早兩日我寫到亞洲相互協作與信任措施會議第四次峰會(簡稱亞信峰會)的事情，後來有高人睇完話，本地媒體當呢個阿信峰會無到，唔知中美正在大打交，咁就唔知將來影響到香港的政治局勢。
阿爺係先發起搞上海合作組織，然後再衍生亞信峰會，而亞信峰會卻擺明同美國主導的亞太經合組織(APEC)搶生意。美國睇住中國另起爐灶大搞亞信峰會、同俄羅斯聯合軍演、同俄羅斯簽30年天然氣協議，自然頂住條氣。不過按中國的版本，話美國軍事介入亞太區的企圖唔細，佢只係出招回應啫。
中國直指美國意圖在亞洲搞類似北約的軍事聯盟。北約全稱北大西洋公約組織，係美國和歐洲對付前蘇聯的軍事聯盟。蘇聯解體，普京上台後，佢一度想俄羅斯加入北約，點知俄羅斯唔做共產國家後美國仍然視佢為敵，唔俾佢加入北約，普京一怒之下，走上反美之路。
美國想在亞洲搞北約，拉攏各國加入，死硬盟友日本第一個嚮應，和中國有領土爭議的國家如菲律賓和越南都有意加入。習主席早前趁住去馬來西亞開APEC之前，先飛一轉印尼，進行國事訪問，然後在馬來西亞開會期間亦和馬來西亞總理納吉會晤，成功截胡，馬來西亞和印尼都不加入那個亞洲北約，而新加坡雖有美軍基地，但也不想公然同中國對抗，亦無加入。另一大國南韓同中國商貿關係緊密，也不想參加。呢個亞洲北約有少少唔湯唔水。
阿爺見美國這樣公然在亞洲搞局，亦唔執輸，將亞信峰會搞到咁高調，大有破局之意，又和俄羅斯高調同搞軍演，以兩大國的軍力，日、菲、越相對就差少少，咁就睇美國自己落幾多本嚟亞洲玩啦。
既然中美唔係咁老友，中國又一直指美國介入香港事務，兩國互片，香港實係戰場之一，未來香港的政治，都好難平靜啦。
盧永雄
特首 CY今日出席立法會答問大會，結果激進議員掟嘢，會議腰斬收場，睇嚟隨著7.1可能有激進團體預演佔中的日子臨近，政府和激進派進入一個「開波」狀態，對打局面肯定會愈來愈激啦。
CY出席立法會答問大會，傳媒估佢會講吓剪布，講吓佔中，預佢講來講去都係咁，不會有新意。但你估佢唔到，CY發言都有啲新聞，佢講到警方不會對佔中的示威活動發出「不反對通知書」，理由係呢啲活動講到明癱瘓中環，不能讓它發生。示威活動若不能取得「不反對通知書」，意味著一開始就是非法集會，參加者一參與就是違法。政府面對激進泛民強硬進攻，擺出一副硬打硬的姿態。
當然，立法會開個壇俾特首去講嘢，長毛等激進派當然唔會俾佢講得咁高興，亦預咗大龍鳯招呼佢，各種道具先後出場，預備好「誠實豆沙包」，兜口兜面掟過。本來過去呢啲表演都係咁，佢地循例玩，曾主席循例趕，不過趕走慢咇同大舊陳偉業之後，今趟長毛唔肯走，話佢自己未掟喎，後來何秀蘭又加入來幫長毛口，變咗又辯論一場。搞咗一陣，當時距離原定10:45分的完結時間只有5分鐘不到，曾主席就宣布休會，等於腰斬答問大會。
有人話曾主席其實唔使腰斬個會，照開都得，但呢啲都唔重要啦，搞到咁再開亦只係再嘈，都無乜特首答問會的作用。
CY預咗俾人玩，佢亦有備而來，出到會場門口就攞篇稿出來讀，強烈譴責激進派議員唔尊重民主議會的精神。我有少少好奇，這是突發事件，為何特首會有稿？原來佢預咗會「受襲」，寫定稿「防身」咁話，結果就一如預期咁用得著啦。
聞說有建制派推動緊改立法會議事規則，想加入罰則，話如果議員重覆破壞議會秩序會受懲罰，想阻嚇這些粗野動作不要再不斷發生。但係改議事規則要立法會分組點票決定，在直選組別唔易通過。
隨著今年7.1愈來愈近，佔中預演可能出現，激進泛民作勢搶攻，政府亦提升戰備，睇嚟難免打交啦。
盧永雄
