齊昕同《都市》剖白內心

特首CY二女齊昕，不時在社交媒體留言，引起唔少討論，最激係PO鎅手相片，登上2014年Yahoo香港十大新聞焦點人物的搜尋榜，今日出版的都市日報，約到呢位風雲人物獨家專訪，爆咗唔少料。

梁振英一家出席三女的畢業禮

專訪中好多問題都有傾到，齊昕在訪問中話自己係三兄妹中最令父母擔心的一個，形容自己「我好麻煩又硬頸！」。

今年6月，齊昕上載一幅「鎅手」的相片，引起外間關注。佢解釋，係「對自己要求好高，壓力好大，可能自己讀法律，思考上鑽牛角尖，做傻事」，當時父母立即飛往英國探她，承認「一時間情緒唔穩定」。

至於之後同父母在英國海德公園的合照，事後被佢形容是「公關伎倆」，佢話自己可能性格反叛，只是普通人，與香港的後生女一樣，「I'm just齊昕」，與媽媽相處有「Up & down」，媽媽就緊張佢學業成績，爸爸就唔太著緊分數，「反而注重做人態度，要有禮有家教，有責任感」。佢仲爆以前返聖保羅男女小學，爸爸開車送佢哋，但在麥當奴道放低，要佢哋自己行上去，就算落雨都係咁，話唔可以嬌生慣養。

都市網仲上載埋齊昕接受訪問的影片，片中齊昕現身說法，又擺post同行吓俾攝影師影添，幾nice。

Ariel

** 博客文章文責自負,不代表本公司立場 **

財政司司長曾俊華在網誌透露，未來三個財政年度應「年年有餘」，所以可以撥錢為增建公屋作財政儲備。政圈中人話，各大政黨向財爺提要求，好似在聖誕樹上掛嘢一樣，財爺自爆有水，政黨一定提得更狼。

問題係財爺點解要講。因為財政預算有未來幾年財政狀況預測，睇嚟而家係預測到未來幾年都有盈餘，所以財爺預早在網誌放風，以免大家到時見到預算案，有太大驚喜。

財爺就盈餘放風唔係第一次，上周四佢同建制派舉行定期飯局時，佢已透露，實行樓市辣招加上成交回升，雙倍印花稅為庫房帶來約三百億元盈餘。咁個故仔都好清楚，政府出辣招預咗樓市收入減少，點知今年下半年個樓市旺番，特別新樓大量去貨，政府雙倍印花稅壓唔到樓市，變咗政府收多咗錢。呢個年度係咁，亦都要修訂未來的估計，所以變到未來三年都有盈餘。

有盈餘雖然係好事，但財爺為免預算案公布時俾人有驚喜俾人鬧，不如提早自爆，等大家消化吓，減吓壓。政府錢多，要主動散吓財，所以決定撥270億做公共房屋建設基金。

不過政黨唔理你，一於提要求，在上述那場建制派飯局中，多名議員紛紛建議政府「善用」盈餘的要求，包括向受佔中影響的商界提供商業登記費豁免、租金減免、向中產階層提供稅務優惠、推行十五年免費教育等。

當然泛民亦會出招，但佢地話會搞不合作運動針對預算案，若然所有泛民政黨都投反對票兼搞嘢，財爺理論上可以完全唔理佢地的要求，若然有部份泛民政黨唔玩咁盡，財爺又會否差別對待呢?