觀賞日出定日落的「條款」

好多事，真係好多事發生過的立法會今個會期終於結束，最後關頭，辣招稅有驚無險下，草案以49票贊成，7票反對通過。

財經事務及庫務局局長陳家強話感到高興，認為條例草案在暑假前獲通過，是對市場傳出正確訊息，希望有助樓市平穩發展。除咗呢啲例牌發言，Ariel仲留意到家強局長仲話一年內將會向立法會檢討有關條例，會密切注意市場各項指標，對樓市作適當調整。

知情者話「一年內檢討」係同經民聯等工商界議員妥協的結果，佢哋讓步支持，政府就承諾檢討，唔知市場會唔會當做利好消息炒作吓，但呢個檢討並無任何承諾，講得幾闊吓，依家樓市係升緊唔係跌緊，到時檢討完調整可升可跌，到時再收緊都得。

記得當初推辣招草案時，有議員提過設立日落條款，例如三年後自動撤招，到時有需要時先再立法，呢個提法就強勁好多，因為必然會睇到日落，但依家一年內檢討，就係到時睇吓啫，係觀賞吓日出定係日落的條款，效用就應該不太大啦。

Ariel

** 博客文章文責自負,不代表本公司立場 **

特首CY向中央提交政改報告，這是政改五部曲的第一步，雖然大家都對立法會能以三分二通過政改方案殊不樂觀，但走出普選第一步，總好過一步都唔行。

無論政府的諮詢報告，以至特首向中央提交的報告，都無驚天動地的內容，甚至無直接否定公民提名。倒是CY見記者時的開場白引起我的注意，佢話「我和特區政府會繼續發揮好香港各界和中央之間的橋樑作用，加強溝通工作，務求香港的政制發展可以在多方共識之下，及時向前跨出歷史性的一大步，達至《基本法》訂立的普選目標。」

過去CY在政改問題上，都跟中央跟得比較緊，未聽過他講自己做「橋樑」。今次佢咁樣講，既和阿爺拉開了一點點，亦似乎想拉溫和泛民同阿爺傾。其實政務司司長林鄭亦有一句，話「我們必須有勇氣和智慧在狹窄的政治罅縫中找尋最大共識」，亦有想泛民和阿爺求共識之意。

有八卦友話，而家泛民都明言8月底阿爺一亮牌，佢地就佔中，CY而家講「做橋樑」會唔會遲咗啲? Ariel就話政治千變萬化，未到終場，不知結局，如今CY同林鄭都力推講數與共識，又無人敢講佢地百分百唔得。上次政改都無人睇好，卻在最後一刻達成共識，事前邊個估到? 各方努力吓啦。