以政務司司長林鄭月娥為首的政改三人組，昨日高調否定特首選舉可以用「公民提名、政黨提名、三軌方案」，明顯針對佔中運動搞的6月22日民間全民投票決，因為當日投票就是投林鄭否定的那幾種方案。
有讀者問我究竟阿爺有無露底牌他屬意那種方案，而阿爺的方案又有無任何讓步的空間?
讀者問起，我又去打聽一吓，發現阿爺屬意提名委員會選舉特首候選人有三大元素:全票制，過半數，三個候選人。聽聞建制派政黨都收到風知道阿爺的意向，但最後只有民建聯和工聯會交足功課，提出的方案有齊三大元素。其他政黨有少少「打斧頭」，側側膊，食啲又唔食啲，只搞出似是而非的方案。
先唔好講有些工商界政黨暗中作反唔交足功課的問題(我早兩日寫過這個話題)，要解釋一下這三大元素夾出來的方案係點樣，以免大家根本唔知講緊乜嘢。所謂全票制加過半數加三個候選人的套餐，好大機會如現時香港產生港區人大代表的選舉方式，而家有36個港區人大的議席，負責選舉的選舉會議成員一票多投，每人必須選足全部36個人大代表，多選了或少選了的選票皆成廢票；候選人必須取得超過半數選舉會議成員的支持方能當選成爲人大代表。如果符合上述得到過半數票資格的候選人總數多於36人，則以選票多寡定勝負。
套用到特首選舉上，即係話提名委員會假設有1200個成員，一人要投3票揀3個候選人，最後得票過半數、兼最多票的3個人跑出。當用全票制加過半數時，每一個出線者其實都起碼有過半數提委提名，由於估計提委會中支持泛民的委員不多於25%，所以泛民應無機會出線。即使部份商界政黨表明支持全票制但不支持過半數，其實關係不大，一實行全票制，可以出線的候選人極有機會手揸過半數，只得25%選票的泛民候選入局機會極低。全票制方案讓步的空間極有限。
若泛民和阿爺坐埋枱傾，相信他們既不接受全票制，也不接受過半數，假如實施類似立法會直選的多議席單票制，泛民還有少少機會出線，當然，候選人數目愈多，例如去到四、五個，他們出線的機會就愈大。說到底無論制度係點，關鍵是那種制度俾唔俾泛民或類近泛民的候選人入閘。
盧永雄
立法會審議預算案撥款仍在「拉布」中，財爺曾俊華話，撥款草案肯定無法在5月中通過，政府面臨財政懸崖，早前申請的臨時撥款不足支付政府6月全部開支，決定暫停向醫管局及政府資助機構發放6月撥款，以維持其他核心公共服務運作，而那些機構自己的儲備足夠頂到6月開支。
不過其中一個發起拉布的議員陳偉業就大罵財爺，話政府應該尋求方法處理現時撥款草案未獲通過的情況，例如申請臨時撥款，批評政府現時做法不負責任，是「大喊十」，令人煩厭。
老實講，呢啲拉布新聞睇到人煩就真。激進議員要拉布出位，政府想早早通過，中間的球證是立法會曾主席，由於佢有剪布之權，佢想剪就可以落刀，最後的結果已命定，呢啲只係一場騷，唔應該有令人意外的賽果。
不過曾主席卻不願意這麼快落刀，因為落刀過快，未俾激進議員玩夠，佢地就會大力咬曾主席，咁樣好傷民望，所以曾主席而家反而要頂住政府和建制派的壓力，唔想而家出手剪布。
老老實實，我睇到呢啲拉布新聞覺得嘥錢兼心煩，議員領咁高人工，立法會又養一大班人，如今做一啲拖嚟拖去結果都係一樣的事情，做嚟為乜?
我反而覺得政府唔應該逼曾主席剪布，激進派想流會亦由得佢地流，拉布任佢拉，順水推舟，任得預算案跌落財政懸崖更好，等大家都知道過唔到預算案係乜嘢味道。
美國做咗俾你睇，近年都試過唔過預算案(佢唔係因為拉布，因為國會由反對黨控制)，結果政府就要停擺，公務員暫時唔使返工，所有公用設施唔開，公立學校停課(學生就開心囉)，垃圾亦無人倒，大家好快就頂唔順，媽到班議員飛起，佢哋唯有死死地氣，開會通過番個預算案。
等香港都試吓政府停工，等公務員走出來媽叉，話再搞落去下次就唔投你曾主席票時，曾主席落刀剪布就會落得很輕鬆啦。
盧永雄
