特首人選十個數晒

唐唐一出聲，話支持阿松，搞到特首選舉呢塘水真係無情情滾晒。自一個月前《巴士的報》話阿松同曾主席「孖咇」選特首後，形勢真係急轉直上(唔係急轉直下)，而家先至係2013年，又會熱得咁快?

有一個政界高人近日出席飯局，點評特首選舉搶繮出賽事件，話有希望在2017年參選特首的人馬，數埋10個左右，而家都未被視為有力出戰的人物，都唔使選啦，到時選得的人，都係而家有名有姓之人。

高人先講四個名，可能大家講起阿松，佢先提到阿松，話佢係有心有力之人，夠晒條件去馬，雖然佢無講阿松係唔係已表態出賽。講阿松時佢提到Fit馬馬時亨，時亨哥雖然話願做43年老友阿松的競選辦主任，但高人認為，時亨哥本人都係夠格選特首的人物，不止可幫人選，自己出來亦得。高人跟住講到財爺鬍鬚曾和CS林鄭，佢無評論太多，但認為佢兩個都係熱門人選。

上述四人是政界高人自己數出來，朗朗上口，似乎覺得佢地係領放馬。其餘人名就由在座人士七咀八舌講出來。例如立法會曾主席，高人對佢取態模菱兩可，又例如講到金管局總裁「攞命陳」，高人話「都可以算一個」。

數人名當然唔少得葉劉，高人話數親有邊個想選，都唔可以唔數葉劉。其餘亦有人問起高永文，高人唔太接受，主要批評佢個相。最後計埋高人只談論個8個名，講唔夠10個。散席後有人講起，若要加名可以加個CY，佢係現任，都可能留任嘛，再加又可以加公職王陳智思，雖然人人都覺得佢想選，但佢從來無拋過身出來。

政界高人非常熟悉特首選情，在中港政壇又有線路，佢講嘢都有啲紋路。回想高人講「10個數晒」，「都係有名有姓之人」，聯想起在呢場塘水滾塘魚的遊戲中，都係呢班人互片的格局啦。

Ariel

** 博客文章文責自負,不代表本公司立場 **

由政務司司長林鄭領導的政改諮詢專責小組下月搞了四場晚宴，邀請立法會議員出席，交流政改問題。立法會主席曾鈺成、議員石禮謙及社民連長毛等三名議員都話唔到。當中曾主席唔出席最惹人注意。

曾主席解釋話，任何人有意討論政改都不是問題，不過自己作為立法會主席，不適合在任何場合，與議員辯論這個議題。

老老實實，曾主席搞了幾檔嘢傾政改，日又傾夜又傾，仲有檔專門同政黨傾，又點會唔適合同議員辯論政改呢又？

當我地覺得曾主席唔辯論都可以食飯啫？曾主席話如出席若只是吃飯，未必滿足到主人家的要求咁話。

有高官私下講，曾主席唔出席林鄭飯局，擺明唔俾面，即係話你開個壇我就唔想撐你場囉。好多人講林鄭搞政改諮詢宣傳，搞到好似選擧咁，曾主席就更加睇唔過眼啦。

聽完明哂。總之個個人都話唔會選特首，又覺得其他人喺度搞選舉囉。