無綫流失4點收視

港視揀正無綫台慶日開台，無綫的《萬千星輝賀台慶》收視受壓，只得25點平均收視，較去年流失個4個收視點，失去26萬觀眾。

《萬千星輝賀台慶》平均收視25點，約162萬人次收看，最高收視時為28點，182萬人次收看。無綫透露，當晚最高收視點為晚上10時的29點，即藝員黎諾懿獲得百萬獎金獎品及無綫主席梁乃鵬和邵六嬸切蛋糕儀式的一刻。

其實去年因為有免費電視牌照風波，無綫台慶的平均收視29點，最高31點，已比2012年少了5點。換言之，兩年累計無綫台慶收視跌了9個點，少了58萬觀眾。

另一邊廂港視公佈收視，話前日開台首日有超過64萬個裝置透過電視、手機或電腦收看港視節目。截至前日，全港各種收看裝置下載港視app的次數達106萬次，當中72.3萬為手機或平板電腦app、34萬為透過電視或機頂盒下載。

以港視在開台日有64萬個裝置收看計，估計無線當晚流失的26萬觀眾，多數是流失去看港視節目。無線透露當晚最高收視是10時黎諾懿獲得百萬獎金獎品及切蛋糕儀式的時段，而非9時許祖藍求婚的時段，這個狀況亦好容易理解，祖藍求婚是「突發事件」，事前並無預告，無人特登去睇。那20多萬無綫流走的觀眾，在8、9點開始睇港視劇，睇完轉番台睇番無綫，剛好睇到台慶收場，所以變成台慶尾段最多觀眾。

問題是港視開台日也只是有4個點的收視，這已是聲勢最大的開台日收視，往後如不上升，不夠養活一個電視台。但無綫再流失4個點的收視，卻也慢慢入肉了。

Ariel

** 博客文章文責自負,不代表本公司立場 **

下星期二係11月最後一次行政會議(11月25日)，傳聞行會將在此次會期中，考慮電視續牌的問題，特別係亞視續牌的問題，如果亞視在下周二前未搵到新買家，睇嚟佢的牌照都凍過水啦。

無綫同亞視的牌到明年11月底到期，按規定如果不獲續牌，政府要提前一年通知，即係話如果下周二行會有決定，亞視不獲續牌的話，佢就可以按原來牌照的期限，經營到2015年11月30日。為了遵守呢個一年通知的規定，行會可以將啲牌照延期，例如行會12月30日先決定唔續牌俾亞視，亞視就可以經營到2015年12月30日啦。但係既然牌照期限已到，行會拖住唔決定，雖然有規定可以依啫，但喺目前的政治氣氛，政府係咪願意為保留亞視個牌，再被人多粒彈藥去攻擊呢？

亞視近年都搞得幾差吓，好多節目收視得個一、兩點，如果行會下周開會，講到通訊局的建議，憑常理通訊局係唔會建議俾亞視續牌，亞視唯一的救命草係在行討論前，有新買家提出收購入場，行會可以因為呢個理由暫緩作出決定，然後等新買家提出新建議後，交通訊局再研究。

聞說亞視賣盤一直唔成功，主要投資者王征始終吊高嚟賣，唔肯減價，仲有個傳聞佢說寧願清盤都唔降價，做生意做到佢咁有原則，都可以話係一個奇葩。

雖然世界的事情可以一、兩日內有轉變，但亞視的生命都似係在倒數之中，未來幾日相當關鍵，如果王征的目標只係壓到最後一、兩天，攞到最高的價錢就成交，亞視仲有一個生機，如果王征真係寧願清盤都唔降價，亞視都好大機會不獲續牌啦。