《星期二的攝影課｜Tuesday with Iris》

《星期二的攝影課｜Tuesday with Iris》
.
【黑白攝影：遺照 vs 時尚】
.
在剛過去的周未，我到社區中心，為小學生教授攝影課，課堂練習中，一位四年班的同學，用了黑白模式拍攝同學，就在他拍得不亦樂乎之際，旁邊同學童言無忌地說了一句：「嘩！黑白嘅，你做乜幫佢哋影遺照呀⋯⋯」黑白，等同遺照這個觀念，我以為只有上一輩又或者是古墓派的人才有這個想法。我真係無諗過，一位年僅9歲的小朋友，都會係咁諗⋯⋯究竟，點解會咁嘅呢？
.
其實，不只這位小朋友，在成人課堂上，我也遇過老、中、青這三代人也有這個觀念，認為黑白好「大吉利市」…… 如果影黑白就等同幫人影遺照，我想問吓，點解時裝界，又會有咁多黑白攝影作品？仲要每一幅作品都不知幾咁有型，幾咁時尚，幾咁永恆。
.
當我正在灣仔街頭苦苦思量的時候，眼前就突然出現 Scavullo Francesco（1921-2004）的作品，心諗「唔係呱～點解會咁㗎，點解零零舍舍有幅咁經典咁正嘅作品喺度㗎？」（flashback）第一次邂逅呢幅作品，是在2016年11月15日，位於深水埗《公和豆品廠》二樓店舖內，當時見到，驚為天人，估唔到《公和豆品廠》的牆身會掛著這幅攝人的 Art Piece，更加估唔到嘅係，事隔四個月，我會在灣仔再度重遇他。
.
這是Scavullo Francesco 1962年作品，當年，他帶著 model 來到香港，為時裝雜誌拍攝cover story，這張相片，紀錄了的不只是流行時尚，還有60年代香港的人文面貌。雖然這是55年的作品，今天重看，成件事不但沒有outdate，反而有一種永恆經典的感覺。
.
黑白攝影的真正魅力，在於將最美好的一瞬間，以最永恆方式，真摯又真實地留住。無論何時何地再觀看，依然相見如初般讓人著迷。「遺照」真正意義，與「時尚」所追求的美學其實同出一轍，同樣都是將自己最美好的花樣年華，真實而恆久地留住，讓人思念，莫失莫忘。
.
圖文：Iris Cheng
2017年4月4日

課程查詢｜www.FeminArt.hk
FB｜www.facebook.com/feminart

iris cheng

** 博客文章文責自負,不代表本公司立場 **

【Sigma dp2：瞬間拍出電影感】

在這個特別晴朗的星期二，為大家介紹一台冷門的相機《Sigma dp2》。

認識這台相機，是在一個清早的周日，在銅鑼灣隨處閒逛嘅時候，有個阿姐突然遞了一張宣傳單張給我，單張上是一間有型的樓上相機店，專賣二手 Leica 相機及鏡頭，好奇心駒使下，我就去咗朝聖⋯⋯當我正在counter 位置觀賞的時候，眼角「稍」到老闆身後位置的一個書櫃內，放置了一部設計獨特但又感覺低調的相機，老闆見我看到色瞇瞇，慷慨地拿給我看⋯⋯「呢部相機係 Sigma 出，我自己專登買嚟影 product shot用，呢部機好嘢嚟㗎，超高畫質，不過，冇乜人會用，始終，呢啲係冷門嘢，又唔可以換鏡頭，比你試吓⋯⋯」

就係呢一試，我就帶咗這台冷門相機回家，成個過程都幾 dramatic。其實，係我未試嘅時候，一攞上手，我就已經愛不釋手同埋唔捨得放手，感覺就好似終於找著要找的人，不單只design 美觀，質感選材亦非常討好，真係「好靚仔、好有型」。但係，呢一刻都未令我真正心動，直至我見到他有個 21: 9 的設定，就註定深愛著你。21: 9 是電影格式，使用這個格式拍攝，讓影像瞬間增添電影感，再配合場景、氣氛及構圖，即可為一幕簡單的日常畫面，賦予劇照般濃厚戲味，確實非常吸引。

不過，世事無完美，他除咗影相之外，就只可以是影相，無攝錄，無wi-fi，甚麼都沒有，在這個事事求快的世代裡，他還有一個未必人人能夠接受的缺點：「慢」。對焦比較慢，儲存時間比較慢，如果你可以接受這種慢，他是在慢功出細貨，Sigma 採用了Foveon X3 多層感光元件的「Quattro」，畫質細緻清晰，色感樸實自然，再配塔30mm（等效45mm）標準鏡頭焦距，適合追求簡約、純粹但有要求有態度的攝影愛好者。

最後，如果要用一種感覺來為 dp2 總結：
「他・就是讓人瀟灑走一回的理想伴侶。」

圖文：Iris Cheng

課程查詢｜www.FeminArt.hk
FB｜www.facebook.com/feminart