在2014年最後一日，中央宣布被調查的前大內總管令計劃無得再做統戰部長，由前天津市委書記孫春蘭出任，雖然昨日內地傳媒「陰差陽錯」地預告了孫春蘭會做統戰部長，不過，呢個消息不單京城官場關心，香港商界都唔少人拍手。
孫春蘭崛起於遼寧政壇，2005年做中華全國總工會書記，2009年離開中央去地方，出任福建省委書記，當時已政壇中人都有估呢個安排只係一個歷練，果然三年之後，孫春蘭就高升進入政治局，並出任重鎮天津市委書記，估唔到在令計劃出事後，佢又再臨危受命，接掌統戰部。
據聞本港政商界中的福建幫，聽到呢消息拍晒手，唔少在福建投資的港商，對孫春蘭印象幾好，話佢人緣好，無乜官氣，稍有交往的港商去開福建，孫春蘭都會抽時間拜會，好識得同人溝通。所以佢做統戰部長都真係幾適合。
孫春蘭在福建雖然時間唔長，但憑住本身呢個親和風格，在台灣同香港政商界結識咗唔少朋友，台灣傳媒都形容佢係「知台派」，同佢接觸過的港商亦都形容「佢做幾好呀，同香港聯絡肯定好番啲啦！」。
熟悉福建政壇的高人就話，當時孫春蘭去到福建，外界都認為係過度性安排，2007年習大大上京後，孫春蘭升得好快，所以被解讀係習大大的人。
內地政界反而關注，搵一位政治局委員做統戰，係三十幾年未試過的事，肯定的係統戰統部升咗格，可以預期未來統戰工作會受到重視。
Ariel
** 博客文章文責自負,不代表本公司立場 **
亞視搞到出唔到糧，件事愈鬧愈臭。有人計亞視資產，話亞記主要資產是大埔工業邨的廠房，佔地22萬呎，樓面面積超過55萬平方呎，以2,000元呎價計值11億元咁話。
香港樓價飛升，亞記2006年用1.9億元購入大埔工業邨大盛街25至37號作總部，如今真係值錢好多，問題係若然清盤，呢啲錢會俾邊個？
其實一直有人想收購亞記，問題係幕後人王征開天價，無10億、8億買他們近51%股份，他們就不願放手，有人仲聲稱情願清盤不會賤賣咁話。在亞視另一股東蔡衍明入禀要法庭委任亞視管理人的官司開始前，王征已搶先出手，向亞視發出法定償債書，要求亞視還錢，亞視當然無錢還，王征已隨時可以出手將亞記清盤。
在蔡衍明發起的官司審訊中，亞視財務部主管李錫勛作供時話，截至今年9月底，亞視欠王征10.2億元，包括8.8億元本金及1.4億元利息。換言之，王征係亞視最大債主。和王征同一陣線的亞視大股東黃炳坤亦於今年10月兩度借錢予亞視支薪，涉款共2,500萬元。
不過更關鍵的是今年6月一筆貸款，因為攞了亞記的大埔廠房去抵押。事件源於亞視早前因欠另一股東查氏兄弟3億元被申請破產，結果亞視成功舉債還錢，但在此次貸款中，亞視以大埔廠房作抵押，向名為「寶嶺」的公司借了2.9億元，王征則任擔保人。亞視大股東黃炳均在法庭上作供時稱，借款公司背後借款人王杰教授是其朋友，是「一個男人」，但沒有進一步透露其身份。他指當時形勢緊急，所以按廠房借錢，批評蔡衍明身為股東沒有拿錢出來救亡。
據法律界人士話，公司清盤後，還盤順序是清盤費用、員工工資及有關賠償、有抵押貸款、無抵押貸款，最後才還俾股東。由於亞視廠房已抵押，所以萬一出售，先俾清盤費用和員工，然後就還俾借2.9億的王杰教授，然後再還俾包括王征在內的一眾貸款人，由於單係欠王征已欠10.2億，還完債都無乜得剩。
知情人士話，由於亞記最有價值的資產廠房已抵押，王征又係最大債主，所以佢唔怕清盤，逼阿爺搵人來救。問題係王征條數都算得好盡，萬一清盤，估計蔡衍明一方都唔會咁順攤，一定會去法庭大力質疑6月的貸款協議和王征的貸款協議的合法性，王征的如意算盤，都未必打得嚮也。
