鬍鬚曾唔似做陳太2.0 「這個游戲結束了」

鬍鬚曾參選時人氣大盛，政界中人八八卦卦，關心鬍鬚曾選後動向，例如會否做一個「陳太2.0」，如陳四萬一樣，到處奔波，狙擊政府。

政界有一個傳聞，話選舉後泛民大佬與鬍鬚曾接觸，希望他與泛民合作，利用他的人氣，做民間領袖咁話。傳聞鬍鬚曾回應話:「這個游戲結束了」，日後以家庭、個人生活為重。傳聞有幾成真唔知，但從鬍鬚曾選後的公開講話，的確有少少唔想再搞的味道。

鬍鬚曾的競選團隊在選舉期間以WhatsApp群組和傳媒聯絡，選戰後群組要收檔，鬍鬚曾在群組關閉前發表錄音留言，感謝傳媒追訪，話選前引用莎翁名句透露有意參選，敗選後改稱「to hea or not to hea，this is not really a question」(hea 或者唔hea，呢個唔係真正問題)。言下之意似乎係一定揀去hea。

佢又話中有話指出：「我諗我都會接受網民嘅提議，唔理三七廿一，先休息一段時間，同屋企人輕輕鬆鬆咁享受吓生活，真真正正咁hea吓」，可能會到太平山、獅子山行山，留言「大家有緣，江湖再見」。

另外鬍鬚曾又在facebook上載最後一輯「你問我答」，同網民話別，問及退休後去邊，佢話辭職後有一年「冷河期」，佢講笑話會搵勞工處幫手搵工。至於會否再次投入公共事務，佢話會認真考慮，希望大家緊貼他facebook上面的更新。

但鬍鬚曾講的「參與公共事務」，似乎唔係做「陳太2.0」，走去日日插林鄭，因為佢對林鄭的表態相當友善，在「你問我答」中，有一條問題問佢有乜嘢想同林鄭講，鬍鬚就話:「Carrie，我衷心祝福你當選行政長官。香港未來的路，絕對唔易行，修補社會撕裂係燃眉之急。相信你絕對係可以做到we connect，同香港人一齊拍住上。」

選舉之後，一場夢結束了。政壇八卦友話，選後鬍鬚曾還原本來的鬍鬚曾，對人溫柔友善，對林鄭不出惡言，這本身亦是修補社會撕裂的行為。想推他出來上街示威日日插政府隊阿爺，恐怕不是鬍鬚曾的本性了。

Ariel

** 博客文章文責自負,不代表本公司立場 **

林鄭當選特首之後，銳意提振民望，當選之後第一天不去中聯辦，似乎避免被人話她謝票，改為拜會行政、立法、司法機構，並落區見市民。

今日是林鄭當選後二日，她早上接受電台訪問時話，向立法會議員拉票，是特區政府官員的份內事，自己應要做好，不要假手於人，她不會叫中聯辦為她拉票。

當時她在節目中話，可能最快在下午禮節性拜訪中聯辦。但其後她又表示，今日未必能約到中聯辦，可能在今個星期內到訪中聯辦。

政壇八卦友話，林鄭想今天下午去中聯辦見曉明哥，結果約唔到，可能對方唔得閒，亦唔係話見就見。估唔到特首選完，呢啲政治新聞仲咁有花生味，無論如何，林鄭都好成功咁證明咗，佢唔係「CY2.0」了。