恒基地產5月中以232.8億元高價，投得中環美利道停車場地王，每方呎樓面地價高達50064元，創官地歷史新高，遠高於市場估計，各方都好有興趣知道恒基條數點計。
美地道停車場(資料圖片)
今年未見恒基主席李兆基亮相公司的業績會，但唔好以為李四叔唔理事，有知情人士話俾Sebastia知，原來恒基投美利道地王的落標價，係由李四叔親自拍板。
話說恒基落標之前，禀咗俾李四叔聽，佢地打算以每呎樓面地價46000元入標，呢個係佢地計過的合理價錢。李四叔聽到後話，46000元呎價係專業計算出來的價錢，但佢估呢個價唔會投得到，其他人出價會高過呢個價。
李四叔話，如果想投到呢塊地，就要出到50000元呎價，佢建議按此價入標。知情人士話，50000元可以話係「志在必得價」，李四叔一定想投到塊地，所以就要出高價。
中環對上一幅商業地，已是機鐵中環站上蓋國際金融中心地皮，由恒地及新地等財團在1996年投得。而中環核心地段當然有其他財團興建的超級商廈，李四叔斥巨資投美利道地王，就要在中環核心興建恒基的地標式商廈，預計總投資額260億元。
至於呢個出價係唔係太貴，就見仁見智，而恒基亦有後著，佢手上有近1000億的物業可以出售，高價投得美利道地王之後，其他物業就嘜高一成出售，沽出次一等物業，換入地王，除笨有精也。
Sebastian
** 博客文章文責自負,不代表本公司立場 **
