學聯搶繮佔中

而家佔中三子未有計劃在今年7.1搞佔中，話要等政府方案出來睇睇先算，只有較激進的泛民組織成日話要7.1預演佔中，但學聯的動向值得關注，佢地話若在6.22全民投票後，政府仍拒絕聽民意否決公民提名，學聯將與在6.22至7.1期間發動提早佔中。

學聯秘書長周永康昨日話，六四維園有18萬點燭光，話俾中央政府聽香港人對民主訴求已忍無可忍，若然政府繼續對市民公民提名訴求充耳不聞，學聯係必定會佔中，會透過公民抗命的行動，話俾呢個政府聽，你已經無法管治。

學聯話佔中時間介乎6.22全民投票後至7.1期間，預計有近千人參與。周永康話為免警方打壓，暫時不會公開具體地點，「政總、立法會、中聯辦，甚至馬路，我哋都會考慮」。

一直以來，佔中三子都未具體行動，話要等政府方案出來。知情人士話，佢地見政府未揭底牌，市民反對氣氛未夠濃，怕太早發動佔中，參與人數唔多無氣勢無影響。

但學生就好唔耐煩，覺得班學者太雞，認為人地台灣太陽花運動都搞完返埋屋企，香港仲得過講字，所以躍躍欲試。今次學聯講到咁具體，搶繮搞佔中，睇嚟本月下旬都要開一開波囉。

Ariel

** 博客文章文責自負,不代表本公司立場 **

支聯會搞六四搞了25年，今年腹背受敵，一邊係愛港力那些「愛字堆」，另一邊係本地派，有了解支聯會情況人士話，親阿爺的愛字堆對支聯會殺傷力不大，因為大家都知道兩者南轅北轍，鐘意支聯會的市民，不會喜歡愛字堆，但本土派和支聯會同屬泛民，本土派以青年人為對象，對支聯會有威脅。

好像本土派昨晚在尖沙咀另起爐灶搞六四集會，大會稱有7000人參與，警方指高峰時有3060人。雖然人數同維園集會無得比，但就吸引咗一班年青人去，仲話維園係老餅集會。

本土派狙擊支聯會人物的手法，和人民力量攻擊民主黨大同小異。人稱狗哥的支聯會副主席蔡耀昌早前出席六四論壇，佢90年曾是學聯秘書長，但講番當年往事時，就被本土派全程柴台，可以用慘不忍睹幾隻字去形容。