白票守尾門　阿爺不接受

基本法委員會委員陳弘毅教授早前提出所謂「白票守尾門」的特首普選特首方案，全國人大常委范太話，有關建議與人大常委8.31決定沒有牴觸。另外又傳有內地「中間人」向泛民探口風，問佢地會否考慮有關方案。講到好似阿爺好受落呢個方案，但Ariel查探一下，發覺呢個方案無論阿爺或泛民都唔會受。

陳弘毅提出「白票守尾門」機制，即係話市民在投票普選特首時，若有過半數選民投白票，就會宣佈選舉無效，等如俾市民在最後階段有否決權。因為陳弘毅係基本法委員會委員，仲傳到佢提出呢個方案係「試水溫」，「有中央默許」云云。

但知情人士話，陳教授呢個建議，只是由他個人提出，並無中央默許，更談不上試水溫，阿爺不會接受「白票守尾門」方案。佢又話，睇吓律政司司長袁國強今日的反應，都露咗少少口風啦。

袁國強話，普選特首須釐清何謂白票，否則容易造成混淆，又說除了法律考慮，同時亦要考慮本港其他選舉如何處理白票。袁司長的評論，等如話呢種方法有好多問題。

另外公民黨黨魁梁家傑亦話，香港人要對候選人有真選擇，而不是用白票守尾門，任何人大8.31框架下的方案，泛民必定否決。

知情人士認為，若然佔中無發生，可能不排除「白票守尾門」這類方案都可以參詳吓。但發生佔中後，真係提嚟都無用。提出者或附和者都係一番好意，要做好人，但佔中後政治變成非黑即白，做好人無用。呢啲「白票守尾門」方案，對阿爺來說令選舉增加咗很多不確定性，對泛民來說仍然不是真普選，兩邊都不會受。

Ariel

** 博客文章文責自負,不代表本公司立場 **

在2014年最後一日，中央宣布被調查的前大內總管令計劃無得再做統戰部長，由前天津市委書記孫春蘭出任，雖然昨日內地傳媒「陰差陽錯」地預告了孫春蘭會做統戰部長，不過，呢個消息不單京城官場關心，香港商界都唔少人拍手。

孫春蘭崛起於遼寧政壇，2005年做中華全國總工會書記，2009年離開中央去地方，出任福建省委書記，當時已政壇中人都有估呢個安排只係一個歷練，果然三年之後，孫春蘭就高升進入政治局，並出任重鎮天津市委書記，估唔到在令計劃出事後，佢又再臨危受命，接掌統戰部。

據聞本港政商界中的福建幫，聽到呢消息拍晒手，唔少在福建投資的港商，對孫春蘭印象幾好，話佢人緣好，無乜官氣，稍有交往的港商去開福建，孫春蘭都會抽時間拜會，好識得同人溝通。所以佢做統戰部長都真係幾適合。

孫春蘭在福建雖然時間唔長，但憑住本身呢個親和風格，在台灣同香港政商界結識咗唔少朋友，台灣傳媒都形容佢係「知台派」，同佢接觸過的港商亦都形容「佢做幾好呀，同香港聯絡肯定好番啲啦！」。

熟悉福建政壇的高人就話，當時孫春蘭去到福建，外界都認為係過度性安排，2007年習大大上京後，孫春蘭升得好快，所以被解讀係習大大的人。

內地政界反而關注，搵一位政治局委員做統戰，係三十幾年未試過的事，肯定的係統戰統部升咗格，可以預期未來統戰工作會受到重視。