中美俄的三角關係在這個星期出現急促變化，中俄更密，中美疏離。
首先係有一個亞洲相互協作與信任措施會議第四次峰會(簡稱亞信峰會)由本周二起在上海舉行，有46個國家和國際組織領導人參加。呢個由中俄主導的亞信峰會，明顯就係另搞一套，以抗衡由美國主導的亞太經合組織那類機構。
這還不止，在亞信峰會召開前，俄羅斯總統普京提前到上海，先和習近平主席開密會。而家國際大環境係美國和歐洲要就烏克蘭事件制裁俄國(美國出力大過歐洲)，俄國是一個側重能源出口的經濟體，萬一歐洲在輸入俄羅斯天然氣方面減量，俄羅斯會受重創，所以佢急欲和中國達成輸出天然氣的整體協議。過去因為普京就天然氣叫高價所以同中國傾咗十年都未掂，而家國際環境對俄國不利，普京就大展柔軟身段，要和中國達成天然氣協議。
就在中俄拍緊拖之際，美國就出手搞局。美國司法部在本周一(19日)宣佈越洋起訴五名中國解放軍軍官，指他們替中國政府入侵美國六間企業的電腦系統，竊取商業機密，並發放五名疑犯的通緝照片，其中兩人更穿着解放軍軍裝，是美國政府歷來首次以網絡經濟間諜罪名控告外國政府官員。美國更指稱他們是五人來自總部設在上海的解放軍61398部隊。咁啱又係上海? 美國在此時此刻出招，就好有落中國面的味道。
其實美國早兩三個月亦同中國拍過拖，當時美國大力約束日本，唔俾佢在釣魚島及參拜靖國神社等問題上搞中國。後來烏克蘭問題急促惡化，美國想郁俄羅斯，希望中國不要靠向俄羅斯一方。從現時的結果判斷，中美講唔掂數。
今日(周三)中俄終於達成為期30年的天然氣供應協議，呢個協議傾咗10年到而家先至傾得成，俄羅斯每年向中國供應380億立方米的天然氣。外界估計交易總金額達4400億美元。有此協議，中國對西方控制地區的能源依賴減少，而俄羅斯亦不怕西方對其天然氣出口實施制裁。
當然，中美俄的情迷三角，其關係並不會就永遠穩定，這是一種不斷變動的平衡，1972年毛澤東就情願和資本主義「美帝」親近，而和共產主義老大哥蘇俄疏遠。到今年形勢又180度改變。不過可以肯定的是，在末來的日子，中美矛盾升溫，似亦勢所難免，愛的反面就是恨嘛。
盧永雄
立法會繼續就預算案拉布，上期我講到「不如俾佢跌落懸崖啦」，惹來不少反嚮，認同的不講，亦有不少反對意見，其中一個朋友留言，話認同拉布係折射咗市民對政府的不滿，當你聽到高官話「等唔到地鐵就等多幾班」、「六百萬以下都是上車盤」、「唔知高鐵會延誤」，總是感到一肚子氣，難怪長毛梁國雄、慢咇陳志全、大舊陳偉業拉布有市場。
無可否認，呢啲怨聲有社會基礎，特別係市民買唔起樓，人工無加，返工等四班地鐵都上唔到車時，就好易爆發。政府同佢地講呢啲問題係長久積下來的，要忍一忍。佢地唔會理，總之好慶想找政府發洩。
不過發洩還發洩，可能評論的市民，都未知拉布的事態愈來愈嚴重。表象是政府高官上周突然出晒嚟講，話再拉布唔掂，實跌落財政府懸崖。而大舊就質疑政府報大數，話政府再申請臨時撥款就可以搞掂。
我索一索料，發現事情其實比想像中嚴重，政府不但怕再申請臨時撥款財政預算案會一直拉布下去(因為不會即時跌落懸崖更可以慢慢拉)， 更怕拉布之風正在立法會內全面擴散，在財委會及其屬下的工務小組，拉布已令各撥款申請塞晒車，好似建將軍澳堆填區及石鼓洲焚化爐的「一堆一爐」方案，就在工務小組內講極都未完，議員提出大堆問題及修訂建議，拉布阻住方案表決。一個星期未傾完，又推到下個星期再傾，無休止咁傾。又例如財委會傾緊新界東北發展的前期撥款，又係拖緊。
一個個撥款申請拖住，就影響大量其他後面排緊隊的撥款申請，據說立法會財委會有47個項目塞緊車未有機會傾，咁其他等住上的項目就大鑊啦，例如政府本來想在7月提出「低收入津貼」的撥款申請上財委會，但財委會有47個項目未傾，7月只得兩個星期，低津要在7月傾的機會愈來愈渺茫，唔得要等立法會休會完10月再上，咁要出年第三季落實，就愈來愈危啦。拉布擴散其實可以令施政推遲甚至項目停擺，政府系統運作慢晒，可以死得人。
本來立法會曾主席有權剪布，但他就要背上「唔俾人講嘢」之名，所以相當窒手。曾主席就想搞出一個機制，由立法會決定剪布，即係話唔係佢一個人孭晒，大家一齊孭。問題係搞剪布機制改議事規則要分組點票，去到直選組別分組投票時，泛民又點會同意設剪布機制? 所以暫時又係得個吹字。
拉布之病，綜合了有票的議員借了市民的不滿情緒，再加有權的主席不願負上剪布惡名，就任由預算案和各大施政項目一拖再拖，結局最後或許都是一樣，始終要剪布收場，但所有重大施政都拖延下來，成本大增，懲罰不到政府，只是議員出了位，罰咗納稅人。
盧永雄
