立法會繼續就預算案拉布，上期我講到「不如俾佢跌落懸崖啦」，惹來不少反嚮，認同的不講，亦有不少反對意見，其中一個朋友留言，話認同拉布係折射咗市民對政府的不滿，當你聽到高官話「等唔到地鐵就等多幾班」、「六百萬以下都是上車盤」、「唔知高鐵會延誤」，總是感到一肚子氣，難怪長毛梁國雄、慢咇陳志全、大舊陳偉業拉布有市場。
無可否認，呢啲怨聲有社會基礎，特別係市民買唔起樓，人工無加，返工等四班地鐵都上唔到車時，就好易爆發。政府同佢地講呢啲問題係長久積下來的，要忍一忍。佢地唔會理，總之好慶想找政府發洩。
不過發洩還發洩，可能評論的市民，都未知拉布的事態愈來愈嚴重。表象是政府高官上周突然出晒嚟講，話再拉布唔掂，實跌落財政府懸崖。而大舊就質疑政府報大數，話政府再申請臨時撥款就可以搞掂。
我索一索料，發現事情其實比想像中嚴重，政府不但怕再申請臨時撥款財政預算案會一直拉布下去(因為不會即時跌落懸崖更可以慢慢拉)， 更怕拉布之風正在立法會內全面擴散，在財委會及其屬下的工務小組，拉布已令各撥款申請塞晒車，好似建將軍澳堆填區及石鼓洲焚化爐的「一堆一爐」方案，就在工務小組內講極都未完，議員提出大堆問題及修訂建議，拉布阻住方案表決。一個星期未傾完，又推到下個星期再傾，無休止咁傾。又例如財委會傾緊新界東北發展的前期撥款，又係拖緊。
一個個撥款申請拖住，就影響大量其他後面排緊隊的撥款申請，據說立法會財委會有47個項目塞緊車未有機會傾，咁其他等住上的項目就大鑊啦，例如政府本來想在7月提出「低收入津貼」的撥款申請上財委會，但財委會有47個項目未傾，7月只得兩個星期，低津要在7月傾的機會愈來愈渺茫，唔得要等立法會休會完10月再上，咁要出年第三季落實，就愈來愈危啦。拉布擴散其實可以令施政推遲甚至項目停擺，政府系統運作慢晒，可以死得人。
本來立法會曾主席有權剪布，但他就要背上「唔俾人講嘢」之名，所以相當窒手。曾主席就想搞出一個機制，由立法會決定剪布，即係話唔係佢一個人孭晒，大家一齊孭。問題係搞剪布機制改議事規則要分組點票，去到直選組別分組投票時，泛民又點會同意設剪布機制? 所以暫時又係得個吹字。
拉布之病，綜合了有票的議員借了市民的不滿情緒，再加有權的主席不願負上剪布惡名，就任由預算案和各大施政項目一拖再拖，結局最後或許都是一樣，始終要剪布收場，但所有重大施政都拖延下來，成本大增，懲罰不到政府，只是議員出了位，罰咗納稅人。
盧永雄
越南反華騷亂，經過一個星期後，已有緩和跡象。越南當地民眾昨天發動518的反中大遊行，結果無大事發生。但當地華商仍憂心仲仲，怕會死灰復燃。我有朋友在越南平陽市設有大規摸工廠。我向他了解過當地情況後，對事件有了更深一層的認識。
那個廠商朋友話，事件由上周一（12日）開始惡化，當日已有行家流傳在平陽多處地區有越南人舉行反華示威，騷擾工廠，朋友當時已考慮應否即時停工，但他當天沒有停工。到周二大清早，他聽到有暴徒衝入工廠破壞搶掠，便馬上叫停接載工人上班的廠車，又連忙叫貨車將廠內的產品全部運走，工廠暫時關門停工。暴亂事件當天開始大規模爆發，多家工廠被砸搶，唔少華人遭打傷，甚至殺死(台塑的工廠便有四人死亡)。朋友的工廠僥倖逃過一劫，他事後抹了一把冷汗。
據廠商朋友的觀察，那些滋事份子搗亂的主要對象係正在開工、而且有財物的工廠，好像他們馬上停工、又沒有貨物在工廠則安然無恙。從這個跡象判斷，搞事者的目的其實並非反華，而係搶嘢，揀有嘢搶的工廠落手。越南與中國同係共產國家，但越南對民眾的控制從來都比中國鬆懈，工人間中搞罷工，逼資方加人工，本來都比較自由化。但今次風波一起，越南內部反華情緒升溫，別有用心的越南人乘機出來玩玩，初時是遊行發洩一吓情緒，好快就發覺政府沒有大力控制，就馬上演變成打、砸、搶、燒的亂局，遇有廠內看守財物的人員抵抗，衝突一起，就搞出人命。
朋友又話，示威者針對的不單是中國人開的工廠、港人的、台灣人的、南韓的、日本的，全部中招，平陽市新加坡工業園暴亂更係最嚴重，連員工宿舍都遭到洗劫，台灣商家亦損失慘重。由於參加示威的人有部份是本地工人，他們對工廠誰屬，其實一清二楚，若要針對中國無理由殺入新加坡工業園區，由此可見他們是瞄準財物，並非針對中國廠家。大家從新聞片段中，可以清楚見到相當多示威者用摩托車運走貨物，據說家電最受歡迎。
另一個現象係，在胡志明市越南華人聚居的地方，也不見到遭到騷擾。想當年印尼排華，印尼人見到華人就打就殺，幾乎所有的華人都遭殃，而越南根本亦不見針對當地華人的情況，可見騷亂的目的其實不在排華，只是借機生事。
越南政府今次確實有點玩大了，沒有在開始還能控制時大力控制。我的廠家朋友表示，觀察到情況穩定後，工廠有可能在本周重開。他估計外資暫時唔會撤走，因為咁大個廠在那裏，也不是話搬就搬，但事件對原本研究到越南設廠的外商，就有好大影響。越南的工資成本亦上升了不少，要找廉價勞工，還有很多選擇，可以去其他東南亞國家，如巴基斯坦，甚至非洲國家，要廠家冒險去一個可能會生亂事的地方，唔好搞我啦。越南本來都唔係富有，應承了搞亞運都要縮沙，搞完呢一鑊，投資又要倒退幾年啦。
盧永雄
