五大特首俾面派對

星島集團主席何柱國同麗新集團主席林建岳成親家，早前何柱國囝囝何正德同林建岳囡囡林恬兒已經喺法國舉行咗婚禮，今日就喺灣仔君悅酒店宴會廳搞番個酒會。

 

 

兩位父親喺香港政商界有頭有面，達官貴人齊齊到賀。Ariel都影咗少少相俾大家八吓。

 

首任特首董建華

前特首曾蔭權夫婦

特首梁振英

前澳門特首何厚鏵

首任特首董建華

 

先講吓政界先啦，數吓出席者，有香港現任特首CY同兩位前任特首董伯伯及煲呔曾，仲有澳門現任特首崔世安同前任特首鏵哥都有俾面出席，咦，咪有五位特首同場囉，仲有西環一哥、中聯辦主任曉明哥都親自前來祝賀，睇怕都呢個場面都好少見。

 

香港中聯辦主任張曉明與一對新人

 

 

前政務司長唐英年

財爺曾俊華

前政務司長唐英年

 

至於商界猛人當然亦嚟捧場，包括李超人父子在內，好多超級富豪都有到酒會祝賀一對新人。

 

長和系主席李嘉誠

 

 

 

明星名媛亦都唔少，好似係容祖兒啦，仲有千億新抱徐子淇。

千億新抱徐子淇和老公李家誠

歌星容祖兒(中)右邊為合和實業董事總經理胡文新

千億新抱徐子淇和老公李家誠

 

一對新人同父母上台祝酒並多謝來賓，何柱國話祝一對新人幸福快樂，但就話唔使咁快生BB。岳少就話好多謝何生何太搞的法國婚宴好成功咁話。

 

Ariel

** 博客文章文責自負,不代表本公司立場 **

林鄭早上以署理行政長官的身份，嗱嗱聲公布成立獨立專家小組查高鐵延誤，仲會檢討理路政署，以致運房局及港鐵之間的溝通，同埋檢視推展及監察項目上有冇制度同其他問題，同上次由運房局長委任、有短命小組組長李焯芬的專家小組，層次上明顯唔同。

 

口痕友就八，唔通張局長有啲危？查實之前Ariel已寫過，雖然張局長關埋門俾行會同僚媽過，但政府仍然會選擇硬挺佢，至於副局長邱誠武，張局長亦唔會咁無義氣交自己條靚出來。據聞，政府高層中人確實對邱武處理事件有看法，但就覺得目前立法會內唔係有太大的呼聲要政府交官員出來問責，反而矛頭多數向住港鐵，要炒韋達成的壓力都幾大。

 

今次小組由行政長官委任，希望層次高啲，俾人感覺獨立啲。睇番CY行程，下午五點幾都返到香港，但林鄭都搶閘先公布，之但係咁，並唔係阿姐要搶風頭，而係有同CY有共識，一旦拍板組得成，就唔好等，即刻公布，費事陣間CY坐的航班延誤一下，過咗六點先返到，咪又要等下周一先公布得囉。

 

高鐵延誤呢鑊搞到咁大龍鳳，跟住落嚟又七一、又政改，一鑊大過一鑊，政府似乎都想快快做啲嘢，唔好再擴大化喇，之但係，最核心係超支，依家政府同港鐵已互片，按依家的政府氣候，萬一要去立法會再攞錢，先係最難過的一關。