金多寶說故事 第4回
年少好奇前程事 盲翁算命贈鐵斷
30年前，西營盤第三街同正街街市交界，多男酒樓附近，某一啲日子，都會見倒條好長嘅人龍，排住隊揾一個戴黑超嘅中年男子問事，我老帽亦唔例外。我問過我老帽：「個盲佬叫咩名呀？」我老帽好正經咁話：「佢叫盲佬。」我冇再理佢，好專心咁偷聽前面個阿姑問乜，八下私隱。果日我老帽問盲佬，我阿哥出國讀書，定係响香港買樓結婚生仔好，個盲佬攞住幾個銅錢，敲下個龜殼，唔知佢做乜就倒番啲錢出黎，摸下啲銅錢，又入番落去，重複左幾次，我老帽睇到個樣好很緊張，跟住盲佬用手指算下，個口細細聲噏左幾句，就話：「佢出國會好....」就係咁我老帽磅水比佢，咁就一百蚊。
問題係，老帽真係送左我阿哥去讀書。點解我老帽會咁聽個盲佬話呢？於是我問我老帽，佢話：「個盲佬好靈架，乜都知。」世上有人乜都知，但我又乜都唔知，咁我嘅人生仲有乜意義？啱啱果排新年，我攞左一百蚊利是錢，趁老帽訓晏教，偷偷去左第三街，個盲佬真係响度！我好想知個盲佬係神棍定係神仙。盲佬問：「你想問乜野呀？」我都唔知問乜好，隨口話：「你幫我睇下我將來會遇到咩事？都係唔好講咁遠，就講到我二十歲前。」果陣我得十歲，個盲佬問我時辰八字，好快就講左幾樣野比我知，其中一啲預言，令我畢身難忘。
大概記得，佢叫我一生人之中，記住唔好發脾氣，「你一發脾氣，就會冇運行」冇運行喎！好驚呀真係，呢世都記住呢句啦，但邊有得唔發脾氣？佢話：「拿，你一嬲，就唔好出聲，咁就得啦。」及後我每次發脾氣鬧人，都會令到相方唔再見大家，其實對方一定係好難受，而我就咁斷送左幾段好姻緣。第二樣，就係話：「大概18、9歲响學校會遇到麻煩，讀書會停滯不前。」果然我遇到個班主任個仔患左絕症，無緣無故好憎我，迫校長迫我退學，勁冤枉，好在最後武士，但事件非常影響我學業。最後一樣，就係：「你成世人都冇大病大事，只係永遠都有肚痛，不過一定冇事。」痴孖筋，個肚長年365日，咩原因都好，真係會長期痛。係我聽完入左腦先痛，定係真係有小毛病？如果係心理作用，關於學校嘅預言，又點解釋？我唔知盲佬收費價目表，不過佢真係收左我一百蚊。
盲佬响20年前左右，冇再出現過，我老帽話：「佢應該冇左啦。」果一刻我心裏面不停咁諗，果陣真係笨，應該問到佢40歲前我會點，因為而家自己都覺得前路茫茫。
香港兔蘆術數學會
** 博客文章文責自負,不代表本公司立場 **