「山旮旯」音樂計劃 馮允謙望明年帶成品遊不丹

因為新歌《山旮旯》的歌詞有提到不丹。

唱作人馮允謙（Jay Fung）新歌《山旮旯》，承接上一首作品《聲音導航》以旅遊比喻人生，MV亦「連戲」繼續由RubberBand的6號執導，飾演旅行社老闆的Jay，今次有一位伯伯找上門，伯伯為履行與已離世伴侶的承諾，決定一人遊不丹，比喻愛要及時。

Jay新歌比喻愛要及時。

竹昇仔Jay坦言最初聽到歌名《山旮旯》時搲爆頭，笑說：「太繑口啦，我讀咗好多次先至啱，不過當我明白呢個歌名係比喻一個遙遠的理想，甚至未必得到其他人認同嘅夢想，唔可以因為困難就諸多藉口去放棄。」就好似「山旮旯」一樣好刁轉，不過夢想成真的時候的確令人震奮。 

MV由RubberBand的6號執導。

馮允謙飾演旅行社老闆。

在MV裏幫助伯伯履行亡妻的旅行夢，Jay說：「有時候夢想就好似想去一個地方就即刻行動，唔好等機會錯過，甚至乎嗰個地方唔再存在嘅時候嚟後悔。」原來不丹就是Jay心目中的山旮旯旅行計劃目的地，「我希望完成今年出唱片嘅project之後，明年可以去不丹旅行，帶埋《山旮旯》去歌詞提到嘅不丹，一個曾經被譽為全世界最快樂嘅國家，我想去感受一下，仲希望喺當地創作新歌添！」

踏入2026年，「唱作王子」馮允謙（Jay）喜事一浪接一浪，元旦日在叱咤樂壇頒獎禮首次奪得男歌手金獎；首個個人戶外演唱會「BLUE MOON WANDERLUST 馮允謙演唱會2026」今日（1月17日）起，一連兩日在西九文化區竹翠公園舉行；全新專輯《FRAGMENTS OF MY MIND》亦於今日面世。

馮允謙推出全新專輯《FRAGMENTS OF MY MIND》。

Jay說：「去年開始籌備呢張專輯時，無諗住要咩主題，或者要求任何連貫性，好想隨意發揮，想寫乜就寫乜。結果發現每一首歌都有關於我嘅人生同埋成長，所以最後決定以《FRAGMENTS OF MY MIND》作為專輯名。」隨專輯附送一支筆，讓歌迷參與專輯創作，他說：「可以喺碟內嘅紙、相冊或者歌詞集上寫低想法，發揮想像力，或者寫啲想記低嘅事。」

拍攝花絮

拍攝花絮

去年Jay產量甚豐，有中文歌，亦有英文歌，幾乎全都是他親自作曲，甚至參與部份歌曲填詞和MV創作。靈感滿滿的Jay，畫畫天份如何？他自信地說：「早前返加拿大屋企搵到一個箱，裏面有好畫冊，原來我細個對畫畫都幾有興趣，長大後興趣去咗音樂方面。當時我會畫啲天馬行空、好奇怪嘅嘢，雖然畫功唔係好叻，但好有想像力，細細個有呢啲興趣和培訓。依家拍MV我會想像故事，例如《See Through Ya》MV，我建議用stop motion（定格動畫）手法，用好多張相、好多圖畫、sketch（素描），可能因為我自小有呢啲興趣，先至會想放喺MV度。」

拍攝花絮

拍攝花絮

所謂「歌迷隨偶像」Jay的歌迷畫功和創意亦得豐富，他笑說：「朋友嚟到我屋企，會以為我係自戀狂，因為我放咗好多畫或者有我個樣嘅擺設，其實都係歌迷畫畀我，佢哋真係好sweet，好多謝佢哋。」

拍攝花絮

拍攝花絮