政改諮詢出台前，政府新聞「心戰室」大換班，最受矚目當然要數前民主黨中常委馮煒光「大熱」跑出，成為新一任IC(新聞統籌專員)。
話說大半個月前江湖一度傳出馮專員可能墮馬，當時我哋Gossip吧，亦都湊熱鬧寫咗篇文，話收到消息指佢仍然大熱，人選好快會公布。拙文一出，有記者、新聞處人員、政務官都向馮生查問佢前程，本來外界預咗當事人一係否認，一係承認，又或者繼續「不予置評」啫，點知做得專員自有出位之處，馮生竟將本網拙文的連結射俾打聽的人士，將拙文當作回應! 聞說收到行家或者政府中人叫到咁新穎的回應都「O」曬嘴，唔知應該點理解。
馮生的創意手法，惹來有人質疑本網「巴士的團隊」同馮生「打籠通」，傳聞係咁，話佢見政府咁耐都無聲氣，怕件事冷冷吓就死咗，所以特登搵我地為佢放料，保持熱度之餘，又向政府施吓壓咁話。查實「巴士的團隊」都想在此鄭重澄清：真係冇呢回事！我地出篇文之前甚至無聯絡過馮生，大家唔係咁熟。
馮生雖然未上任，已十分留意傳媒的報道，本網其中一位博客chanchan傍晚上載博文論及新專員任命，馮生即留意此段落：”為認識梁振英，曾專程到其山頂跑步的路途跑步，並在事前熟讀其文章和對問題的看法，以便交談”。
並作出以下回應：
「沒有其事。我跑步的途徑是由海怡至淺水灣（有過去數月Facebook和微信為證）。根本不可能見到梁生。」
馮專員連博客文章都睇埋，馬上回應，至少勤力一樣可以攞分啦。
不是冤家不聚頭乎
機場三跑道帶出高球場用地之爭，機管主席張建東同董事會成員羅康瑞拍曬枱兼反面，有時世事就係咁玄，兩位都係政商名人，又熱心服務出任不少公職，仲要同科大好有緣，一個係科大校董會主席，一個係科大顧問委員會榮譽主席，科大有活動，都好難避免同場出席。
今日科大邀請咗諾貝爾經濟學獎得主Christopher Pissarides 教授來主講，在一個午餐會，兩會科大高層不單止碰面，而且仲同枱用膳，當然我哋都深信兩位都係發展理念上有些少分歧啫，唔係有咩「深仇大恨」。不過有與會者發覺兩人全場都近乎零交流，難為了坐於中間的Christopher Pissarides教授夫人囉。
巴士的團隊
Ariel
** 博客文章文責自負,不代表本公司立場 **
會德豐主席吳光正上周宣布將主席一位，交棒俾兒子吳宗權，在富豪圈議論紛紛，事關吳主席現年只是67，仍然有心有力，早排還和兒子吳宗權一起落水游冬泳，曬肌肉，使唔使咁早退休? 難道難道又係同好多聲聲否認的人一樣，又想走去選特首乎?
去索一索料，發覺吳主席唔會再趕特首賽這趟混水了，他有一份好正的工做緊，就係政協第一召集人啦。
外界無乜注意呢個位，其實係一個超級筍位，大家都知香港有政協副主席，由退休特首董伯伯做緊，呢個位之下，就係政協常委中的召集人位置，即係港區政協的大佬，過去由徐展堂做，但徐展堂不幸在任內過世，今年三月政協換屆時，阿爺就要思量由誰接任。
論活躍程度本來政協常委陳永棋都好活躍，亦剛卸任廣東社團聯會和香港友好協進會的領導職位，夠資格做政協召集人。不過睇番資歷，另一政協常委吳光正在政協內比棋哥資深，也是有頭有面人物，唯一美中不足的是要管理會德豐、九倉咁大個集團，有少少分身不下。不過一問之下，原來吳主席已有退位的打算，話已部署好交棒給加入會德豐近10年的兒子吳宗權，退任後啱啱有時間打理政協的事情。
既然係咁，阿爺就安排吳光正做政協第一召集人，陳永棋做第二召集人，有乜事都搵佢地搞。而家政協一年有兩次到內地各省市調詽，最近去廣西，由政協副主席董伯伯親自帶隊，之前六月去了一次寧夏，就係由吳光正帶隊。
政壇八卦友話，政協召集人呢個位係好位，地位僅次於副主席，做得好或許可以更上層樓，若然係咁就唔受政協常委要70歲退休的限制。加上做召集人相當威水，返內地各省市都受重視。另外到2017年特首賽開鑼時，各方豪強也要俾政協召集人幾分面子，因為召集人手上有不少選委或提名委員會的票。所以吳光正交棒兒子管生意，自己搞政協玩高層政治，都係正路波呀。
名咀無價
昨日中大社會科學院副教授沈旭暉小登科，在會展請飲，賓客犀利啦，有特首CY、政務司長林鄭、財爺鬍鬚曾，仲有前特首候選人唐英年、前律政司長黃仁龍、還有港視主席王維基，粒粒皆星。
晚宴最頂癮係播放唐英年夫婦片段談夫婦相處之道。唐太郭妤淺唔知係唔係切身感受，寄語做太太要有危機感。唐唐就叫沈教授要有修養，因為世界有好多騙子，仲要小心「語言偽術」咁話。
沈教授發言多謝了三十個人，左中右都有，不過無多謝捧場的CY。有旁觀者嘆道，唔知點解咁多人爭住做特首，做咗特首婚宴都要去，俾人贈慶仲要陪笑。另一個感嘆係做名咀真爽，佢地結婚成個政府、各大政黨都要嚟捧場，真係名咀無價囉，巨富蔡志明個仔蔡加讚結婚，都無呢種排場喎。
巴士的團隊
