政事
朋友話睇到港台有單新聞幾搞鬼，報俾Ariel聽。
港台在5點27分出咗單新聞，條題話「黎智英圖爬過鐵馬離開，稱對情況始料不及」。內文話黎智英出席政府總部佔中集會，嘗試爬鐵馬離開集會現場，並說若能成功走出封鎖線範圍，便不會再返回政總外集會。港台又報道，話黎智英對現場情況發展始料不及。
港台新聞網頁截圖
Ariel又搵搵蘋果即時新聞，無報道肥佬黎爬鐵馬走，但在5點38分出段新聞，話「黎智英走出馬路與市民齊留守」，唔知係唔係想間接澄清港台段新聞，話肥佬黎仲在場。至於港台報肥佬黎話「對現場情況發展始料不及」。在蘋果的報道中變成「被問到事件發展至今是否始料不及，他回應話梗係估唔到，啲人咁叻」。但Ariel覺得現場俾差人封到咁實，鐵馬咁高唔易爬，肥佬黎想走都未必走到啦。
到在7點38分，蘋果即時新聞再發咗條消息，話警方在傍晚多次施放催淚彈，在場的肥佬黎亦中招，需要以水及毛巾抹面。事後睇番，若然肥佬黎在5點幾見勢色唔對想爬欄走人，又真係幾有先見之明喎。
Ariel
** 博客文章文責自負,不代表本公司立場 **
佔中終於啟動，金鐘、中環一帶交通癱瘓，警察多次使用催淚彈，學聯同學民思潮提出四點要求，包括要行政長官梁振英及政改三人組下台，否則明天發動罷工、罷市及無限期罷課，教協亦號召全港教師罷課罷教。由普選爭議的局面陷入混亂之中，後向未明。
出現依家局面，唔知係咪參與者同特區政府的預期之內，問題係人大常委已強硬落閘，有冇可能因為這個局面放軟呢？
Ariel去問問熟悉大陸政治的高人點睇，佢叫番我去睇習大大前幾日見工商及專業界訪京團時的講話。當中習大大講到香港繁榮穩定，是全體香港人之福，香港動盪不安，是全體香港人之禍，中央堅決支持特區政府依法處置各種破壞社會秩序的違法活動，也相信特區政府有能力維護香港穩定，習大大又話，唔容許任何激進違法活動搞亂香港，危害香港繁榮穩定的大局。雖然無點明，但明眼人都應聽得出，習大大係講緊佔中，中央支持特區的態度幾堅定。
高人話依家的局面，一係就放軟，一係就硬落去，佢覺得今次普選引發港人出現咁大的爭議，佢估阿爺會企硬之餘，不能排除阿爺諗諗吓行多一步，不如中止普選啦。根據基本法，人大常委會有權決定啟動普選程序，同樣有權終止呢個程序，現時未啟動五步的第三步，社會咁大分歧，都可能考慮中止。睇高人估阿爺企到咁硬，真係無眼睇啦。
