零工作大把時間 王宗堯帶長腿Chloe窮拍拖

38歲嘅王宗堯(Greg)，近年幾乎零工作，人氣勁插谷底。無嘢撈、大把時間嘅佢咪專心溝O靚妹，年初被蔡潔狠撇後，月前就溝掂23歲嘅前As One成員Chloe(蘇皓兒)。日前晚上，Greg帶長腿Chloe去銅鑼灣時代廣場Food court開餐，之後又買定戲票第日睇，兩日拍拖使300蚊，慳皮喎！

23歲Chloe，戴帽戴眼鏡冚靚樣。

日前晚上6時許，Uncle Greg帶嫩口女友Chloe去時代廣場food court開餐。二人戴帽遮遮掩掩，淡妝Chloe更戴埋眼鏡，減少艷光。見男方買咗一個套餐，兩杯嘢飲，主要係Greg醫肚，女友坐對面陪食陪笑，個樣好鬼冧。食飽飽，兩人行去戲院買定飛另日睇戲。離開時，省鏡Chloe為怕戀情曝光，被公司詐型，急速彈開，撇下男友獨對傳媒。Greg亦唔敢多嘴，只笑笑口話買飛第日睇，o依家走人。

食完個快餐，王宗堯插袋走人，一邊行一邊以舌頭撩牙

食一、兩啖就陪坐陪食嘅Chloe，間中玩手機。

把口好掂嘅王宗堯好識冧女，睇吓Chloe個樣就知！

被撞破密會，Chloe急步行開，留低男友。

據了解，王宗堯今年一月被太陽娛樂旗下嘅蔡潔狠飛，之後喺朋友聚會上識咗前度公司嘅Chloe，雖然二人年紀相差15年，但後生女單純好易o氹。而且Chloe身高167cm，有雙長腿，故過往愛嗒大胸女嘅Greg改口味，不時借講貓經親近伊人，情場老手終於喺5月得米。