送狗迎豬之際，娛圈又添一宗喜事！
現年五十一歲的前無綫藝人黃澤鋒，一〇年跟圈外女友陳麗麗拉埋天窗，眨下眼已結婚八年。上月十七日，他於社交網上載了一張粉色的BB手套相，宣布自己將做爸爸；不過，最令人嘖嘖稱奇的是，黃太原來已經五十二歲。這名「超」高齡產婦，更引起全城熱話。
黃澤鋒和老婆。網上圖片
一直渴望有下一代的澤鋒，向《東周刊》透露曾被人嘲笑：「冇人擔幡買水」，老婆懷孕初期又驚險百出，幸好終獲上天眷顧，保得住BB，全家上下都好感恩！而為迎接BB來臨，兩夫妻已開始做準備，打算買定教育基金，果然為人父母，長憂九十九。
上月十九日，眉開眼笑的澤鋒，一收工便火速會合老婆撐枱腳，爭取時間「三人行」。(東周相片)
黃澤鋒公布老婆有喜三個月後，連日來不斷收到各方好友的祝福。而一夫當關的他，對照顧老婆和腹中BB無微不至，除了負責車出車入之外，又不讓老婆拿重物，還頂替她的工作，努力賺奶粉錢。
〇四年經歷過一次婚姻失敗後，澤鋒於一〇年與拍拖一年的陳麗麗「閃婚」。(東周相片)
身為五十年代飛魚的澤鋒，仍有參加渡海泳，太太當然到場支持。(東周相片)
上月十九日早上，心情大好的澤鋒，教完游水後，就急急腳趕去陪伴老婆。兩公婆會合後，他為遷就大肚婆的口味，便到了快餐店食午餐撐枱腳。由於近月是流感高峰期，黃太出入都戴上口罩，份外小心。二人選好午餐後，他便小心翼翼地安頓好老婆坐下，然後才去提取食物。黃太對食講求營養，故挑選了紅米飯，另配上蔬菜和肉；席間，澤鋒又將自己的餸菜夾給老婆，非常體貼！他們邊食邊談天，而話題總不離BB，十分幸福。
原來，澤鋒夫婦一直都好喜歡小朋友，可惜未能從心所欲；去年六月，黃太辭職，因為輕鬆的心情加上足夠的休息，他們竟然自然「造人」成功，預產期是七月。他坦言︰「我哋結咗婚將近十年，今年係我哋最後嘅一年想自然懷孕，如果仲未有嘅話，我哋都決定試吓領養，o依家個天已經送畀我，無論仔或女都OK，都好開心。之前，我仲畀人笑，唔生仔就冇人擔幡買水，我心諗我瞌埋眼咩都唔知啦；不過，o依家有咗BB，算係完成自己一個心願。」此外，黃太是家中的長女，近年患有老退化症的父親，有日突然開口說想抱外孫，她憶述︰「當時我啱啱有咗又唔講得畀佢聽，但最後我都忍唔住，見到佢嘅笑容，我就開心！」
更多娛樂消息，請看東周網：http://eastweek.my-magazine.me/main/entertainment
