大視野
上星期，中央財經領導小組開會討論能源問題，不過新聞焦點唔單止係講能源，而係官方報道，習近平做呢個小組組長主持會議，即係話習大大會更忙喇，十八大以來，習大大已經先後擔任國家安全委會、深化改革小組、網絡安全小組、軍委改革小組呢啲新設小組的一哥，仲有外事小組、對台小組等一直由總書記擔任組長的職務。
今次會議仲披露，隨著黨、政、軍的領導小組，習大大兼任埋財經領導小組組長，有口痕友話呢個位唔係總理做咩？其實毛拍手都記得，上任總理溫家寶時係做組長，再上任的朱鎔基時亦做過一段時間，之但係當時總書記江澤民亦擔任過財經領導小組組長喎。
毛拍手就咁睇，內地無論社會、經濟改革都進入深水區，你話經濟改革，好多時涉及的係社會、體制改革，由總書記兼任多個小組組長，可以話係更全面統籌，突破障礙。
話又講番轉頭，習大大領導財經小組，咁都可以係預示，財經領域今後應該又有大動作喇，早前北京消息已風傳，財經領域既涉及貪腐、國有資產保護，仲有國家金融安全等重大要素，由總書記去管，都可能要肅清呢啲領域的歪風喇。
毛拍手
** 博客文章文責自負,不代表本公司立場 **
呢個週末，香港政壇因為衝擊立法會搞到好不熱鬧，在內地亦不遑多讓，週六新華社出咗一單消息：「從中央紀委獲悉，中國人民政治協商會議第十二屆全國委員會副主席蘇榮涉嫌嚴重違紀違法，目前正接受組織調查。」亦引發北京政壇再起風雲。
網友可能會話，吓！呢位蘇榮，邊位呀？無聽過喎？其實蘇榮都算大有來頭，首先從現職來說，全國政協副主席，雖然被視為榮休的地方，但點計都係「黨和國家領導人」喎，政協副主席都係叫「副國級」，都咪話官細呀。
再睇睇佢簡歷，曾任三省的一把手，分別做過甘肅、青海、江西省委書記，雖然係細省兼窮鄉僻壤，但唔好忘記，愈係無錢的省份，中央支援愈多，官員要抽油水相對亦會愈嚴重。內地傳媒就相信呢位蘇副主席出事，應該係同江西過去一段時間多名官員被查有關。
圖片來源：搜狐網
人民日報的微評講得仲直白﹐題目叫：「權力有任期，清廉無時限」，內容係話班子出了事，“班長”走不了。無論什麼人、職位有多高，只要觸犯黨紀國法，就必將受到嚴厲懲處。仲有一句呀：為官者，請自重！嘩，聽落，係咪覺得呢位蘇副主席的案例，背後的意思好似講俾現任甚至係已退休的高官或者領導人聽呢？！
蘇副主席墮馬睇嚟有幾層意思喎，第一當然係其身不正，冇得救；第二貴為國家領導人級別，都冇得走；第三以前出任領導的地方出事，做阿頭的走唔甩啦；第四唔好以為退咗休就安全喎。
仲未完，今日內地傳媒仲挑出幾件事，一係呢位蘇副主席曾經高呼反腐：
「2008年12月，擔任江西省委書記第二年的蘇榮，在省委十二屆八次全體會議上提到，要防止「專案上馬、幹部下馬」的現象，他說：當前和今後一個時期，投資力度大，專案建設多，能不能抓好項目建設是對我們領導能力的嚴峻考驗，能不能在項目建設中不出腐敗問題更是對各級幹部、特別是領導幹部黨性的嚴峻考驗。」
依家聽落幾諷剌。二係佢在年前被舉報，原江西省新餘市人大常委會主任周建華的前妻姚敏建，向中央巡視組公開實名舉報蘇榮妻子涉及新餘市土地交易和建設工程的貪腐問題，而周建華因曾向紀委監察部門舉報蘇妻等人，更遭到蘇榮等人陷害。再之前佢亦都被指在2010年江西撫順唱凱決堤時瞞報死亡事故，報道有人死亡的《中國經濟時報》記者稱曾收到封口費。
聽落佢都好難脫身，而成件事更有趣的係，喺周六宣布被查前的四日，蘇副主席仲大張旗鼓，去咗青海省調研三日，全國政協同當地傳媒都圖文兼茂報道。
「6月8日至10日，全國政協副主席蘇榮到我青海省調研企業發展，視察玉樹災後重建，看望慰問各族群眾….」，青海省的一、二把手，包括省委書記、省長，仲有省政協主席，省委常委、省委秘書長，副省長等等，一大堆官員陪同考察，咁有國家級領導人到嚟考察，呢個陣容在內地官場唔算好誇，但相信呢班官員周六睇咗中紀委的公布，多多少少有啲滴汗的感覺。
最後一個教訓就係：唔好在報上看到某退休領導出嚟四圍行的照片，就覺得佢仍然好掂喎，世事無絕對呀。
