回歸之後，每逢年尾的一大看點，就係在特首上京述職時，睇睇中央領導人傳出乜嘢訊息啦。今次係佔中後特首第一次述職，自然更受關注。
先講特首見總理，李總理管經濟，特別講到中央對港的基本的政策方針沒有、也不會改變，中央政府支持香港的各項措施也不會變，而且仲話會繼續加大。
不過，總理同時提到香港本身打拼出來的穩定環境，需要維持；香港發展取得的成就來之不易，要倍加珍惜；只要保持良好營商環境和競爭力，未來發展會更好。
政壇高人覺得，呢番說話其實亦可以話係一種提示，就係香港的營商環境同競爭力，除咗中央支持，亦要靠自身，如果自己搞到亂晒，就要諗清楚係咪有利營商環境啦。
至於習主席那場會見，講得仲白啲，罕有提到政制發制，除咗依法推進，仲提到應該有利於居民的安居樂業，有利於香港社會的繁榮穩定。講政改要有利香港人安居樂業，都係一個新提法。高人認為，背後除了突顯中央重視改善民生之外，亦等如質疑佔領行動影響民生，又係咪有利居民的安居樂業呢？！
聽咗領導人見特首的訊息，似乎都睇到未來特區的施政重點，都會係推動政改同時要改善民生，只怕泛民的不合作運動，不知特首同特區政府係咪會咁易推動工作呢？
Ariel
** 博客文章文責自負,不代表本公司立場 **
特首CY到北京述職，原定周五晚回港，臨時要改到周六早上先走，周五晚有咩重要活動要臨時加場，原來習大大發出邀請，約港澳兩位特首晚宴。
話說今日先係CY向習大大述職，之後就輪到澳門特首崔世安，兩位特首述職的地點係中南海瀛台涵元殿，之後就一起晚宴，國家領導人在瀛台請食飯，一般都稱之為家宴，好似11月奧巴馬訪華時，習大大都係喺呢度設家宴招待奧巴馬。今晚的晚宴，習夫人彭麗媛都出席，兩位特首亦帶埋夫人一齊赴會，三對夫婦在瀛台聚首都好少見啦。
20141226_PO_ 中南海
據了解，原本呢場晚宴在7點半結束(一般呢啲宴會都會6點幾開始)，但就比原定時間遲咗成45分鐘先至完結，食到8點3，氣氛相當唔錯，雖然唔一定係講嚴肅的話題，但大家關心的議題都有傾到。知情人士話，一般特首述職唔係次次有咁的安排，可見習主席同中央都好關心同支持港澳兩個特區特首的工作。
了解情況的高人覺得，今次習大大見CY時，好多嘢在鏡頭前都講得好清楚，好似係指中央堅定不移支持香港按照《基本法》和人大常委會有關決定的規定推動政改，同時推動政改，要符合本地實際，依法有序，更係罕地講到要有利居民的安居樂業，當然亦包括之前常提及的有利於香港社會的繁榮穩定，有利於維護國家的主權、安全同發展利益。
高人話其實呢番說話亦都係講俾有心人聽，好似有啲人話中央寸步不讓，其實都要反省吓訴求是否有利香港的實際情況，其中一個重點係香港特區的特殊情況，係一國之下的兩制，要普選特首，既有由下而上的，合資格五百多萬選民投票的實際情況；同時亦有由上而下的中央任命的實際情況，兩方都有權力，放諸其他地方都無呢個特殊情況，所以如果港人諗唔明呢個Point，普選係好難達至啦。
