政事
阿爺守硬人大8.31框架，特區政府無乜銀兩游說泛民轉軚，袋中無錢，就問人借錢，昨日就借了陳弘毅教授的「白票守尾門」方案來推銷。
林鄭月娥在立法會回應議員提問時，被問到「白票守尾門」方案，話政府會「認真考慮」。到政制及內地事務局局長譚志源在記者會講嘢時，就玩得更白，話「其實最早提出白票守尾門唔係陳弘毅教授，最早提出乃係民主黨羅致光先生，後來報紙社評都有跟進。」
記者見佢話民主黨羅致光提出呢個方案，就問佢會否向民主黨及泛民釋出善意爭取支持？譚志源就未敢講太多，只係遊吓花園就算，但表示已收到陳弘毅的詳盡意見書，三人組會與他見面，詳細研究法律上和運作上的細節，並會同時研究立法會和區議會的白票安排，再作定論咁話。
高人話阿爺根本唔接受白票守尾門呢種方案，但特區官員根本無乜大嘢可以和泛民討價還價，就連白票守尾門方案都借來用用，頗有點借錢去賭的味道，得唔得就見仁見智啦。
Ariel
** 博客文章文責自負,不代表本公司立場 **
政改方案要得立法會三分二通過，立法會有70席，要在泛民27人中有4人轉軚支持政府，再加上立法會主席曾鈺成投支持票，才夠三分二支持票通過方案。
泛民四票難求。政務司司長林鄭昨日在記者講到要爭取最少泛民四票支持，聲言永不放棄：「縱然前路艱辛，我們會堅持到最後一刻……至今未有劃定邊四位議員或者更多議員係我哋嘅目標，我哋係想爭取大部份泛民議員回心轉意。」
林鄭無點名要「撬」那四個泛民議員，但工業界大輝哥質詢林鄭時，幫埋手點名有可能被「撬票」的泛民成員，包括公民黨湯家驊、民協馮檢基、衞生服務界李國麟、會計界梁繼昌以及資訊科技界莫乃光。
政界中人分析，表面看5個人中，其中3人湯家驊、馮檢基、李國麟唔係無機會郁，但要搵第4個已好難，咁樣撬散票，仲要所有其他票一票都唔走，同立法會曾主席都支持，成個過程極難控制。你諗吓要被人打柴的田少投票支持，佢又會同政府或阿爺點樣講數? 話唔埋仲難過搵梁繼昌或莫乃光。
在曾蔭權年代搞政改，第一次都係想撬散票不成功，第二次改為撬民主黨票才可以通過。所以現在要玩呢個撬泛民四票的遊戲，難度之高，可以想像。
