羅致光識揀 搵民記徐英偉做副局長

林鄭新班子亮相，唯一一個外人入局係前民主黨大腦羅致光，佢出任勞工福利局局長。

有建制派中人條氣有少少唔順，話教聯會的蔡若蓮可能出任教育局副局長，就俾教協插到暈，但民主黨的羅致光做勞福局局長，工聯會係唔係可以大力反對先?

佢咁講當然係諷剌泛民佢地自己友入政府就得，對家入政府就大鬧。不過呢個說法亦反映咗一個現象，就係羅致光入政府，唔等如建制派無情緒喎。

有件事睇到羅致光好聰明，之前政府有一份副局長人選名單，俾各個候任局長去揀，來自民建聯的民政事務局政治助理徐英偉，都可以在升做副局的名單之上。羅致光一句唔該，就揀徐英偉做勞福局副局長。

民建聯的人物，自然俾反對派的媒體踩到似廢物，點解聰明如羅致光會搶往去揀? 佢一則固然是睇中徐英偉的潛質，二則是看上徐英偉的民建聯背景。勞福局推動的法案若想在立法會通過，如果得唔到民建聯這個大黨支持，都幾難過到關。問題是若民建聯唔想見一個來自民主黨的局長，可以點算? 最簡單的方法，就係搵個民建聯的副局長，由佢先去搭路，民建聯都會俾吓面啩。

政壇高人話，新政府可能更加需要和建制派抱緊，特別注意「更加」這兩個字，是和現屆CY政府比較，CY本來有建制支持，唔需要特別下功夫，但林鄭來自公務員體系，若然得唔到建制派支持，在立法會寸步難行。羅致光睇得通呢個局，所以就在揀副局就早著先鞭了。

Ariel

** 博客文章文責自負,不代表本公司立場 **

現任57歲的邱騰華現屆政府做特首辦主任，一直傳聞佢和特首CY貌合神離，來屆政府就轉做商務及經濟局局長。

邱騰華上次做局長數到2007年曾蔭權第二個任期，搵佢做轉做問責官員，擔任環境局局長，2012年轉為特首辦主任，如今再做局長。

聞說Edward Yau同林鄭好熟，係林鄭在新班子內幾大「自己人」之一。佢做商經局亦優而為之，因為佢做過貿易署，又做過華盛頓香港經濟貿易辦事處，有商貿部門經驗。

聽聞新一任政府商經局局長其中一個主要工作，係搞一帶一路相關事務，呢個位變咗有好多和內地部門及出外和其他國家打交道的機會，Edward的商貿工作經驗及過去做特首辦時建立的內地聯系，可以派上用場。

講開一帶一路，現在政府的一帶一路專員蔡瑩璧，做到6月30日將會任滿，呢個位亦好可能取消埋。去年8月政府搵蔡瑩璧做義工，出任一帶一路專員，由於怕去立法會開位會被拉布，所以無人工出，Yvonne Choi亦唔介意幫吓手做。當時就將一帶一路專員放在中央政策組之下。

轉眼差不多一年過去，林鄭新政府快將上台，據說幾重視一帶一路的工作，唔止由Edward Yau去睇，這方面的事務仲可能直接向特首林鄭匯報。如此一來，一帶一路專員將來會變得可有可無，所以索性連位都取消埋。