著名煮食網站DayDayCook(日日煮)成功進行B輪融資,由鄭志剛領導的K11投資和馬雲的阿里巴巴創業者基金投資1億元人民幣,入股DayDayCook。
鄭志剛不是省油的燈,投資DayDayCook也有多層面合作。DayDayCook已擴展至網上商貿,銷售醬料和烹飪書,又計劃在大陸擴展網下生意,會在鄭志剛的上海K11商場開煮食店,可以話諗頭多多。鄭志剛在大陸不斷開設K11商場,DayDayCook借助此網絡,有橫向擴展的空間。
DayDayCook由朱嘉盈創辦,佢本來係一個大銀行證券部主管,轉行搞煮食網,可以話係一個傳奇。朱嘉盈11歲全家由香港移民美國,佢在美國西雅圖華盛頓大學讀商業及財經學,畢業後返香港繼續入銀行做股票研究,30歲成為滙豐私人銀行證劵部主管,負責大中華區證券研究。
朱嘉盈父母都熱愛烹飪,佢從少對中式美食產生濃厚興趣,到2012年,朱嘉盈離開滙豐,出來搞煮食網站「DayDayCook日日煮」,開日日煮工作室教人煮嘢食,又拍片放上YouTube,又開facebook專頁,大受歡迎。2015年正式打入中國大陸市場。
到2016年,DayDayCook開始融資,分別獲得A輪及A+融資,合共集資7000萬人民幣。今次係進行B輪融資,再獲1億資金。
鄭志剛和阿里巴巴出得手投資,DayDayCook當然係好嘢,這個平台有4500條教煮食的短片,共有32億次瀏覽,如今在大陸每月瀏覽量2億,DayDayCook的手機應用有300萬次下載。
朱嘉盈接受南華早報訪問講到融資,佢好謙虛咁話,佢地接觸咗40個投資者,最後成功了,即係俾人拒絕咗39次,不過「被拒絕令我更堅強,是創業旅程的一部份,因為你不但會被投資者拒絕,也會被客戶拒絕,在社交媒體上也會遇上負評。」
獲得1億元新資金後,可以預計,DayDayCook 會愈做愈大。
Sebastian
** 博客文章文責自負,不代表本公司立場 **