旺角佔領區就快變會所

學聯同政府的對話拉倒，佔中唔知點收科。隨住「佔領」時間日久，示威的市民開始諗出各種打發時間的活動，形式「佔領區」的奇景，搵來社交媒體上熱傳的相片睇吓。

 

先有宜家特價單人床，依家就碌架床都砌埋出來，好似睡房搬到街上。

想聚埋傾偈，有呢個吹水區。

佔領者除咗有物資供應站提供的乾糧，仲可以自設街上打邊爐食大餐。

悶悶哋，唔怕，有人搬張乒乓波枱出來，打翻幾場友誼波。

 

係咪好似會所咁呢？咪算，麻雀都開到幾枱呀。應該可以係示威佔領活動的奇景啦。

Ariel

** 博客文章文責自負,不代表本公司立場 **

今日見到所有泛民一家排開見記者，唔止學聯、學民思潮，仲有佔中三子和泛民各政黨代表，睇落個格局唔同晒，一個鬆散聯盟已成型。

Ariel聽講係肥佬黎同李馬丁等對佔中運動由學聯揸飛，好有意見，認為要由泛民主導，最好方法就是組成聯盟，所有人一齊入晒去。你知開會講民主原則，8、9個人坐埋一枱，學聯只佔一份，一舉手，就唔到學聯話事。

泛民中人話，組聯盟呢件事在周初已開過會醖釀，想傾掂就昨日見記者，但最後傾唔掂。跟住就發生陳樞機重炮轟學聯事件，直斥學聯騎刧佔中。班學生仔唔受得咁大棍打，唯有就範，今日就一齊企出來見記者。雖然佢地無話組成咗聯盟，但係就唔再係學聯、學民，或者加佔中三子見記者，而係加埋一班泛民見記者，出現乜嘢變局，「你懂的」。

泛民主導整個運動後，鬥爭重鎮由街頭轉向議會，泛民做主角，街頭示威只是配角。運動目標由爭取真普選，變成為倒梁，至於倒梁和爭取真普選有乜必然關係，就無人深究，又係佢地講咗就拍板架啦。