「佔領中環」全民投票結束，有78.8萬人投票。佔中發起人戴耀廷今早在電台話，由於三個方案都有公民提名成份，佔了投票人的91%，中央要正視。雖然真普聯方案獲得最高的四成票數，但結果卻變成爭取公民提名，而不是真普聯方案。
雖然《基本法》內完全無提「公民提名」呢樣嘢，但戴教授仍然話「可以實現」。理論上除非修改《基本法》之外，不知有何方法可以實現公民提名，而不會被人在法庭挑戰違憲，煩請法律學院戴教授指正。
睇呢次佔中公投，完全了解到乜嘢叫做漸行漸遠。由本來公投有開放性的選擇，在激進派突襲後變成三個方案都有「公民提名」，然後搵市民投咗票，無論你揀邊個方案都一樣，都有公民提名成份，變成非要接受公民提名不可。
沒有公民提名成份、但亦可以好民主的方案多如恒河沙數，最簡單一種就是提委會十分一成員個人提名，既和《基本法》無明顯抵觸，也是可讓泛民入閘的方案，但在佔中公投中這些方案被踼出局。無怪乎在半夜的公投記者會上，除了「真普聯」召集人鄭宇碩和人民力量等激進成員外，無其他泛民成員出席，因為他們的方案早早被排擠出去，自然也不想為呢個行動站台了。
無綫新聞截圖
第一步將公民提名等同真普選方案，第二步在公投中確立公民提名的地方(揀三個方案求其一個都有此效果)，第三步就是曬冷逼阿爺就範，學民思潮和學聯搶繮提早佔中，計劃明日遊行後，包圍和佔領中環遮打道以及金鐘特首辦，並留守至翌晨八時。
這是一個玩曬冷的遊戲，由年青人和激進派主導，令人懷疑戴耀廷等佔中三子最後能否領導這個運動的方向。現在如玩話事啤(Show Hand)，佔中派先得公投一張好牌，再攞埋明天的遊行牌，跟手佔中，就等如將所有注碼推上枱面，同阿爺賭一舖。呢種玩法無得雙贏，一係佔中派贏晒，一係阿爺贏晒，無數講，無得雙贏。
阿爺的決策選擇相當有限。政府中人有一種分析，話而家佔中派只是開價，未到高潮，到高潮時應該會埋枱講數。但我實在看不到現時提早佔中的年青人想講數，他們似反枱多過講數。咁搞落去，我真係怕遲早玩出火啦。
盧永雄
阿爺同特區政府研究削減自由行，開始有啲眉目，消息話可能將「一簽多行」(實際上是「一簽無限行」)，改為「一簽N行」(N係一個實數)，有可能係「一簽52行」。
收緊自由行源於反對太多內地旅客來港，人多擠逼的情緒，開始時有意見話不如把「一簽多行」改為「一日一行」，因為有些水貨客一日來好多次，改「一日一行」就可以打擊內地人來香港走水貨，但後來覺得只改做「一日一行」唔夠，可以縮減的人數有限。
要了解成件事，首先要明白所謂自由行係一種「一簽多行」的簽證，大陸發咗簽證俾內地人，佢地揸住個簽證就任嚟。根據政府的數據，去年訪港旅客總數為5430萬人次，內地旅客有4075萬人次，其中又有1215萬人次通過「一簽多行」訪港。
如果個大陸客一日嚟幾次香港，呢啲所謂「一日多行」旅客，形跡相當可疑，都好可能係水貨客，所以就有限住「一日一行」之建議。但商務及經濟局局長蘇錦樑月中透露，過去的12個月內，呢啲「一日多行」的旅客只佔3.5%，數量有限，限咗佢地每日嚟一次，作用也不太大。
所以就有一年內「一簽N行」的建議，例如「一周一行」，即係一年「一簽52行」，雖然聽聞政策未最後定，但都係傾向呢類「一年52行」、「一年26行」(兩周一行)的政策。現實上大多數自由行客一年嚟5至10次，佢地包括高質素的旅遊客或商務客，特區政府最唔想影響到佢地，預計「一簽52行」對佢地影響不大。而深圳亦鐘意「一簽52行」，因為深圳有200多萬有戶藉居民可以攞「一簽多行」簽證來港，改為「一簽52行」，若他們想來香港買日用品，一個星期嚟一次都OK，呢種改動深圳居民無咁大反對。至於內地水貨客，一個星期只能嚟一次，咁就無得做啦，變成走水客都係香港人自己走，阿爺此舉有「走水貨都係你地香港人自己走，唔好怪我」的味道。
雖然內地同香港政府都想把削減自由行的影響降低，但我覺得一開始減，就預示自由行呢個政策對香港經濟的良好影響，開始從高峰滑落。自由行最好食的肉己食盡，最優質的客本來已開始有好多選擇，可以去倫敦巴黎紐約，不一定要來香港(法國等一直在放寛大陸客簽證限制)，而香港政策再限一限，雖然唔直接影響到那些一年嚟十次八次的旅客，但佢地都會諗諗去第二度。
香港做來做去都係那幾瓣，金融、地產、旅遊、航運，若講就業就加多一樣大型基建。呢兩年金融放慢，地產方面政府唔佢太熱，航運早已夕陽，連旅遊都見埋頂的話，好似個波拋上半空，過咗最高點開始跌落嚟。一兩年內就業都唔係問題，但長線少少就好難講啦，而家係時候諗諗橋，唔做咁多內地客生意唔緊要，要搵啲新生意嚟做先至得啦。
盧永雄
