政事
支聯會搞六四搞了25年，今年腹背受敵，一邊係愛港力那些「愛字堆」，另一邊係本地派，有了解支聯會情況人士話，親阿爺的愛字堆對支聯會殺傷力不大，因為大家都知道兩者南轅北轍，鐘意支聯會的市民，不會喜歡愛字堆，但本土派和支聯會同屬泛民，本土派以青年人為對象，對支聯會有威脅。
好像本土派昨晚在尖沙咀另起爐灶搞六四集會，大會稱有7000人參與，警方指高峰時有3060人。雖然人數同維園集會無得比，但就吸引咗一班年青人去，仲話維園係老餅集會。
本土派狙擊支聯會人物的手法，和人民力量攻擊民主黨大同小異。人稱狗哥的支聯會副主席蔡耀昌早前出席六四論壇，佢90年曾是學聯秘書長，但講番當年往事時，就被本土派全程柴台，可以用慘不忍睹幾隻字去形容。
Ariel
** 博客文章文責自負,不代表本公司立場 **
64晚會結束，反應熱烈，雖然感覺上這次未到歷史最高人數，最逼人時好多在地鐵逼到入唔到場，但以64過咗25年嚟計，呢個數字係好高啦。
泛民人士話，他們希望搞一個「三串燒」，先以64集會啟動，跟手發動人去6.22全民投票，然後推向7.1遊行的高潮。 但他也承認，過去64集會和71遊行並不是一對一的關係，64集會通常比71遊行多人，遇上政府民望較高時，71遊行人數更會少好多，2005年煲呔曾剛上場就係咁。
不過今年64和71中間有一個6.22全民投票，他們希望將64聲勢延續到6.22，再延續到71。
Ariel感覺參加64集會者，參唔參加6.22投票或佔中，只係一半半，有啲人相當核心，64晚會開完跟埋遊行去中聯辦。但也有些朋友分得好開，話昨晚去到9:20分就走咗，佢地嚟支持平反64唔係支持佔中，唔想聽就走。
