財爺自爆有盈餘減壓

財政司司長曾俊華在網誌透露，未來三個財政年度應「年年有餘」，所以可以撥錢為增建公屋作財政儲備。政圈中人話，各大政黨向財爺提要求，好似在聖誕樹上掛嘢一樣，財爺自爆有水，政黨一定提得更狼。

問題係財爺點解要講。因為財政預算有未來幾年財政狀況預測，睇嚟而家係預測到未來幾年都有盈餘，所以財爺預早在網誌放風，以免大家到時見到預算案，有太大驚喜。

財爺就盈餘放風唔係第一次，上周四佢同建制派舉行定期飯局時，佢已透露，實行樓市辣招加上成交回升，雙倍印花稅為庫房帶來約三百億元盈餘。咁個故仔都好清楚，政府出辣招預咗樓市收入減少，點知今年下半年個樓市旺番，特別新樓大量去貨，政府雙倍印花稅壓唔到樓市，變咗政府收多咗錢。呢個年度係咁，亦都要修訂未來的估計，所以變到未來三年都有盈餘。

有盈餘雖然係好事，但財爺為免預算案公布時俾人有驚喜俾人鬧，不如提早自爆，等大家消化吓，減吓壓。政府錢多，要主動散吓財，所以決定撥270億做公共房屋建設基金。

不過政黨唔理你，一於提要求，在上述那場建制派飯局中，多名議員紛紛建議政府「善用」盈餘的要求，包括向受佔中影響的商界提供商業登記費豁免、租金減免、向中產階層提供稅務優惠、推行十五年免費教育等。

當然泛民亦會出招，但佢地話會搞不合作運動針對預算案，若然所有泛民政黨都投反對票兼搞嘢，財爺理論上可以完全唔理佢地的要求，若然有部份泛民政黨唔玩咁盡，財爺又會否差別對待呢?

Ariel

** 博客文章文責自負,不代表本公司立場 **

前政務司司長許仕仁(許老爺)被判有罪後，上海情人即被曝光，原來呢位沈小姐在海外開咗個facebook帳戶，回到上海兼在許老爺那裡吸金8百幾萬後，2011年後許老爺自知出事後再冇聯絡佢，雙方好似無聲無息咁就算分咗手。

  

沈小姐返內地後，在內地上唔到Facebook，可能想盡快忘悼香港的一切，無翻牆上海外網，唔記得咗FB上PO咗自己的靚相。

 

許老爺判刑後，記者打鑼咁搵沈小姐，就搵到佢FB專頁，益咗記者搵到她的玉照，啲相曝晒光。今日個帳戶已經刪咗相片，睇嚟佢發現咗自己的玉照岀晒街。不過，要下載的記者一早就已經存起晒啲相啦。

 

聞說沈小姐呢幾日被大肆報道後，驚到不得了，或者擔心許老爺罪名成立，咁許貪污回來的錢，再送樓送車俾沈小姐，廉記會唔會追番間屋同車架？！不過，睇嚟要追都唔係咁容易，好難證明到兩者的關係，兼且在內地的資產亦難凍結。

不過呢個故事教訓大家，社交媒體咁發達，PO相都係小心啲好。