金紫荊章值四萬幾

最近有知名人士獲頒金紫荊星章，朋友賀佢獲獎之際，順便攞個獎章把玩，攞起手發覺非常之重手，一問之下，才知道成舊係真金，個獎章價值4萬幾元!

真係唔問唔知米價，過去見到呢啲獎章，以為係鍍金嘢，唔值錢，原來金紫荊章係真金做，由景福金行幫政府鑄造，政府只送出一個大章，得獎人如果想要多個細章，要自己俾水同景福買，盛惠1萬2千大元。

有八卦友見金紫荊章咁值錢，發哂牙痕咁話，金紫荊係金，銀紫荊係銀，銅紫荊係銅，咁銀章、銅章就差太遠啦，好似銅紫荊，得舊銅，唔計手工，個章的材料真係十蚊都唔值，衰起上來，攞個章佢賣都唔值錢啦。你去歐洲例如俄羅斯，去好多舊物市場，真係有人攞啲戰爭勳章出來賣，不過香港又唔多見有人賣呢啲嘢。

不過有新聞處高官就話，呢啲勳章「價值不在乎金屬成份多少」。係唔係咁真係見仁見智啦。

高官講起設計勳章有段古，話說97年回歸之前，候任特首董伯伯要在7月2日頒勳章，當然不能頒番之前英國人頒的CBE，OBE，MBE勳章啦，就拿拿臨要新聞處去設計。原來有本外國書講各國勳章，新聞處捧住當聖經嚟參考，最後主要諗勳章簡寫和過去的比較接近好啲，例如大紫荊勳章叫英文Grand Bauhinia Medal，英文縮寫叫GBM，同之前的都似似地就掂啦。仲有勳章的靚靚絲帶唔易買到，就叫港府倫敦辦事處撲啲英國貨嚟頂一頂檔。當日的勳章設計，就沿用到今天。

巴士的團隊

Ariel

** 博客文章文責自負,不代表本公司立場 **

政改先剛剛開始諮詢，特首跑馬仔已搶閘。《巴士的報》早前報道曾主席和阿松「孖咇選特首」後，曾主席大力否認，但阿松未有正面回應，大家估吓估吓之際，阿松老友馬時亨爆出一句：願做梁錦松競選辦主任，似已摩拳擦掌。

  

另一邊廂，有政壇人士就仍然相信，政務司司長林鄭月娥會係阿爺心中其中一個大熱，話說最近佢最近頻頻出動推政改時，有泛民中人就話，在林鄭諸多講話中，特別留意佢有兩個觀點，一個係「特首要愛國愛港但無說也要愛黨」。另外一個係佢在傳媒專訪時提及「將來的特首由普選產生，有助提高認受性，對管治亦有幫助。」

 

泛民中人認為呢兩個算係敏感議題，林鄭都公開講，似有「尚方寶劍」，聽聞仲有人直接問過林鄭點解咁講，佢答話身邊的朋友都係咁睇。有泛民中人就覺得佢好似冇有怕。

  

再加上一向硬朗的林鄭，佢囝囝同老公都回流香港，似有為「好打得」的她打溫情牌做準備。不過，亦有建制中人對林鄭是否去馬有保留，話未到普選各路人馬已爭成咁，到真係有普選時，需要應付政局的心理質素要更高喎。

  

林鄭去馬與否，政壇睇法不同，但對佢「好姐妹」葉劉的睇法就一致啲，每次一數到有心跑馬仔的人選，都會計埋佢。

 

跑馬仔呢場賽事有排睇，但第一關都要先睇吓會否達成落實普選的共識。