林鄭早上以署理行政長官的身份，嗱嗱聲公布成立獨立專家小組查高鐵延誤，仲會檢討理路政署，以致運房局及港鐵之間的溝通，同埋檢視推展及監察項目上有冇制度同其他問題，同上次由運房局長委任、有短命小組組長李焯芬的專家小組，層次上明顯唔同。
口痕友就八，唔通張局長有啲危？查實之前Ariel已寫過，雖然張局長關埋門俾行會同僚媽過，但政府仍然會選擇硬挺佢，至於副局長邱誠武，張局長亦唔會咁無義氣交自己條靚出來。據聞，政府高層中人確實對邱武處理事件有看法，但就覺得目前立法會內唔係有太大的呼聲要政府交官員出來問責，反而矛頭多數向住港鐵，要炒韋達成的壓力都幾大。
今次小組由行政長官委任，希望層次高啲，俾人感覺獨立啲。睇番CY行程，下午五點幾都返到香港，但林鄭都搶閘先公布，之但係咁，並唔係阿姐要搶風頭，而係有同CY有共識，一旦拍板組得成，就唔好等，即刻公布，費事陣間CY坐的航班延誤一下，過咗六點先返到，咪又要等下周一先公布得囉。
高鐵延誤呢鑊搞到咁大龍鳳，跟住落嚟又七一、又政改，一鑊大過一鑊，政府似乎都想快快做啲嘢，唔好再擴大化喇，之但係，最核心係超支，依家政府同港鐵已互片，按依家的政府氣候，萬一要去立法會再攞錢，先係最難過的一關。
Ariel
** 博客文章文責自負,不代表本公司立場 **
政務司司長林鄭自從上次在回應內地學者饒戈平講咗句「一錘定音」，被人圍插之後，就好少見佢講政制時再出「錘」，不過昨日又有異動。
以林鄭月娥為首的政改三人組，昨日高調否定特首選舉可以用「公民提名、政黨提名、三軌方案」，林鄭講明這3項提名方法，不會是政府政改方案的選項。大家都知，佔中運動早前投票就係選出包含這些特性的方案，供6月22日民間全民投票決。林鄭更質疑這3個選項是「某種方法選出來」，屬單一基礎。佢似乎在暗示佔中運動搞出這三個方案係俾人操控。
一路以來，都係阿爺比較樂於表態，港官慎於發言，但今次林鄭等明確出口將包含公民提名成份的方案踢出局，顯然有策略考慮。佔中運動早前投票俾激進派玩晒，踢走了無包含公民提名的溫和方案，所有三個選擇都有公民提名成份，本來已經惹起溫和泛民的不滿，今次政府擺明「趁你病攞你命」，封死了公民提名的出路，目標是再為6.22投票淋冷水，三個方案既無得揀，政府又講明唔會接受公民提名，變成6.22投票只是齋投，只屬支持激進方案市民的表態活動，令其他人覺得玩來都無謂。
不過呢次6.22投票真係幾脫腳，佔中運動先來一場內鬥，將溫和泛民排斥出去，佢地完全唔會動員人去投票，激進派係佔咗個場，不過由大場變咗細場，咁又值唔值呢?
