昨日毛拍手被女高官以色謀權的新聞鬧醒咗，今早又再喺半睡狀態中俾另一單女高官新聞叫醒曬：「上下通吃 女貪官的親密性關係」，呵！唔好笑我事後孔明，昨日同朋友傾開呢個以色謀權時，朋友已笑話睇佢哋的外型，相信佢哋以權謀色的人會多啲喎，話口未完，今日就有料爆喇。
昨日講過墮馬女貪官靠同佢哋男性上司「親密關係」而上位，呢位揚州市環保局局長金秋芬，就指係涉貪前南京市長季建業的情婦，原來金女仕只係冰山一角。
以下呢位遼寧省鞍山市國稅局前局長劉光明就仲經典，長年靠整容保持年輕美麗，等有權勢的男人都拜倒裙下，幾年間，由普通職員坐火箭般做到正處級的鞍山國稅局局長，喺調查佢貪腐的過程中，爆出咗因為有官員話鐘意佢的PAT PAT，劉女士豪花50萬整型，整咗個號稱「全鞍山最美麗的屁股」，色誘局、區、市的大官們。
網上圖片
以色謀完權，就以權謀色，唔少墮馬女高官上咗位就對準自己的下屬，好似深市公安局羅湖分局前局長安惠君，傳聞佢外出時，指定年輕靚仔的男警員單獨跟隨，然後就…你懂的。
而呢位婆婆級的前中山市委副書記李啟紅就巴閉，調查組發現佢至少有十個情夫，最驚訝係其中一個仲係佢女婿。
至於被中紀委批為「級別最低、數額最大、手段最惡劣」的女貪官，遼寧省撫順市國土資源局原順城分局局長羅亞平，佢的好色程度更係“一流”，佢從土地審批中斂財過億，實在太有錢，除咗靚仔下屬隨傳隨到，兼要人家離婚外，羅女士睇上咗區內一位主要領導，不時送上錢物，一來係自己政治上安全，當呢位領導愈陷愈深後，有晚請領導去豪華酒店食餐好，之後就開房，攞出五萬元，扔在床上，要求呢位領導：「一個晚上，這5萬塊錢就是你的了」。結果，這位領導竟鬼使神差地跟她上了床。其後只要羅女士高興，就會帶呢位上司領導開房，等呢位仁兄發啲小財。
羅亞平(資料圖片)
嘩！係咪大開眼界呢，羅亞平最終伏法，個別的男男女女官員可以貪到咁，你話習大大全力反腐真係得民心呀。
毛拍手
** 博客文章文責自負,不代表本公司立場 **
毛拍手早上打開內地網站，被一個標題吸引住，「上半年通報查處12名女性涉貪官員 部分以色謀權」，唔好笑毛拍手色迷迷去睇美女，講到「以色謀權」，自然想見識呢12位女高官外表有幾正架啦。
搜狐網截圖
好在篇文章係圖文並茂，毛拍手唔使去再搵資料，一睇呢12位女高官的相，內地傳媒又稱佢哋為十二金釵，講真，相信同大部份人期望差距好大喎，咩佢地啲男上司高官真係咁濫？！
呢十二「金釵」最年輕喺山西高平市市長楊曉波，1971年出生，年紀最大的叫楊國玲和文家碧，已經60歲，都係退休後被調查。
內地專家好認真，研究咗女高官涉貪腐的動機，話同男性貪官有分別。
女貪官一係心理失衡，覺得女性要在工作上取得成績，比男性付出更多，見到自己付出與回報不相稱，仕途晉升又無望，好多人會心理唔平衡，轉而利用職權攞好處，甚至主動與男性貪官合謀。
仲有受感情所累或者追求高質素生活，近幾年，間中都有報道為咗美容變靚啲或者用名牌，而收賄款，好以「LV女王」遼寧撫順市副秘書長江潤黎，被查出有251個LV名牌手袋，又有女高官被揭發豪花五百萬來香港整容(唔係去南韓近啲咩)。
最後同男性貪官唔同的係，男性貪官係以權謀色，而女性貪官就以色謀權，今年落馬的揚州環保局局長金秋芬，就被爆係涉貪前南京市長季建業的情婦，毛拍手又俾張相大家睇睇，係咪有啲估佢唔到呢？！
金秋芬(資料圖片)
有時好多嘢冇得解釋，好似早幾年被內地傳媒封為部長情人的李薇，亦唔係天生明星相果種，有見過此李姑娘的部長級高官(真係部長嚟架，但佢聲稱同李姑娘無關係)曾經對毛拍手話，李姑娘雖然不是天姿國色，但能言善道，對答得體，該溫柔時溫柔，對相對只有工作工作再工作的高官，都唔好話冇吸引力。
當然好似因涉中石油貪腐案，而走佬的美女富豪劉迎霞咁，又有樣又識哄人，喺內地官場要上位就更唔係難事啦。
劉迎霞(資料圖片)
總之都係呢句，隨著反貪腐力度加大，無論以權謀色或者以色謀權，呢啲遊戲都係少玩為妙啦。
