆一份，一半人工就用晒嚟供樓，而且一縛就係30年，套用柴九嘅名句，人生能有幾多個30年？供到50幾，點頂？
連這樣高收入人士，都為子女住屋問題慨歎，基層可想而知。子女買唔起私樓，即使勉強買到，未來的生活質素都會好差。低收入的年輕人又住唔到公屋，年輕一代對前景睇唔到希望，怨氣咁大，香港遲早出事。香港落得如斯境地，問題的癥結在於政府搵唔到地起公屋，其中一個限制係唔可以填海。
在維港內填海的確唔好，但如果政府能夠在維港以外大量填海，大幅增加土地供應，即使解決唔到這兩三年的問題，但在8年、10年後情況可以改善，那些反對填海造地的人士，真係要俾條生路後生仔行吓啦。
盧永雄
為期五個月的政改第一期諮詢，已進入尾聲，政府的「政改三人組」近日頻頻亮相，大有謝幕味道。昨日政務司司長林鄭同政制及內地事務局局長譚志源在不同場合講政改，都用咗不同的金句。
譚志源用「通往天堂嘅路係窄嘅」嚟形容政改道路難行。雖然口氣輕鬆，但亦唔係樂觀的態度。佢始終採取「專揀好嘢講」的策略，話討論中的方案愈來愈多回到基本法的基礎上，佢以大律師公會提交的意見書為例，話大律師公會都認為「公民提名」或「政黨提名」都唔符合基本法，有料到、有參考價值，對政府往後推政改，好有幫助咁話。
林鄭就相對比較嚴肅同認真啦，佢話各個政黨、各個陣營的立場仍是南轅北轍，距離達成共識，仍然是長路漫漫。又話搵立法會支持，「有商有量」的宣傳口號，已經沒有作用，或許仍有點效力的可能是「俾條路嚟行吓得唔得呀？」聽落都好無奈也。
我與一位熟知政改動向的高官私底下傾起，佢對政改能達成共識的前景睇得比較淡，話做咗咁多場諮詢，搞唔掂都唔好話我地啦！我估佢並不是控制期望，而是不敢有太大期望，佢感受到泛民派與阿爺同建制派的分歧好大，大纜都扯唔埋，對彼此能夠達成共識，一點也不樂觀。
而家傳聞政府開展下一輪諮詢前，阿爺會先就政改問題表達立場，包括最關鍵的提名委員會如何按民主程序提名問題表態，這裏拆開有兩個敏感點，照阿爺現在的路向，首先係否決公民提名，然後會要求提委會過半數選出候選人。若然阿爺在8月翻出這兩隻底牌，可以預想泛民主派會馬上起哄，佔中即刻開動。
阿爺的傾向是如此，但不一定會如此，關鍵是泛民會不會和阿爺實質地討價還價，高官睇淡係估計這件事難以發生。但如果對歷史稍有了解，就知道阿爺雖然態度好強硬，但同時又好有彈性。在93年開始中國和英國曾進行十多輪香港政制談判，幕後由港督彭定康對港澳辦主任魯平，談判失敗後，魯平批評彭定康為千古罪人，但根據事後披露出來的多封外交函件，雙方的分歧一度拉到好近，兩邊都有較大彈性，可惜最後仍然拉倒了。
如今雙方就在談判或反枱的十字路口上，未知何去何從。
盧永雄
