港視魔童王維基揀無綫台慶日開台，有心搶無綫生意，結果無綫的《萬千星輝賀台慶》收視受壓，只得25點平均收視，有162萬人睇，較去年流失個4個收視點，失去26萬觀眾。
每個收視點約等如6.5萬人，跌4個點的收視，等如流失了13.8%的觀眾，無綫只是刺傷手指，流幾滴血，並未入肉。無綫擁躉會話，「港視開台講到係威係勢，都只係搶走4點收視，點同無綫鬥呀? 而家只係新屎坑，時間一長，港視又變番1、2點收視，咪又係另一個亞記！」
當然，魔童擁躉亦會駁，「港視剛開台，網絡又塞車，都搶走無綫4個點、26萬觀眾，一砌上去，搶佢10個點、20個點，拉走幾十、一百萬觀眾，無綫就大鑊啦！」
這是一杯水是半空還是半滿的問題，受主觀喜惡影響。我嘗試從觀眾想睇多點好戲的角度去看，就覺得港視稍嫌衝擊力未夠，要泵多啲水，加把勁。
先從收視角度講。魔童話周三港視首日開台已有64萬個裝置收看，超出預期。當日收看港視已相當塞車，周四晚又再出現塞車狀況。港視講過超過40萬裝置就不能讓再多人收看，但周三晚無綫流失26萬觀眾時港視已塞車，令人懷疑港視同時有30多萬個裝置看已頂不順。
如此看來，港視拿了無綫4、5個點收視，再多自己系統已負荷不了，但這種收視遠不夠挑戰無綫的地位噃。
講少少無綫亞視競爭的歷史，講近一點的99年亞視播《還珠格格》一役，套劇收視好高，第二集最高有23點收視，大體上《還珠格格》有17點收視，相對無綫同時段收視跌到25點(當時同一時段有較高的40幾點收視)，即是亞視攞到三分一收視，才叫做可以郁一郁無綫，搞到無綫要救亡。如今港視若要撼動無綫，也要攞到三分一收視才成，以現時同一時段總體約30點收視計，港視若取走10個點即65萬人次收視，無綫就標血，就會開始痛啦，現在未到。
再從廣告角度講。電視台的收視是講同一個時段的收視率，港視話開台日有64萬裝置在收看，這是全日攤開的數字，黃金時段最高峰有多少人看，20萬? 30萬? 還是40萬? 若只是20零萬人睇，4點收視，賣不到好價錢。正如有線電視台有百幾萬訂戶，那些人不是免費下載一個應用程式，而是付了200多元月費，但也不等如黃金時段好多人睇，聞說有線同一時段最高也只是2、3點的收視，廣告也賣不到好價錢。所以港視要在黃金時段拿下60、70萬觀眾同時收看，才有希望收到較高的廣告費用。不然的話，花這麼多錢去拍劇，等如煮鮑魚俾人食，只收叉燒價錢，食的人覺得幾好，開酒樓那個無命。
魔童選擇拍劇和無綫鬥，這是一種熱戰方式，要自己先大量出血，才可以殺傷對手流血，才可以逼敵人出真工夫。無綫有的是錢，逼得它緊一點，他套套劇都好像《衝上雲霄2》那樣，出多點明星，去多點歐洲拍外景，觀眾才可以多點嘢睇。魔童，加把勁吧！
盧永雄
