政改第二輪諮詢開動，最後提交政改方案上立法會，要有三分二議員通過，而家計盡所有非泛民議員都投票支持政改方案，還欠4票，理論上要在泛民27個議員中拉到4個人轉軚支持政府，政改方案就可以通過。
接著大家又數，公民黨湯家驊、民協馮檢基、衞生服務界李國麟、會計界梁繼昌以及資訊科技界莫乃光，都好像是撬票對象喎。講就易，實際上機會認真唔大，有官場中人就講起10年前一個「半夜襟鐘仔」的故事，證明撬票呢家嘢，不是眼睇咁容易。
首先大家不要心邪，不要聽起「襟鐘仔」就諗到砵蘭街，官場中人講呢個鐘仔係上亞厘畢道禮賓府個鐘仔。時維2005年，煲呔曾新上場做特首，興致勃勃去推政改，當時情況類似，欠泛民5票，才可以通過政改方案。煲呔曾和現已身陷窂籠的難兄難弟肥龍許仕仁，講到口水乾都未夠票。
去到關鍵時刻，唯有搵阿爺幫手，阿爺都算唔話得，打晒電話，用埋平常的關係，話搵到6個泛民議員，聲言「他們會轉軚支持政改方案」，找他們傾啦。阿爺講到咁實故實鑿，煲呔、肥龍雖然半信半疑，都在禮賓府開局，叫幾個被點名的泛民一齊去傾。不過人未到，記者先到，肥龍在禮賓府門口抽煙順道等人時，已發現有某大報記者在門口等影相，肥龍暗叫不妙，入內向煲呔報告，計一計數，這樣秘密的會議，政府高層不會放料俾記者，唯一可能是與會者做人情向報館通水，但叫得人來影，固然不會話「我轉軚啦」，當然想扮吓嘢話「我好鐵無轉軚」啦！
結果個會可以用「古靈精怪」四個字來形容，7、8、9點都有人到，準時者少，其中一個應該出現但一直無出現。出現者好多嘢講，其中一個「鐵娘子」就大發議論，講佢如何堅持民主之類。煲呔和肥龍愈聽愈覺唔對路，「乜呢啲人唔係同阿爺講咗佢地可以轉軚咩？點解而家又講啲相反詞呢？」好明顯個個不想得罪阿爺，對阿爺講一套，在香港又做另一套啦。會面結果不歡而散。
最經典的還在後頭，散晒會半夜一點，有人去禮賓府襟鐘仔搵特首，守門的警察報上去搵人叫醒已經瞓咗的煲呔曾，煲呔睡眼惺忪行落樓，從對講機那裏才知道是一直無來的男神泛民議員，佢話「唔好意思我老豆入咗醫院，而家先至搞完得閒嚟，你地傾成點呀！」「吓，你而家至嚟，一早傾完散晒咯喎。」「哦，咁無計啦，我走啦。」半夜俾人叫醒的煲呔，自然懷疑對方玩嘢啦。事後總結這樣去撬散票，無辦法成功，下一屆再搞政改，煲呔就向政黨埋手，結果拉了民主黨同意支持超級區議會的方案。
2005年的處境和如今接近之處，是有多數市民支持政改方案，但泛民反對。如今民調顯示有超過五成市民支持政改方案通過，但泛民議員就是反對，他們更聲言不會做民調，顯然也知道民意取向。或許歷史不斷正在重覆，今次亦如2005年一樣，政府撬票不成，政改原地踏步，市民不滿累積，等5年之後，就逼到泛民政黨轉軚支持了。
盧永雄
