政改爭拗太悶。這是不少朋友向我反映的意見，叫我不要寫這麼多，這些文章不會有人睇。這也是實話。
2012年3月，當梁振英和唐英年兩個人競爭做特首，爭到面紅耳赤時，當《頭條日報》連續7日找唐梁之爭加選舉醜聞做頭版後，有一個12歲小朋友對我說:
「《頭條日報》可唔可以唔再搵特首選舉做頭版新聞?」
「Er….乜你唔覺得佢地爭得好激烈咩?」我問。
「日日講，都係咁啦。」小朋友答。
「Er…乜你唔覺得咁多醜聞爆好精彩咩?」我嘗試遊說一下。
「都唔使日日咁做頭版啩?」小朋友很堅持自己的立場，覺得好悶。
或許小朋友就如看到無穿新衣的皇帝一樣，只是講出多數普通人的觀感。連最激烈的選舉也是如此，可以想像，普通市民如今見到日日拗政制，興趣不會太高，只想早早佔中，早早收場，不要講極都唔完。
這樣悶的題材，我又想講，唯有好似黑澤明的電影那樣，講吓羅生門，講吓不同版本。照目前形勢睇，泛民反對阿爺定出的框架，會力爭在立法會否決政改方案，跟住原地踏步，好大機會又是1200人選委會選舉，這樣選舉最可能是梁振英對一個泛民，例如民主黨主席卿姐之類，或者泛民杯葛唔玩，由CY對一個輕量級人物。
你可能會問，為何不能像2012年那樣有激烈的競爭，我話「唔會啦」，我始終懷疑，上屆選舉時，阿爺個心好早就轉了向CY，唐唐變了假熱門，真陪跑。大家不要忘記，那時剛好是內地換屆的咸淡水交界，暗中轉軚有幾出奇? 到下屆若仍是選委會選舉，就不會有意外啦。這樣就比上屆更悶，結果合埋眼都估到啦。
有變數的反而是有普選。人大常委會決定特首普選有兩至三個候選人，我馬上想到，若有普選，2017年有那兩、三人參選? CY當然照唱「永不放棄」，照樣出戰啦；政務司司長林鄭去馬，也無人可以阻止她參選；還有最可能的是前財政司司長阿松啦，亦會出賽；鹿死誰手，未可預知。
有人話阿爺唔會俾人咁去挑戰自己屬意的人馬。問題是若阿爺屬意CY，他勸得退林鄭和阿松嗎？上次支持唐唐有285票，也是不聽阿爺話的票，這些人下屆會那麼順攤不支持其他人挑戰CY嗎? 還有泛民的100多票，他們也可以支持人去參賽。CY之外，另有兩人入閘的機會相當大。到過半數那一關，阿爺好難話林鄭和阿松不愛國愛港不讓他們參選，說到底中央曾任他們當主要官員，受過中央任命，他們任內任後那有對抗中央呢? 怎能不讓他們參賽呢? 所以一有普選，哪怕是有篩選的普選，一定有得爭，無咁悶，有睇頭。
假如2017年普通市民都有得投票，總會好玩一點吧。
盧永雄
