特首 CY今日出席立法會答問大會，結果激進議員掟嘢，會議腰斬收場，睇嚟隨著7.1可能有激進團體預演佔中的日子臨近，政府和激進派進入一個「開波」狀態，對打局面肯定會愈來愈激啦。
CY出席立法會答問大會，傳媒估佢會講吓剪布，講吓佔中，預佢講來講去都係咁，不會有新意。但你估佢唔到，CY發言都有啲新聞，佢講到警方不會對佔中的示威活動發出「不反對通知書」，理由係呢啲活動講到明癱瘓中環，不能讓它發生。示威活動若不能取得「不反對通知書」，意味著一開始就是非法集會，參加者一參與就是違法。政府面對激進泛民強硬進攻，擺出一副硬打硬的姿態。
當然，立法會開個壇俾特首去講嘢，長毛等激進派當然唔會俾佢講得咁高興，亦預咗大龍鳯招呼佢，各種道具先後出場，預備好「誠實豆沙包」，兜口兜面掟過。本來過去呢啲表演都係咁，佢地循例玩，曾主席循例趕，不過趕走慢咇同大舊陳偉業之後，今趟長毛唔肯走，話佢自己未掟喎，後來何秀蘭又加入來幫長毛口，變咗又辯論一場。搞咗一陣，當時距離原定10:45分的完結時間只有5分鐘不到，曾主席就宣布休會，等於腰斬答問大會。
有人話曾主席其實唔使腰斬個會，照開都得，但呢啲都唔重要啦，搞到咁再開亦只係再嘈，都無乜特首答問會的作用。
CY預咗俾人玩，佢亦有備而來，出到會場門口就攞篇稿出來讀，強烈譴責激進派議員唔尊重民主議會的精神。我有少少好奇，這是突發事件，為何特首會有稿？原來佢預咗會「受襲」，寫定稿「防身」咁話，結果就一如預期咁用得著啦。
聞說有建制派推動緊改立法會議事規則，想加入罰則，話如果議員重覆破壞議會秩序會受懲罰，想阻嚇這些粗野動作不要再不斷發生。但係改議事規則要立法會分組點票決定，在直選組別唔易通過。
隨著今年7.1愈來愈近，佔中預演可能出現，激進泛民作勢搶攻，政府亦提升戰備，睇嚟難免打交啦。
盧永雄
中美俄的三角關係在這個星期出現急促變化，中俄更密，中美疏離。
首先係有一個亞洲相互協作與信任措施會議第四次峰會(簡稱亞信峰會)由本周二起在上海舉行，有46個國家和國際組織領導人參加。呢個由中俄主導的亞信峰會，明顯就係另搞一套，以抗衡由美國主導的亞太經合組織那類機構。
這還不止，在亞信峰會召開前，俄羅斯總統普京提前到上海，先和習近平主席開密會。而家國際大環境係美國和歐洲要就烏克蘭事件制裁俄國(美國出力大過歐洲)，俄國是一個側重能源出口的經濟體，萬一歐洲在輸入俄羅斯天然氣方面減量，俄羅斯會受重創，所以佢急欲和中國達成輸出天然氣的整體協議。過去因為普京就天然氣叫高價所以同中國傾咗十年都未掂，而家國際環境對俄國不利，普京就大展柔軟身段，要和中國達成天然氣協議。
就在中俄拍緊拖之際，美國就出手搞局。美國司法部在本周一(19日)宣佈越洋起訴五名中國解放軍軍官，指他們替中國政府入侵美國六間企業的電腦系統，竊取商業機密，並發放五名疑犯的通緝照片，其中兩人更穿着解放軍軍裝，是美國政府歷來首次以網絡經濟間諜罪名控告外國政府官員。美國更指稱他們是五人來自總部設在上海的解放軍61398部隊。咁啱又係上海? 美國在此時此刻出招，就好有落中國面的味道。
其實美國早兩三個月亦同中國拍過拖，當時美國大力約束日本，唔俾佢在釣魚島及參拜靖國神社等問題上搞中國。後來烏克蘭問題急促惡化，美國想郁俄羅斯，希望中國不要靠向俄羅斯一方。從現時的結果判斷，中美講唔掂數。
今日(周三)中俄終於達成為期30年的天然氣供應協議，呢個協議傾咗10年到而家先至傾得成，俄羅斯每年向中國供應380億立方米的天然氣。外界估計交易總金額達4400億美元。有此協議，中國對西方控制地區的能源依賴減少，而俄羅斯亦不怕西方對其天然氣出口實施制裁。
當然，中美俄的情迷三角，其關係並不會就永遠穩定，這是一種不斷變動的平衡，1972年毛澤東就情願和資本主義「美帝」親近，而和共產主義老大哥蘇俄疏遠。到今年形勢又180度改變。不過可以肯定的是，在末來的日子，中美矛盾升溫，似亦勢所難免，愛的反面就是恨嘛。
盧永雄
