泛民四票難求

政改方案要得立法會三分二通過，立法會有70席，要在泛民27人中有4人轉軚支持政府，再加上立法會主席曾鈺成投支持票，才夠三分二支持票通過方案。

泛民四票難求。政務司司長林鄭昨日在記者講到要爭取最少泛民四票支持，聲言永不放棄：「縱然前路艱辛，我們會堅持到最後一刻……至今未有劃定邊四位議員或者更多議員係我哋嘅目標，我哋係想爭取大部份泛民議員回心轉意。」

林鄭無點名要「撬」那四個泛民議員，但工業界大輝哥質詢林鄭時，幫埋手點名有可能被「撬票」的泛民成員，包括公民黨湯家驊、民協馮檢基、衞生服務界李國麟、會計界梁繼昌以及資訊科技界莫乃光。

政界中人分析，表面看5個人中，其中3人湯家驊、馮檢基、李國麟唔係無機會郁，但要搵第4個已好難，咁樣撬散票，仲要所有其他票一票都唔走，同立法會曾主席都支持，成個過程極難控制。你諗吓要被人打柴的田少投票支持，佢又會同政府或阿爺點樣講數? 話唔埋仲難過搵梁繼昌或莫乃光。

在曾蔭權年代搞政改，第一次都係想撬散票不成功，第二次改為撬民主黨票才可以通過。所以現在要玩呢個撬泛民四票的遊戲，難度之高，可以想像。

Ariel

** 博客文章文責自負,不代表本公司立場 **

政務司司長林鄭牽頭開展第二階段政改諮詢，文件羅列特首普選的方案，本質係「易入難出」，易入閘，難出閘，攞唔到提名委員會過半數出唔到閘做候選人，呢啲都係事前已經講晒。

到底點樣描述特區政府而家的處境？民主黨的張文光周日在電台節目上話，10年前許仕仁做政務司司長時搞政改，同民主黨講佢袋裏只有20蚊，無乜同泛民討價還價的條件。張文話，而家睇林鄭，連20蚊都無，得10蚊。佢估計政改方案過唔到，大家要再等10年(佢假設呢個年份可能因為習近平會執政10年)。

政壇高人話，張文話林鄭有10蚊，佢認為林鄭10蚊都無，而且佢個袋係透明袋，裏面有幾多錢一目了然，因為人大常委會8.31框架定死咗，不會變。中央的原則不能變，一變，會大亂。

有人話，阿爺若對政改寸步不讓，政改不能通過，不通過政府就不能管治。高人就對「不能管治」呢個說法好唔認同，話當年曾蔭權又係咁講，話過唔到不能管治，佢不如辭職，結果中央夾硬接受咗超級區議會方案。如今中央唔再信「不能管治」這一套，泛民在佔中時露了底，佔中咁不能管治的局面，都捱過了，還有更不能管治的處境嗎？佢話中央打定輸數，就係咁多，過不到，就等5年吧，但等5年、10年，再上枱還是同一個方案。