前政制及內地事務局局長譚志源Raymond去年7月行出政府熱廚房後，先入私人機構，去前老細、南豐集團主席梁錦松創辦的新風天域集團，但之後無幾耐就離開，由於去向未明，今年11月立法會九龍西補選在即，甚至有人傳佢會去參加補選。
聽聞真係有人試吓去搵Raymond 譚參選，但佢興趣不濃，謎底終於揭曉，原來佢將會加入馬會，出任馬會公司事務執行總監，掌管內地事務部和公共事務部兩個部門，據聞他將會在8月中返工。
譚志源 (資料圖片)
上任馬會公司事務執行總監是麥建華，離職近兩年，佢去了明愛專上學院及明愛白英奇專業學校做校長，投身教育界，並且相當成功，但馬會一直未能覓到合適人選替代他。
馬會行政總裁應家柏之下共有10名執行總監，2017年這10人年薪由近400萬至超過1200萬不等。馬會行政總應家柏年薪更超過2400萬。星島話譚志源今次加盟馬會，年薪就高達500萬，較問責局長380萬年薪多出120萬。
如今已是港區全國人大代表的譚志源，加入馬會，被政圈中人形容為「屈就」，但性格八面玲瓏的譚志源，加入馬會如此重要的公營機構，未來大有發揮餘地。但建制派就好難搵佢去補選了。
Ariel
** 博客文章文責自負,不代表本公司立場 **