自由黨陳浩濂做副局　田少媽媽聲

林鄭政府執緊副局長人選，自由黨港島山頂區區議員陳浩濂好可能出任財經事務及庫務局副局長。

陳浩濂曾在渣打銀行及法國農業信貸銀行工作，熟悉金融業運作，做財經局副局長相好稱職。外界視陳浩濂為田北俊徒弟，如今他突然放棄選舉戰線，加入政府，自由黨主席張宇人和經民聯林健鋒會好高興，田少痛失愛將，當然媽媽聲。

陳浩濂過去與田少行埋，去年9月曾參加立法會總商會功能組別選舉，挑戰經民聯林健鋒，當時就話由田少支持陳浩濂鬥林健鋒，雖然林健鋒最後取勝，但係已經一額汗。

到去年12月選委會選舉時，田少又夥拍陳浩濂在商界（第一）組別參選，19人爭18席，最終田少和陳浩濂分別獲441和430票最高票當選，成為票王。

田北俊在知道點票結果時話，對於黨友陳浩濂「青出於藍」，和他一起成為界別票王感到高興，稱陳浩濂一直努力拉票，笑指「佢勤力過我好多」。田少又指，自由黨兩名參選人都高票當選，反映商界財團沒有一如傳聞封殺自由黨，重申會選一個商界支持的特首。田少表明支持曾俊華參選特首，估計最後陳浩濂也是投了支持鬍鬚曾的票，無支持林鄭。

但今次林鄭「不計前嫌」，拉陳浩濂入政府做副局長，政壇高人話，呢條絕世好橋，唔知邊個射俾林鄭，一箭三鵰。首先林鄭好大方不計前嫌，用田少系統的人，顯露政治氣量。其次自由黨內張宇人和田少打大交，如今拉走田少頭馬，大大削弱田少實力，張宇人笑哈哈，政府亦拉番部份非張宇人系的自由黨人支持。第三，送一個順水人情俾林健鋒，將來唔使擔心陳浩濂再威脅他。

Ariel

** 博客文章文責自負,不代表本公司立場 **

大廈管理係民青局今年重點工作之一。有見部分舊式單幢樓宇或「三無大廈」因為單位數量不多、財政資源不足，難以獨自聘用專業物業管理公司協助執行日常嘅大廈管理工作，真係長久以嘅「老大難」問題。

但政府迎難而上，採取更積極主動嘅方針，民政事務署喺去年就推行「聯廈聯管」試驗計劃，協助業主共同聘用同一間物管公司聯合管理大廈，攤分管理費用，咁就可以用較平嘅管理費，獲得基本大廈管理服務，從而改善管理同居住環境。

民政事務署喺去年起推行「聯廈聯管」試驗計劃，協助單幢樓宇聘請管理公司。

「聯廈聯管」試驗計劃2025年6月1日率先喺油尖旺、深水埗、九龍城及荃灣區推行，由於試驗計劃初見成效，民政總署已於今年6月1日將此計劃正式擴展至全港所有有需要嘅地區，包括觀塘、荃灣、葵青、北區、沙田、大埔、元朗、屯門、中西區、南區、東區及灣仔等，為期一年，呼籲符合條件業主和法團善用政府為他們提供的計劃和措施，以可負擔嘅價錢改善居住環境。　

民青局局長麥美娟早前就喺荃灣民政事務專員區家盛陪同下，到荃灣同當區區議員、協助推行試驗計劃嘅地區團體及法團代表、住戶交流，了解試驗計劃嘅成效。

民政及青年事務局局長麥美娟早前就喺荃灣民政事務專員區家盛陪同下，到荃灣同當區區議員、協助推行試驗計劃嘅地區團體及法團代表、住戶交流，了解試驗計劃嘅成效，麥局長仲分享咗唔少推行「聯廈聯管」嘅實戰經驗。

麥局長話，第一期試驗喺單幢樓宇集中嘅區域，邀請地區組織接觸216幢目標大廈，當中110幢大廈已簽署參與意向書，當中71幢進行聯合招標，33幢已成功聘用物管公司實行「聯廈聯管」。

佢話，目標當然係愈多大廈參與愈好，事實上樓宇管理責任在業主身上，但她明白好多業主沒有咁多時間或相關知識處理，所以政府推出很多不同計劃，包括「聯廈聯管」試驗計劃及實行咗幾年嘅「大廈管理專業顧問服務計劃」等，希望協助業主組織法團，之後參與「聯廈聯管」聘請專業顧問公司，她希望各業主善用政府為他們提供的不同計劃和措施，做好自身大廈管理。

麥局長跟地區組織代表分享實戰經驗。

協助推行計劃的荃灣發展促進會主席王家文仲話，接觸咗該區75棟目標樓宇，其中有9棟參加，每戶每月管理費約150至200元，管理公司入場後，可以執行政府命令，還可組織法團開會，佢認為要成功令居民對計劃有信心係好重要，希望過去嘅成功經驗，可鼓勵更多大廈參與「聯廈聯管」。

高人話，政府推出「聯廈聯管」 計劃係重要嘅一步，除了居民居住環境更好,樓宇有適當管理，物業都保值啲，其中除了政府牽頭外，更重要係居民支持。