政府放寬雙倍印花稅「樓換樓」期限。地產代理業老闆級人馬話，政府或對樓市有新評估，可能有意「撤招」咁話。
先講番少少政府做了什麼，政府今次可以話微調樓市辣招，主要是放寬豁免換樓客的六個月內換樓可免雙倍交稅，特別是在購買樓花方面，政府將六個月換樓計算期限，由現時買樓花就開始計，改為等到入伙收樓時才起計。
在政府現行的辣招下，為享受豁免，若你是換樓客買入新樓樓花，佢一年後先至入伙，你都要半年內先沽住緊的二手樓，以符合半年內換樓可以不用交雙倍印花稅的規定，搞到換樓人士極不方便，要麼不買新樓樓花，否則買了樓花急急售出自住舊樓後，可能要租屋住一段時間，才等到新樓入伙。政府新安排免卻買樓花的換樓客的麻煩，可以說稍稍鼓勵換樓人士買一手樓花。
但說到政府對樓市有新評估，可能撤招云云，就難免有少少作大。我怕有市民聽完後幻想政府好快撤招，以為撤招後樓市會急升，馬上走去盲搶樓，最後等極都等唔到撤招先知撞板。
政策是政府官員定的，他們做事有政治考慮，要照顧市民的情緒，在如今充份就業的社會，沒有失業問題，樓價太高唔係主要問題之一。政府連出辣招後，樓市稍為回落，但又唔係跌太多，新界樓賣7000、8000元一呎的比比皆是，若然政府這樣「重新評估」之後就撤招，而家利息仍低，樓價實一枝箭咁標番上去，到時CY政府想唔下台都唔得咯。目前這種樓價，完全不具備撤辣招條件，根本諗都唔使諗。
我聽制訂樓市辣招的官員講過，曾經想為辣招制定「日落條款」，例如立法後三年自行日落撤消，但佢哋研判過有日落條款的辣招法例一定過唔到，最後決定放棄。當時已經話，辣招法例主要的問題是制訂了就好難撤，「樓價唔大跌三、五成都唔使諗」。乜而家跌咗三、五成咩?
你可能會問咁政府為何會微調政策? 可能原因有兩個，第一是法例提到立法會，工商界議員好反對，政府做樣都好，做啲讓步打吓底先。第二是微調後可以方便換樓，可以釋出一點二手貨源，也會加大少少新樓的吸引力，增加發展商沽貨意欲。政府起樓起唔切，搞活少少市場無壞喎。
盧永雄
政改第一階段諮詢過去，我試試向政府和阿爺兩面收風，暫時睇都係悲觀氣氛籠罩，烏雲蓋頂。
政府高官私下睇淡，認為阿爺同泛民大纜扯唔埋，阿爺堅持由提名委員會過半數提名特首候選人，泛民又由力挺公民提名的激進派當道，雙方可以話「九唔搭八」，好似一個講英文，一個講中文咁樣。佢地又話「提委會過半數方案」，好難好難在立法會夠票通過。
阿爺中人態度就甚硬，認為「提委會過半數方案」無甚讓步空間，但他們亦注意到在諮詢期內只有很少人支持這個由民建聯和工聯會提出的方案。按阿爺的設想，由提委會過半數提名候選人，將和中央對抗的人排拒出去，除了要防止未來特首抗中之外，主要想保障商界的利益，不想普選特首過份仇視商界，按理此方案應受商界大力支持才對。
但現實事與願違，只有中總和廠商會兩個商會支持「過半數方案」，其他商會唔係反對就係不清晰表態，而幾個商界政黨自由黨、經民聯、甚至新民黨都公開反對。以被視為較「聽話」的經民聯為例，主席梁君彥口頭話「過半數提名比較嚴苛，我們傾向不贊成。」阿爺懷疑商界這些反對「過半數方案」的意見，是受人鼓勵提出，甚至係政府官員支持佢哋出招？
這樣搞下來，個局就變得怪怪地啦，雖然阿爺打晒開口牌話支持「過半數方案」，但即使在最應該支持此方案的商界中，也只有中總和廠商會支持，它們其實等同在商界中的工聯會和民建聯，換言之除了自己友，無乜街客like。
還有更大問題是幾個商界政黨全部反對「過半數方案」，將來投票時亦唔易叫佢地轉軚，幾個商界黨大條道理話表過態返唔到轉頭之類。所以阿爺屬意呢個方案，唔止要拉五、六票遊離泛民支持，就連建制派的票亦都要拉。
「過半數方案」咁低支持度，含意只有一個，就係叫阿爺死咗條心，唔好諗住攞住呢個方案硬闖，暗中逼阿爺讓步，同泛民埋枱傾。政局微波，還存暗湧。
盧永雄
