政務司司長林鄭自從上次在回應內地學者饒戈平講咗句「一錘定音」，被人圍插之後，就好少見佢講政制時再出「錘」，不過昨日又有異動。
以林鄭月娥為首的政改三人組，昨日高調否定特首選舉可以用「公民提名、政黨提名、三軌方案」，林鄭講明這3項提名方法，不會是政府政改方案的選項。大家都知，佔中運動早前投票就係選出包含這些特性的方案，供6月22日民間全民投票決。林鄭更質疑這3個選項是「某種方法選出來」，屬單一基礎。佢似乎在暗示佔中運動搞出這三個方案係俾人操控。
一路以來，都係阿爺比較樂於表態，港官慎於發言，但今次林鄭等明確出口將包含公民提名成份的方案踢出局，顯然有策略考慮。佔中運動早前投票俾激進派玩晒，踢走了無包含公民提名的溫和方案，所有三個選擇都有公民提名成份，本來已經惹起溫和泛民的不滿，今次政府擺明「趁你病攞你命」，封死了公民提名的出路，目標是再為6.22投票淋冷水，三個方案既無得揀，政府又講明唔會接受公民提名，變成6.22投票只是齋投，只屬支持激進方案市民的表態活動，令其他人覺得玩來都無謂。
不過呢次6.22投票真係幾脫腳，佔中運動先來一場內鬥，將溫和泛民排斥出去，佢地完全唔會動員人去投票，激進派係佔咗個場，不過由大場變咗細場，咁又值唔值呢?
Ariel
** 博客文章文責自負,不代表本公司立場 **
教育局局長吳克儉昨日(周三)「提醒」師生「佔中違法」，講完之後受到部教育界人士批評，Ariel遇到一個建制派政黨中人，佢話吳局長真係唔幾得掂，明明道理在自己的一邊，民意也在自己一邊，但講到縮頭縮腦，唔得理直氣壯。
佢話睇到一個民意調查， 贊成佔中的人數只有25%，反對佔中的有63%，另外認為應該俾同中央對抗的人做特首候選人的只有25%，反對的有61%。從不同問題都看到，超過6成市民唔贊用激進的方法推行政改，而這個調查結果和媒體如《明報》做的調查亦相吻合。佢認為媒體傳播出來很多人支持佔中的印象，根本和實際的民意有好大落差。
Ariel就覺得除咗話媒體較激之外，年青人都係傾向激進的，比較認同這些思想，而後生仔又夠膽講出來，自然較大聲。
最近睇到中大《大學線》做咗個專題，講非暴力抗爭會否在香港落地生根，內容提到陶君行的中華民主書院好認真咁請咗來自台灣的非暴力抗爭導師簡鍚堦，教香港後生仔點樣進行非暴力抗爭。
http://vimeo.com/82759627
我地好似睇緊兩個世界，一個成年人的世界，一個後生仔的世界，兩者愈拉愈遠。
